Momasiku 25 Juli 2023, Inger Andersen, ngoka e li kohi yewiliko lyahamushangandjayi gwIigwana ya Hangana nosho wo lyomuwiliki omukuluntu gwIigwana ya Hangana, ngoka ha tonatele iinima yi na ko nasha nomidhingoloko, okwa ti: “Omaupyakadhi ga kwata miiti ge na ko nasha nonkalo yombepo, oga gwilila po aantu noga yonagula iilando nosho wo omidhingoloko. Elunduluko lyonkalo yombepo olya etitha iikungulu iidhigu, mbyoka tayi yonagula omagumbo nosho wo oonkalamwenyo dhaantu muuyuni. Nomomafuta omudhingoloko ogwa nyatekwa noonkondo, oshinima shoka sha etitha iinamwenyo niimeno mbyoka yi li mo, yi kale tayi si.”

 Mbela omapangelo otaga vulu ngaa okutula uukuni kumwe, ga kandule po omaupyakadhi ngoka ge li muuyuni? Mbela otaga vulu ngaa okweeta po ekandulopo tali kalelele?

 Ombiimbeli oya popya kombinga yepangelo ndyoka tali vulu notali ka kandula po omaupyakadhi agehe, ngoka ge muuyuni. Oya ti kutya “Kalunga komegulu ota ka dhika po oshilongo,” ano epangelo ndyoka tali ka pangela ombanda yevi alihe nokukandula po omaupyakadhi agehe muuyuni. (Daniel 2:44) Kohi yepangelo ndyoka, aantu itaya ka longa “uuwinayi nenge iikolokosha.” — Jesaja 11:9.