Mbela otashi ende tashi ningi oshidhigu kungoye okumona eyooloko pokati koshili niifundja? Aantu kunena ohaya itaala iinima shi ikolelela kwaashoka ye uvite nokwaashoka taya dhiladhila paumwene, pehala lyokwiikolelela kuyeelele mboka wu li paushili. Muuyuni awuhe kunena, aantu oyendji oyi itaala kutya kaku na oshili.

 Etaloko ndyoka kali shi epe. Omimvo 2 000 dha ka pita, Omupangeli gwaRoma Pontius Pilatus okwa li a pula Jesus a limbililwa a ti: “Oshili oshike?” (Johannes 18:38) Nonando ka li a tegelela a yamukulwe, epulo lye olya li lya simana. MOmbiimbeli omu na eyamukulo ndyoka tashi vulika li ku mbilipaleke notali vulu oku ku kwathela wu tseye eyooloko pokati koshili niifundja, muuyuni mbuka wu udha engwangwano.

Mbela oku na ngaa oshili?

 Eeno. Ombiimbeli oya longitha oshitya “oshili” ya ukutha kuuyelele wu li paushili nosho wo kwaashoka shi li mondjila nosha uka. Ombiimbeli otayi tu longo kutya Jehova a Kalunga oye Onzo yoshili, notayi mu ithana e li “Kalunga omudhiginini” nenge koshili. (Episalomi 31:5) MOmbiimbeli omu na oshili ndjoka ya za kuKalunga noya faathanitha oshili ndjoka nuuyelele, oshoka otayi vulu oku tu wilika kunena muuyuni mbuka wu udha engwangwano. — Episalomi 43:3; Johannes 17:17.

Oshike tashi vulu oku ku kwathela wu ndhindhilike mo oshili?

 Kalunga ina hala tu taambe ko oshili yOmbiimbeli nopwaa na okudhiladhila. Pehala lyaashono, okwa hala tu yi konakone tatu longitha omadhiladhilo gopandunge pehala lyokwiikolelela komaiyuvo getu. (Aaroma 12:1) Okwa hala tu mu tseye notu kale tu mu hole tatu longitha ‘omadhiladhilo getu agehe,’ note tu ladhipike tu kale twa tompwa kutya shoka tatu ilongo mOmbiimbeli oshoshili. — Mateus 22:37, 38; Iilonga 17:11.

Openi pwa ziilila iifundja?

 Ombiimbeli otayi ti kutya iifundja oya tamekwa komutondi gwaKalunga, Satana Omuhindadhi, ngoka Ombiimbeli ye mu ithana ‘he yiifundja ayihe.’ (Johannes 8:44) Okwa li a lombwele aantu yotango iifundja kombinga yaKalunga. (Genesis 3:1-6, 13, 17-19; 5:5) Okuza mpono Satana okwa tsikile nokutaandelitha iifundja kombinga yaKalunga nokuholeka oshili kombinga Ye. — Ehololo 12:9.

Omolwashike iifundja ya ha kunena?

 Pethimbo lyetu, ndika Ombiimbeli tayi li ithana ‘omasiku gahugunina,’ iifundja yaSatana oya nwetha mo aantu shi vulithe nale. Olundji aantu ohaya popi iifundja nelalakano lyokupukitha yalwe noku ya kwata ko. (2 Timoteus 3:1, 13) Iifundja oyi igalala wo nomomalongelokalunga ogendji kunena. Ombiimbeli oya hunganeka kutya aantu pethimbo lyetu otaye ki “ikongela aalongi mboka taye ya lombwele oohapu tadhi nywitha omakutsi gawo” notaye ke “etha elongo lyoshili.” — 2 Timoteus 4:3, 4.

Omolwashike oshili ya simana?

 Oshili ohayi kwathele aantu ya kale yi inekelathana. Uukuume pokati kaantu ohawu teka, ngele inaya inekelathana. Ombiimbeli otayi ti kutya Kalunga okwa hala oku mu longela kwetu ku kale kwa kankamena koshili. Oya ti: “[Mboka] taye mu galikana, oye na okugalikana mOmbepo nomoshili.” (Johannes 4:24) Opo wu ilonge nkene oshili yOmbiimbeli tayi vulu oku ku kwathela wu ndhindhilike mo iifundja yomalongelokalunga nokuu ethe yi ku nwethe mo, lesha iitopolwa mbyoka yi li kohi yoshipalanyolo “Lies That Make God Seem Unlovable.”

Omolwashike Kalunga a hala ndi tseye oshili?

 Kalunga okwa hala wu ka hupithwe, nowa pumbwa okwiilonga oshili kombinga ye, opo shoka shi ningwe. (1 Timoteus 2:4) Ngele owi ilongo omithikampango dhaKalunga dhaashoka shi li mondjila naashoka sha puka nokukala metsokumwe nadho, oto ka kala wu na uukuume wopothingo naye. (Episalomi 15:1, 2) Kalunga okwa tumu Jesus kombanda yevi, opo a kwathele aantu yi ilonge oshili. Kalunga okwa hala tu kale hatu pulakene komalongo gaJesus. — Mateus 17:5; Johannes 18:37.

Mbela Kalunga ota ka hulitha po ngaa iifundja?

 Eeno. Kalunga ke hole aantu taya lombwele yalwe iifundja. Okwa uvaneka kutya ota ka hanagula po aantu mboka taya tsikile okukala aaniifundja. (Episalomi 5:6) Sho ta ka ninga ngawo, ota ka gwanitha po wo euvaneko lye ndyoka tali ti: “Omilungu dhoshili otadhi kala dha kola sigo aluhe.” — Omayeletumbulo 12:19.