Oonzapo dhaJehova odhi na ko nasha lela nooitaali ooyakwawo. (1 Petrus 2:17) Oyendji yomutse ohatu kala tu uvite ngaashi omumwameme Tannis gwomoKenya. Okwa ti: “Ondi hole okuuva kutya aamwatate naamwameme muuyuni awuhe oye li po ngiini.” Ohashi ende ngiini, opo omumwameme Tannis nosho wo Oonzapo dhilwe omamiliyona dhi uve nkene aamwahe muuyuni ye li po? Okuza 2013, otwa kala hatu shi ningi okupitila mOshitopolwa shoonkundana, shoka hashi kala kepandja jw.org.

 Uuyelele wu shi okwiinekelwa kombinga yOonzapo dhaJehova wu na ko nasha nOombiimbeli ndhoka opo dha tolokwa, okugandja iikwatha, iilonga yokutunga nosho wo wiiningwanima yilwe ya simana, otawu adhika kOshitopolwa shoonkundana. Ohatu adha ko uuyelele kombinga yaamwatate naamwameme mboka ye li moondholongo omolweitaalo lyawo. Oku na wo iimoniwa tayi tsu omukumo ya pamba iikonga yetu yokuuvitha nosho wo uuyelele kombinga yEdhimbuluko. Ohashi ende ngiini uuyelele mbono wu gongelwe, noolye haye wu longekidha?

 Oshikondo shOshitopolwa shoonkundana ohashi wilikwa kOmbelewa yokugandja omauyelele. Oshikondo shoka oshi li koombelewa dhetu oonene muuyuni nohashi longo kohi yewiliko lyOkomitiye yOkuunganeka yOlutuwiliki. MOmbelewa yokugandja omauyelele omu na aamwatate naamwameme ya konda pe 100. Oyendji yomuyo aaiyambi mboka haya longo ye li komahala gawo. Muyo omwa kwatelwa aanyoli, aakongi yomauyelele, aaningi yiikwamathano nosho wo aatoloki. Yamwe ohaya ka konga omauyelele kaanambelewa yomapangelo, kiiputudhilo yelongo nokiikundaneki. Ombelewa yokugandja omauyelele ohayi kwathelwa kaaiyambi ya konda po 80, mboka haya longo mOshikondo shokugandja uuyelele miitayimbelewa yi ili noyi ili muuyuni.

 Oshikondo shOmbelewa yokugandja omauyelele nosho wo Oshikondo shokugandja uuyelele ohayi longele kumwe, opo yi longekidhe oonkundana. Ngele aamwatate ya mono ehokololo ye li panda, ohaya ningi omapekapeko kombinga yalyo noku ka konga uuyelele wu li paushili mboka we li pamba. Uuyelele mbono ohaye wu mono mokupulapula nomokupopya naamboka ye na ontseyo mulyo. Uuna ya gongele uuyelele awuhe, Oshitopolwa shoonkundana ohashi nyolwa, e tashi talululwa, tashi leshululwa, tapu ningwa omathano, opo ihe tashi tumwa nawa kOkomitiye yAaunganeki, yi gandje epitikilo.

 Oonzapo dhaJehova ohadhi kala dhi uvitile ngiini uuyelele mboka hawu kala mOshitopolwa shoonkundana? Omumwameme Cheryl, gwokoFilipine, ota ti: “Ongulonene ngele nda penduka, ohandi lesha oonkundana kombinga yehangano lyaJehova noshigwana she.”

 Aaleshi oyendji ohaya popi kutya opu na eyooloko pokati kiikundaneki yilwe nosho wo nOshitopolwa shoonkundana shoka shi li kepandja jw.org. Omukiintu gwedhina, Tatiana, a za koKazakhstan, okwa ti: “Ohandi pandula nondi inekela oonkundana ndhoka dhi li kepandja jw.org. Odhi shi okwiinekelwa nodhi li paushili.” Omumwameme Alma, gwokoMeksiko okwa ti: “KOshitopolwa shoonkundana ohaku kala iinima tayi tsu omukumo, inaayi fa iinima iiwinayi mbyoka hayi popiwa esiku nesiku miikundaneki.”

 Oshitopolwa shoonkundana oshi shi okwiinekelwa notashi koleke lela eitaalo lyetu. Omumwatate Bernard, gwomoKenya okwa ti: “Oshitopolwa shoonkundana osha kwathela ndje ndi kale nda tala ko aamwatate naamwameme muuyuni awuhe ya fa yaandjetu kutya nduno oye li peni. Ohandi ya tumbula komadhina uuna tandi galikana, tandi popi oonkalo moka ye li.” Omumwameme Bybron, gwomoKenya okwa ti: “Ohandi kala nda nyanyukwa uuna tandi lesha oshitopolwa shoka tashi popi kombinga yOombiimbeli ndhoka dha pita momalaka gi ili nogi ili. Iitopolwa mbyoka ohayi kwathele ndje ndi mone kutya Jehova aantu ayehe ohe ya tala ye thike pamwe.”

 Oonkundana kombinga yaamwatate mboka taya hepekwa otadhi vulu oku tu tsa omukumo. Omumwameme Jackline, gwomoKenya okwa ti: “Uulaadhi wawo owa koleka eitaalo lyandje. Onde shi mona kutya iinima ngaashi egalikano, okulesha Ombiimbeli nosho wo okwiimba, ohayi dhana onkandangala mokukwathela aamwatate ya kale neitaalo lya kola.”

 Omumwameme Beatriz, gwomoKosta Rika oku hole okulesha oonkundana kombinga yiiponga yopaunshitwe. Ota ti: “Oshitopolwa shoonkundana ohashi kwathele ndje ndi mone nkene ehangano lyetu hali katuka nziya, li yambidhidhe aamwatate momukalo omuwanawa. Shono osha tompa ndje ndi mone kutya ndika ehangano lyaJehova.”

 Otwa pandula noonkondo sho hatu pewa uuyelele wu li pethimbo, wu na ko nasha naamwatate muuyuni awuhe. Andola otwa li ihaatu pewa omayambidhidho giilonga yomuuyuni awuhe okupitila kepandja donate.pr418.com, nena ando ihatu vulu okugandja uuyelele awuhe mboka. Otwa pandula omayambidhidho goye gehalo ewanawa.