Mo 2022, omapangelo muuyuni awuhe oga longitha oshimaliwa oshindji noonkondo, shoodola dhaAmerika ootililiyona 2.24 (N$44 035 040 000 000.00), pethimbo sho Rusia a ponokele Ukraine. Olopota yimwe ndjoka ya piti muApilili 2023, ya za kehangano lyedhina Stockholm International Peace Research Institute (SIPRI) oya ti:

•   Omatangakwiita moEuropa oga longitha oshimaliwa shi thike “poopelesenda 13 mo 2022, oshimaliwa shoka oshindji noonkondo okuyelekanitha naashoka sha longithilwe miita moEuropa alihe okuza mo 1991.”

•   “Rusia okwa longitha oshimaliwa tashi tengenekwa shi li poopelesenda 9,2, shono sha ningitha oshilongo shoka shi ye pondondo ontitatu okuza pontitano muuyuni, ngele tashi ya piilongo mbyoka ya longitha iimaliwa oyindji miita.”

•   Amerika oye e li pombanda miilongo ayihe mbyoka ya longitha iimaliwa oyindji miita, “oshoka okwa longitha oshimaliwa shi thike poopelesenda 39, muuyuni awuhe.”

 Dr. Nan Tian ngoka ha longo mehangano Stockholm International Peace Research Institute, okwa ti: “Sho omatangakwiita muuyuni taga tsikile okulongitha oshimaliwa oshindji miita, shoka oshi li endhindhiliko kutya muuyuni mbuka tu li kamu na egameno.”

 Ombiimbeli oya hunganeka kombinga yomaipumomumwe ogendji ngoka taga ka kala pokati komapangelo omanankondo muuyuni, noya popya wo kombinga yaashoka tashi vulu oku tu etela ombili yashili.

•   Ombiimbeli otayi ti kutya omathimbo ngaka tu li mugo “omathimbo gahugunina.” — Daniel 8:19.

•   Embo lyaDaniel olya hunganeka kutya pethimbo ndyoka otapu ka kala omapangelo taga kondjithathana, omolwoonkondopangelo. Omapangelo ngaka otaga ka ‘matukilathana,’ nenge tu tye otaga ka kondjithathana, oshoka kehe limwe olya hala okukala olyo tali ti pii muuyuni. Momalugodhi ngoka otamu ka tikila “omaliko” ogendji nenge tu tye oshimaliwa oshindji. — Daniel 11:40, 42, 43.

 Opo wu ilonge oshindji kombinga yehunganeko lyopaMbiimbeli ndika ehokithi, tala okavidio Okugwanithwa kwehunganeko ndyoka li li muDaniel ontopolwa 11.

•   Ombiimbeli oya popya kutya Kalunga ota ka hulitha po omapangelo gopantu, sho tayi ti: “Ota ka dhika po oshilongo shoka shaa na hulilo. Itashi ka sindika nando, ihe otashi ka yonagula po iilongo mbyoka ayihe, nosho shene otashi kala sigo aluhe.” — Daniel 2:44.

•   Masiku, Jehova a Kalunga ota ka eta ombili yaaluhe, oshinima shoka omapangelo gopantu itaaga vulu okuninga. Mbela ote ke shi enda ngiini? Epangelo lye lyomegulu otali ka hulitha po omalugodhi agehe nosho wo elongithonkondo muuyuni awuhe. — Episalomi 46:8, 9.

 Opo wu ilonge oshindji kombinga yaashoka Uukwaniilwa waKalunga tawu ka gwanitha po, lesha oshitopolwa, “Under God’s Kingdom ‘Peace Will Abound.’”