Mo 24 Febuluali 2022, oshilongo shaRusia osha ponokele oshilongo shaUkraine. Oshinima shoka osha tula onkalamwenyo yaantu omamiliyona moshiponga notaya kambadhala okuthiga po oshilongo meendelelo ngaashi tashi vulika. a

 Nataliia gwokoKharkiv moUkraine ota ti: “Oomboma odha li tadhi topa. Katu shi kutya natu shi hokolole ngiini, otwa li twa tila noonkondo. Sho tu uvu kutya opu na eshina ndyoka tali tutu aantu, otwa tokola okuya. Otwa li tu na okuthiga po kehe shimwe, molwaashoka omuntu kehe okwa li owala e na okuya nokandjato okashona. Otwa li owala tatu vulu okukutha oondokumende dhetu, omiti, omeya nosho wo uunima wokwiinyangusha. Otwa thigi po kehe shimwe notwa yi kositaasi shomashina pethimbo oomboma tadhi topa momidhingoloko dhetu.”

 Nadija gwokoKharkiv moUkraine ota ti: “Katwa li tatu dhiladhila kutya moshilongo onamu ke ya iita. Otwa li tu uvite omitopelo kiitopolwa yimwe yoshilando, shoka sha li sha ningitha omakende ga kale taga inyenge. Otwa tokola okuya nokukutha owala iinima mbyoka twa pumbwa. Megumbo onda zi mo po 8:00 yongula nonda londo meshina ndyoka lyu uka koLviv, opo ndi ka londe ombesa ndjoka yu uka koPoland.”

Moshitopolwa shika otatu ka yamukula omapulo ngaka:

•  Oshike hashi ningitha aantu ya tauke mo miilongo yawo?

•  Openi oontauki tadhi vulu okumona ekwatho?

•  Mbela Ombiimbeli otayi vulu ngaa okukwathela oontauki kunena?

 Oshike hashi ningitha aantu ya tauke mo miilongo yawo?

 Sho etangakwiita lyaRusia lya ponokele Ukraine, aantu oya tauka mo moshilongo. Ihe nonando ongawo, Ombiimbeli oya holola puuyelele shoka hashi ningitha aantu ya tauke:

•   Omapangelo gopantu muuyuni, oga ndopa okugwanitha po oompumbwe dhaantu. Olundji omapangelo ohaga longitha nayi oonkondopangelo dhago ga thindile aantu kongodhi. — Omuuvithi 4:1; 8:9.

•   Satana Omuhindadhi, “omupangeli guuyuni,” okwa nwetha mo aantu ya longe uuwinayi. Ombiimbeli otayi ti: “Tse otu shi shi kutya tse aantu yaKalunga, ihe uuyuni auhe ou li mepangelo lyomuhindadhi.” — Johannes 14:30; 1 Johannes 5:19.

•   Kakele komaupyakadhi ngoka aantu ya kala ye na omimvo omathele dha ka pita, ngashingeyi otu li pethimbo ndyoka Ombiimbeli a hunganeka kutya: “Komasiku gokomeho otaku ke ya omathimbo omadhigu.” (2 Timoteus 3:1) Shimwe ishewe, oya popya kutya pomasiku ngoka otaku ka kala iita, iiponga yopaunshitwe, oondjala nomalega. Iinima mbyoka oyo hayi ningitha aantu ya tauke. — Lukas 21:10, 11.

 Openi oontauki tadhi vulu okumona ekwatho?

 Ombiimbeli oya holola kutya Omushiti gwetu, Jehova b Kalunga, oku hole noku na ohenda noontauki nosho wo naamboka ya thiga po omagumbo gawo. (Deuteronomium 10:18) Oku uvaneka kutya ota ka hulitha po omaupyakadhi gwoontauki okupitila mepangelo lye lyomegulu, ndyoka hali ithanwa Uukwaniilwa waKalunga ndyoka tali ka pingena po omapangelo gopantu. (Daniel 2:44; Mateus 6:10) Jehova ota ka longitha Uukwaniilwa we a hanagule po Satana Omuhindadhi. (Aaroma 16:20) Uukwaniilwa mboka otawu ka pangela uuyuni awuhe notawu ka hanagula po oongamba dhiilongo ndhoka dhe eta omatopoko. Aantu ayehe muuyuni otaya ka kala ya hangana. Kapu na we ngoka ta ka thiga po egumbo lye, molwaashoka Ombiimbeli oya uvaneka kutya: “Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we. Omuwa Omunankondoawike oku uvaneke shika.” — Mika 4:4.

 Uukwaniilwa waKalunga owo owala tawu vulu okukutha po thiluthilu omaupyakadhi ngoka hatu kala tu na kunena. Jehova ota ka longitha Uukwaniilwa we a kuthe po omaupyakadhi ngoka haga thiminike aantu ya ninge oontauki. Tala kiiholelwa yimwe tayi landula:

•   Iita. “[Jehova] ota hulitha po omalugodhi.” (Episalomi 46:9) Opo wu mone nkene Kalunga ta ka hulitha po omaupyakadhi, lesha oshitopolwa “Peace on Earth—How Will It Come?” (Ongiini kombanda yevi taku ka kala ku na ombili?)

•   Omathiminiko nomapiyagano. “[Jehova] ote ya hupitha methiminiko nomepiyagano.” (Episalomi 72:14) Opo wu uve ko nkene aantu taya vulu okulundulula iikala yawo iiwinayi mbyoka ya kala ye na ethimbo nuule, lesha iitopolwa mOshungolangelo yi na oshipalanyolo “Yanda uutondwe.”

•   Oluhepo. “[Jehova] ota hupitha ohepele ngo te mu lilile.” (Episalomi 72:12) Opo wu mone nkene Kalunga ta ka hulitha po iiyetithi yoluhepo, lesha oshitopolwa “Is a Fair Economic System Possible?” (Mbela eliko otali vulu ngaa okutopolwa shi thike pamwe muuyuni?)

•   Ondjala. “Moshilongo namu kale eloolo lyiilya.” (Episalomi 72:16) Opo wu mone nkene Kalunga ta ka hulitha po ondjala, lesha oshifo Penduka mo shi na oshipalanyolo “A World Without Hunger?” (Mbela muuyuni otamu vulu ngaa okukala kaamu na ondjala?)

 Mbela Ombiimbeli otayi vulu ngaa okukwathela oontauki kunena?

 Eeno. Kakele kekwatho ndyoka oontauki tadhi ka mona monakuyiwa, Ombiimbeli otayi vulu oku ya kwathela momaupyakadhi ngoka ye na ngashingeyi.

 Ekotampango lyOmbiimbeli: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni.” — Aafilippi 4:6, 7.

 Shoka tali ti: Pula Kalunga e ku pe ombili yokomwenyo noyopamadhiladhilo monkalo kehe to iyadha. Tala Oshitopolwa “Philippians 4:6, 7—‘Do Not Be Anxious About Anything.’” (Aafilippi 4:6, 7 — Inamu kala mu na nando oshimpwiyu shasha.)