Mboka haya li owala iikwamboga — Ombiimbeli otayi ti ngiini?
Muuyuni awuhe, aantu oyendji oye hole owala okulya iikwamboga.
Ehangano lyedhina The Vegan Society olya ti: “Okulya owala iikwambonga osha kwatela mo okuyanda kehe shimwe shoka sha za kiinamwenyo ongele iikulya, oonguwo nenge iinima yilwe.”
Aantu yamwe ohaya hogolola owala okulya iikwamboga, oshoka oye na ko nasha niinamwenyo noya hala okuhwepopaleka omudhingoloko, uukolele nenge haye shi ningi molweitaalo lyontumba.
Ehangano Britannica Academic olya ti: “Okulya owala iikwamboga okwa yooloka ko kokulya iikulya yilwe, oshoka olundji aantu oye ku tala ko ku li eitaalo, etokolo lyokwiitala ko wa yela nosho wo omukalo aniwa moka kehe gumwe ta vulu okuhwepopaleka uuyuni.”
Mbela okwaalya onyama oku li omukalo gwokukandula po omaupyakadhi kombanda yevi? Ombiimbeli otayi ti ngiini?
Nkene Omushiti gwetu a tala ko aantu nosho wo iinamwenyo
Ombiimbeli oya ulika kutya Omushiti gwetu, Jehova Kalunga, a okwa tala ko aantu ye na ongushu ye vule iinamwenyo, nokwe ya pa uuthemba woku yi pangela. (Genesis 1:27, 28) Shimwe ishewe, Kalunga okwa pitika iinamwenyo yi ninge oondya dhaantu. (Genesis 9:3) Nonando ongawo, shika itashi ti kutya okwa hala iinamwenyo yi kale tayi monithwa iihuna. — Omayeletumbulo 12:10.
Shi ikolelela kOmbiimbeli, okulya onyama ehogololo lyomuntu paumwene. b Ehogololo lyetu ihali tu ningitha tu kale twa simana momeho gaKalunga. (1 Aakorinto 8:8) Kapu na omuntu e na uuthemba wokupangula etokolo lyamukwawo kombinga yaashoka a hogolola okulya. — Aaroma 14:3.
Shoka tashi tu kwathele tu ka kale nonkalamwenyo ombwanawa
Ombiimbeli oya holola kutya omukalo ngoka tatu hogolola tu kaleke onkalamwenyo yetu, hagwo ekandulopo lyomaupyakadhi muuyuni. Omaupyakadhi ogendji ohaga etithwa kiinima yopapolitika, yopankalathano nosho wo yopamahupilo yuuyuni mbuka, mbyoka kaapu na omuntu ta vulu oku yi hulitha po. Ombiimbeli otayi ti:
“Shoka sha goyoka, itashi vulu okuuthwa.” — Omuuvithi 1:15.
Omushiti gwetu ota ka kandula po omaupyakadhi ngoka tu na kunena. Ombiimbeli oya longitha oohapu dhopathaneko yi yelithe shoka ta ka ninga.
“Ongame nonda mono egulu epe nevi epe. Oshoka egulu lyotango nevi lyotango oya hula po nefuta kali ko we.” — Ehololo 21:1.
Kalunga ota ka pingena po omapangelo gopantu nenge tu tye “egulu lyotango” ‘negulu epe,’ ano epangelo lye lyomegulu. Uukwaniilwa we otawu ka hanagula po ‘evi lyotango’ nenge tu tye aakolokoshi, notawu ka pangela ‘evi epe,’ ano mboka ya hala okuvulika kuwo.
Kohi yelelo lyUukwaniilwa waKalunga okwo owala aantu taya ka kala nombili niinamwenyo nokusimaneka omudhingoloko moka ye li. — Jesaja 11:6-9.
a Jehova olyo edhina lyaKalunga. — Exodus 15:3, OB-1954.
b Ombiimbeli oye tu lombwela ‘twaa lye ombinzi.’ (Iilonga 15:28, 29) Shika osha hala okutya katu na okunwa ombinzi nenge okulya onyama yoshinamwenyo sha pondwa. Katu na wo okulya iikulya mbyoka ya tulwa ombinzi.
Opu na ishewe uuyelele mbuka
ESSENTIAL BIBLE TEACHINGS
Omolwashike Kalunga a shiti evi?
Muuyuni omu na iinima oyindji iiwanawa. Kalunga evi okwe li tula pehala li li nawa oshinano shokuza ketango okuya kevi. Olya yeluka nawa nohali dhingoloka pondapo yi li nawa. Omolwashike Kalunga a ninga oonkambadhala dha mana mo, mokushita evi?
