MuMaalitsa 2020, sho Ehangano lyUundjolowele mUuyuni lya tseyitha kutya omukithi gwoKorona ogwi ihanena uuyuni awuhe, aantu oyendji kaya li ya dhiladhila kutya otagu ka kala ko uule wethimbo li vulithe pomumvo gumwe. Aantu omamiliyona, mwa kwatelwa wo nOonzapo dhaJehova dhimwe, oya gumwa palutu, pamadhiladhilo nopamahupilo komukithi ngoka. Mbela Oonzapo dhaJehova odha unganeke ngiini noku ga gandja omakwatho pethimbo ndika edhigu?

 Okomitiye yAaunganeki yOlutuwiliki lwOonzapo dhaJehova oya gandja elombwelo pu totwe Ookomitiye dhOkuunganeka Omakwatho dhi vulithe po 950 muuyuni awuhe, opo dhi vule okugandja ekwatho omolwomukithi gwoKorona. Poompito dhimwe, oya ningi omalongekidho opo aamwatate yomoshitopolwa ya gandje omakwatho, omanga poompito dhilwe Oonzapo odha li dha mono ekwatho okuza kepangelo. Ookomitiye dhOkuunganeka Omakwatho odha ningi wo omalongekidho, opo aamwatate yokiitopolwa yilwe ya kwathele.

 Pashiholelwa, natu taleni kwaashoka sha li sha ningwa moParagwai. Oshifokundaneki shimwe osha popi kutya omolwomukithi gwoKorona, eliko lyoshilongo olya gwa pevi naantu oyendji moParagwai kaye na iikulya ya gwana. Ihe Okomitiye yOkuunganeka Omakwatho oya adhika nale ya tameka okwaandjaganeka iikulya, iilongitho yokwoopaleka noothewa. Iinima mbyoka otayi vulu okugwana uukwanegumbo waantu yane uule wiiwike iyali noya kotha oondola dhaNamibia 452 lwaampo.

 Aakwatheli mokomitiye ndjoka ohayi igamene ngiini nosho wo yalwe, opo kaaya kwatwe komukithi gwoKorona? Ohaya kala ya zala uumaska wawo nohayi ikala kokule. Ohaya shilipaleke wo kutya omahangano ngoka haga eta iikulya, oge yi longekidhila momahala ga yela nohaga landula thiluthilu omilandu dhokwiigamena. Shika osha kwatela mo okushilipaleka kutya ayehe mboka haya ungaunga niikwatha oya lombwelwa ya zale iinima yokwiigamena, ya opaleke oohauto dhawo nawa nokupungula iikwatha mbyoka mehala mwa opalekwa nawa. Mboka haye yi fala ohaya kaleke po wo oshinano pokati kawo naamboka haye yi yakula.

 Okuza muJanuali 2021, Okomitiye yAaunganeki oya li ya gandja epitikilo opo oondola dhaNamibia dhi vulithe 374 250 000 dhi longithwe mokulanda iikwatha pethimbo ndika lyomukithi gwoKorona. Iitayimbelewa nosho wo Ookomitiye dhOkuunganeka Omakwatho ohadhi longitha nawa iimaliwa mbyoka nohadhi longo nuudhiginini opo dhi lande iinima mbyoka ya pumbiwa kombiliha. Pashiholelwa, aamwatate yokoChile mboka haya unganeke iikwatha, oya li ya hala okulanda omakunde gookilohalama 750. Ihe ondando yago oya li ya londo pombanda noonkondo muule owala womwedhi. Konima yoowili mbali sho ya zimine oku ga landa nonando oge na ondilo, omulandithi okwe ya tseyithile kutya omulandi gumwe okwa galula omakunde ngoka a li a landa. Onkee pehala lyokulanditha aamwatate omakunde ngoka gondilo, omulandithi okwa tokola e ya landithe ngoka ga galulwa kombiliha.

 Sho aamwatate ya ka tala ko omakunde, omulandithi ka li a hala oku ge ya pa nokwa li te ya lundile kutya ihaya hawaleke iikulya momukalo gu uka, ngaashi omahangano gamwe haga ningi. Aamwatate oya galikana paufupi, nokonima gumwe gwomuyo okwa lombwele omulandithi kutya oya ninga nale omakonakono ya mone kutya oolye ya pumbwa unene ekwatho megongalo kehe. Aamwatate oye mu yelithile wo kutya molwaashoka mboka taya pewa iikwatha oya za momaputuko ga yoolokathana, iikwatha oyu unganekwa momukalo ngoka tagu vulu okukwathela mboka taye yi pewa. Oya li wo ya shilipaleke omulandithi kutya omayambidhidho ngoka haga gandjwa ogehalo ewanawa niilonga mbyoka hayi longwa kOonzapo dhaJehova oyeiyambo. Omulandithi okwa li a kumwa shili nokwa zimine a landithe aamwatate omakunde kombiliha. Sho ya ka landa kuye oshikando sha ka landula ko, okwa li wo e ya gwedhele ko omakunde ge thike pookilohalama 400.

 Omumwameme Lusu ngoka omukokele noku li omuselekadhi, oha zi koLiberia pamwe naanegumbo ye yatano. Ongula yimwe sho taya li oshuumbululwa notaya lesha enyolo lyesiku, omutekulu gwe gwomimvo heyali okwa mono kutya megumbo kamu na we iikulya. Okwa pula a ti: “Otatu li shike?” Lusu okwe mu shilipaleke kutya okwa galikana nale kombinga yasho noku na uushili kutya Jehova ote ke ya sila oshimpwiyu. Omutenya gwesiku ndyoka, Lusu okwa li a dhengelwa kaakuluntugongalo a ka tale iikulya. Okwa popi a ti: “Omutekulu gwandje okwa ti kutya ngashingeyi oku shi kutya Jehova oha uvu noha yamukula omagalikano, oshoka okwa yamukula lyandje.”

 Omukiintu gumwe gwokOrepablika yoPaudemokoli yaKongo oku li uushiinda nuukwanegumbo wumwe wOonzapo. Konima sho a mono aanegumbo mboka ye etelwa iikulya kooitaali ooyakwawo, okwa ti: “Ngele omukithi nguka ogwa hulu, otatu ka ninga Oonzapo dhaJehova, molwaashoka oya sila oshimpwiyu ooitaali ooyakwawo pethimbo ndika edhigu.” Omusamane gwe okwe mu pula a ti: “Oto ka ninga Onzapo yaJehova omolwa owala okashako kolwiishi?” Okwa yamukula a ti: “Aaye, ihe okashako hoka otaka ulike kutya oye na ohole yashili.”

 Oonzapo dhaJehova odha vula okukwathela aamwatate naamwameme nziya pethimbo lyomukithi nguka, omolwomayambidhidho geni gehalo ewanawa. Otwa pandula komayambidhidho geni ngoka hamu gandja okupitila momikalo dha yoolokathana ndhoka dhi li ko-donate.pr418.com.