Oopelesenda dhi vulithe po 60 dhaatoloki ihadhi longele koshitayimbelewa, ihe omoombelewa dhokutoloka ndhoka dhi li miitopolwa yadho. Omolwashike elongekidho ndyoka ewanawa? Aatoloki oya pumbwa iikwaniipangitho yini, opo ya vule okugwanitha po iilonga yawo nawa? Sho ye li miitopolwa moka hamu popiwa elaka lyawo, ohashi hwepopaleke ngiini ongushu yokutoloka?

 Oombelewa dhokutolokela ohadhi shi ningi oshipu, opo aatoloki ya kale haya zi miitopolwa moka mu na aantu oyendji haya popi elaka ndyoka haya toloka. Karin ngoka ha toloka elaka lyOshilow German okwa ti: “Okuza ngaa sho twa tembukile kombelewa yokutoloka koCuauhtémoc Chihuahua, moMeksiko, otwa kala hatu popi aluhe Oshilow German naatoloki ooyakwetu, uuna tatu uvitha nokuli nongele twa ya koositola. Ngashingeyi otu li mokati kaantu mboka haya popi elaka lyetu. Ohatu uvu omipopyofano nomayeletumbulo ngoka twe etha nale nohatu kambadhala okulongitha omautumbulilo ngoka aantu haya longitha sho taya popi.”

 James ngoka ha longo kombelewa yokutoloka Oshifrafra koGhana, okwa ti kutya omathimbo gamwe oha kala a yuulukwa uukwanegumbo waBetel wokoshitayimbelewa. Ihe okwa gwedha ko a ti: “Ondi hole okulongela kombelewa yokutoloka. Ngele tandi uvitha melaka evalelwamo nosho wo okumona nkene aantu tayi inyenge konkundana ombwanawa, ohashi nyanyudha ndje noonkondo.”

 Aamwatate ohaya tokola ngiini kutya ombelewa yokutoloka otayi ka kala peni? Omumwatate Joseph, ngoka ha longo kOshikondo shokuthaneka omatungo nokutunga muuyuni awuhe, koWarwick, moAmerika, okwa ti: “Omashongo gamwe ngoka hatu tsakaneke ogo kutya miitopolwa yimwe kamu na olusheno, omeya nosho wo ointaneta yi shi okwiinekelwa, iinima mbyoka aatoloki ya pumbwa, opo ya longe nuupu. Onkee ano, manga inaatu tokola mpoka ombelewa yokutoloka tayi ka kala, ohatu tala komahala gi ili nogi ili, hoka elaka hali popiwa.”

 Paulelalela ohashi kala oshipu noshi na ombiliha, okutunga ombelewa yokutoloka pOshinyanga shIigongi, pOshinyanga shUukwaniilwa nenge pegumbo lyaatumwa, opo aatoloki ya vule okukala haya ka longa ko taya zi komagumbo. Nongele kapu na omahala ngoka, aamwatate ohaya pewa epitikilo ya lande uufuleta moka taya kala haya zi nehala lyombelewa, moka taya kala haya longele. Ngele ombelewa yokutoloka inayi pumbiwa mo we mehala mono, otayi vulu okulandithwa po nuupu, oshimaliwa e tashi longithwa mpoka sha pumbiwa noonkondo.

 Momukokomoko gwomumvo gwiilonga 2020, otwa li twa longitha oodola dhaNamibia dhi vulithe pomamiliyona 192, opo iilonga koombelewa dhokutoloka yi pule komeho. Aatoloki moombelewa dhetu dhokutoloka oya pumbwa ookompiuta, oopolohalama dhomookompiuta (software), iilongitho yokukwata omawi, ointaneta nosho wo iinima yilwe. Pashiholelwa, okompiuta niikwaniipangitho yayo yi ihwa po, otashi vulika yi kothe N$11 000 lwaampo. Mookompiuta ohamu tulwa oopolohalama dhi ili nodhi ili nosho wo opolohalama ndjoka hayi ithanwa Watchtower Translation System, ndjoka hayi kwathele aatoloki yu unganeke iilonga yawo nokuninga omapekapeko nuupu.

 Moombelewa dhaatoloki omu na wo iikwaniipangitho yokukwata omawi. Iikwaniipangitho mbyoka oyi li ekwatho enene, molwaashoka sho omukithi gwekomba gwa tukuluka muuyuni, aatoloki oya li ya vulu okuya nayo komagumbo, notaya tsikile oku yi longitha sho taya toloka nokukwata omawi.

 Olundji aaiyambi yomoshitopolwa ohaya kwathele mokuleshulula iileshomwa nosho wo okukaleka oombelewa dhokutoloka monkalo ombwanawa. Cirstin, ngoka ha longo kombelewa yokutoloka Oshiafrikaans, kOkapa, moSouth Afrika, okwa ti: “Aauvithi oyendji nosho wo aakokolindjila yondjigilile oye na ompito yokulongitha uunkulungu wawo miilonga moka.”

 Aaiyambi mboka ohaya nyanyukilwa uuthembahenda mboka. Omumwameme gumwe ngoka ha kwathele kombelewa yimwe yokutoloka okwa ti kutya “okulonga koombelewa dhokutoloka ito shi pewa lwaali.” Aamwatate naamwameme yamwe yomoshitopolwa ohayi iyamba ya kwatwe omawi. Juana, omutoloki gwelaka lyOshitotonac, koshilando Veracruz, moMeksiko, okwa ti: “Sho oombelewa dhokutoloka dhi li popepi noondoolopa moka elaka lyetu hali popiwa kaantu oyendji, oshipu kaamwatate naamwameme oyendji okuya kombelewa yokutoloka, ya ka kwatwe omawi.”

 Mbela oombelewa dhokutoloka odha hwepopaleka ngaa ongushu yokutoloka? Aaleshi yetu oyendji oya ti eeno. Cédric, ngoka ha longo pamwe nosipana yokutoloka Oshikongo, mOrepablika yoPaudemokoli yaKongo, okwa ti: “Aamwatate naamwameme yamwe oya li hayi ithana iileshomwa mbyoka twa toloka ‘Oshikongo shehangano lyoWatch Tower,’ molwaashoka katwa li hatu toloka momukalo moka aantu haye shi popi. Ihe ngashingeyi ohaya ti kutya iileshomwa yetu ohayi tolokwa mOshikongo shoka hashi popiwa kunena.”

 Andile, ngoka ha longo pamwe nosipana yokutoloka Oshixhosa moSouth Afrika naye oku uva omupopyo gwa faathana. Okwa ti: “Aantu oyendji ohaye tu lombwele kutya oya ndhindhilika elunduluko mokutoloka kwetu. Nokuli naanona mboka ya li haya lesha Oshungolangelo mOshiingilisa, ngashingeyi ohaye yi lesha mOshixhosa. Oye hole unene omukalo gu li paunshitwe moka Ombiimbeli ya pepalekwa yo-New World Translation ya tolokwa.”

Oofuto adhihe ndhoka dhi na ko nasha nokutunga, okukaleka oombelewa dhokutoloka monkalo ombwanawa nosho wo okushilipaleka kutya iilonga otayi pula komeho, ohadhi futwa nomayambidhidho giilonga yomuuyuni awuhe, mwa kwatelwa ngoka haga gandjwa okupitila kepandja lyokointaneta, ko-donate.pr418.com.