Uuvidio mboka hatu tala poshigongi shoshitopolwa ohawu gumu omitima dhetu nohawu tu kwathele tu uve ko nawa omalongo gOmbiimbeli. Poshigongi shoshitopolwa shomo 2020, shi na oshipalanyolo: “Kaleni aluhe mwa nyanyukwa,” opwa li pwa dhanwa uuvidio 114, mwa kwatelwa iipopiwa 43, mbyoka ya gandjwa kiilyo yOlutuwiliki nosho wo kaakwatheli yawo. Mbela owu shi kutya ohashi pula iilonga niimaliwa yi thike peni, opo uuvidio mbono wu ningwe?

 Aamwatate naamwameme ye thike po 900 lwaampono, muuyuni auhe, oyi iyamba mokulongitha ethimbo nuunkulungu wawo ya kwathele miilonga yokuninga uuvidio. Oshe ya pula konyala oowili 100 000 momukokomoko gwomimvo mbali nasha, opo ye wu mane. Moowili ndhoka omwa kwatelwa wo oowili 70 000, ndhoka dha longithwa mokumana oshinyandwa shopaMbiimbeli shominute 76, shi na oshipalanyolo: Nehemia: ‘Enyanyu ndyoka Jehova ta gandja, nali mu kumike.’

 Osha yela kutya osha li sha pula iimaliwa oyindji, opo aaiyambi mboka ya vule okupewa iikulya nomahala gokukala nosho wo okulanda iikwaniipangitho ayihe mbyoka ya pumbwa ya vule okumanitha oshilonga shoka. Oya li wo ya pumbwa omahala gokunyandela nokuthanekela uuvidio.

 Omumwatate Jared Gossman ngoka ha longo mOshikondo shokukwata omawi nuuvidio okwa ti: “Okomitiye yOkulonga yOlutuwiliki oya hala okukala hayi kwatele mo aantu yomomihoko dhi ili nodhi ili nosho wo omahala ga yoolokathana muuvidio. Omolwashike mbela? Oshoka otu li aamwayinathana muuyuni auhe, noya hala shi kale shi iwetikile muuvidio wetu. Opo tu adhe elalakano ndyono, opu na oosipana 24, miilongo 11, ndhoka hadhi longele kumwe mokukwata uuvidio. Otwa li twa pumbwa oshimaliwa sha gwana, okulongekidha iinima yetu nawa nokuunganeka aantu ya longele kumwe miilongo yi ili noyi ili.”

 Opo uuvidio wetu owundji wu vule okukwatwa, ohatu kala twa pumbwa iilongitho yi ikalekelwa nosho wo omahala. Pashiholelwa, oshinyandwa Nehemia: ‘Enyanyu ndyoka Jehova ta gandja, nali mu kumike,’ osha li sha dhanenwa meni lyostudio ya-Mt. Ebo, ndjoka yi li popepi noPatterson, moAmerika. Opo tu kwate nawa oshimaliwa nokushilipaleka kutya oshinyandwa oshu ukila ko thiluthilu kehokololo ndyoka li li mOmbiimbeli, aamwatate oya li ya tungu omakuma omapu ngoka taga monika ga fa gaJerusalem shonale. Ekuma kehe olya li li na uule woometa 6, e tali gwayekwa opainda ya fa omamanya. Ekuma kehe olya li tali vulu okwiinyengithwa nuupu, opo oshinyandwa shi kale sha fa sha dhanenwa pomahala ga yoolokathana. Opo oshinyandwa ashihe shi pwe, osha pula konyala oshimaliwa sha konda poodola dhaNamibia omiliyona 1.6. a

 Okutseya uuyelele mboka kombinga yoshigongi shoshitopolwa, otashi tu kwathele tu kale tu na olupandu lela. Otu na einekelo kutya oonkambadhala adhihe ndhoka dha ningwa moku e ta po oshigongi shoka, otadhi simanekitha edhina lyaJehova muuyuni awuhe. Otwa pandula kOmayambidhidho giilonga yomuuyuni awuhe, ngoka ho gandja okupitila mepandja lyetu, ko-donate.pr418.com nosho wo momikalo dhilwe.