MuJuli 2022, omadhipago gaantu noondjembo omatilithi oga li ga ningwa muuyuni awuhe:

•   Mo 10 Juli 2022, oshifokundaneki shedhina The Japan Times osha ti: “Edhipago lyomunapolitika a tseyika nawa, [gwedhina Shinzo Abe, ngoka a li nale omuprima gwaJapani] olya piyaganeka aantu moshilongo nolya halutha aantu muuyuni awuhe, unene tuu sho moJapani ihaamu longwa naanaa omiyonena dha fa mpoka nomu na oompango dha kwata miiti ngele tashi ya pokulongitha oondjembo.”

•   Mo 4 Juli 2022, ehangano lyedhina Reuters olya ti: “Aantu moDenmark oya haluka sho omulumentu gumwe a dhipaga aantu yatatu nondjembo pehala lyoositola lyedhina Copenhagen.”

•   Mo 10 Juli 2022, oshifokundaneki shedhina The Guardian osha ti: “MoSouth Africa, aantu 15 oya si konima sho ongundu yaalumentu ya homata ya tameke okuumba oondjembo pehala lyomanwino moSoweto.”

•   Mo 5 Juli 2022, oonkundana dho-CBS odha kundaneke dha ti: “Aantu ya konda 220 oya yahwa nokusa pethimbo lyefudho lyopashigwana moAmerika ndyoka hali kala ko okuza 4 Juli okuuka komeho.”

 Mbela omiyonena dha tya ngaaka odhi na ngaa esiku nadhi ka hule po? Ombiimbeli otayi ti ngiini?

 Ombiimbeli otayi ti kutya otu li ‘momasiku’ gahugunina moka aantu taya ka kala aadhudhu, kaaye na ohenda naakwanyanya. (2 Timoteus 3:1, 3) Aantu ya tya ngaaka ohaya ningitha aantu ya kale muutile. (Lukas 21:11) Ihe Ombiimbeli oyu uvaneka kutya omiyonena otadhi ka hulithwa po nonokutya aantu ‘otaya ka kala yaa na nando ombudhi, nomagumbo gawo ge na ombili nevululuko.’ (Jesaja 32:18) Omiyonena otadhi ka hulithwa po ngiini?

 Kalunga ota ka hulitha po aakolokoshi nota ka hanagula po iikondjitho ayihe.

•   “Aakaanakalunga otaa ka kombwa mo moshilongo.” — Omayeletumbulo 2:22.

•   “[Kalunga] ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.” — Episalomi 46:9.

 Kalunga ota ka hulitha po uukolokoshi awuhe sho ta ka longa aantu nkene ye na okukala nombili.

•   “Kondundu yandje ondjapuki itaku ka longwa uuwinayi nenge iikolokosha, oshoka evi otali ka udha okutseya Omuwa kwa fa omeya ga siikila efuta.” — Jesaja 11:9.

•   Nongashingeyi Kalunga ota longo aantu muuyuni awuhe ya yande uukolokoshi nosho wo okulongitha iikondjitho, ‘ya hambule omagonga gawo omatemo nomagongamwele gawo iimwitho.’ — Mika 4:3.

 Opo wu mone uuyelele owundji kombinga yeuvaneko lyOmbiimbeli li na ko nasha nuuyuni moka itaamu ka kala we uutile, lesha oshitopolwa shi li moshifo sho-Awake!, “Freedom From Fear—Is It Possible?”

 Opo wu ilonge oshindji kombinga yekandulopo lyuukolokoshi, lesha oshitopolwa shi li moshifo sho-Awake!, “Peace on Earth at Last!”