Tala koohapu tadhi landula e to yamukula omapulo.

1. Oohapu dhini tadhi holola uukwatya waakadhona mboka haya ulikwa olundji moomuvi, kotiivii nomiifo?

2. Oohapu dhini tadhi holola uukwatya mboka wa hala wu kale wu na?

Otashi vulika eyamukulo kepulo lyotango we li kutha mokakololo 1, omanga eyamukulo etiyali we li kutha mokakololo 2. Ngele osho, otashi ti kutya ino hala okukala wa fa aagundjuka mboka haya ulikwa unene moomuvi, kotiivii nomiifo. Opu na aagundjuka oyendji mboka nayo inaaya hala okukala ye ya fa. Natu taleni kutya omolwashike.

“Aakadhona yoomvula omulongo nasha mboka haya ulikwa moomuvi ihaya vulika, yo oye na omikalo omiwinayi. Ohaye tu ningitha atuhe tu kale twa fa kaatu shi okwiinekelwa, tu ihole tse yene nohatu ningi okaupyakadhi kehe okashona enima enenenene.” — Erin.

“Aakadhona yoomvula omulongo nasha mboka haya ulikwa moomuvi nokotiivii oya pwila mokwiiyopaleka, miikutu, maamati, ya hala aluhe ando oyo owala ya talika noya hala ando oyo owala ye holike kukehe gumwe.” — Natalie.

“Moomuvi ito adha mo naanaa omukadhona ‘a nuka po’ ihaa nu, ihaa lala naamati nenge ha vulika kaakuluntu ye. Ngele owa adha omukadhona itaa ningi iinima mbyoka, nena oha popiwa kutya okwa pwila mongeleka, okwi ishi unene uukriste nenge okwi ishi uuyuuki.” — Maria.

Ipula ngeyi: ‘Mbela omukalo moka handi zala, handi popi neihumbato lyandje otayi ulike kutya otandi yelekele owala aantu yokotiivii noyomiifo, nenge osho ngaa ndi li lela?’

• Oyendji ohaya dhiladhila kutya ohayi ihumbata ngaashi ye li lela, ihe nani otaya yelekele owala aantu mboka haya mono kotiivii nomiifo. Omukadhona gumwe gwedhina Karen ota ti: “Ohandi shi mono nomokamwameme. Ohaki iningitha ka fa kaake na ko nasha niinima yilwe, kakele kaamati niikutu. Ondi shi kutya oke na oondunge noke hole okuninga iinima yilwe, ihe ohaki iningitha ka fa okagoya, opo ka kale anuwa ka fa ‘uukadhona uukwawo.’ Ko opo owala ke na oomvula 12.”

  Ombiimbeli otayi ti: “Inamu faathana nonkalo yuuyuni mbuka.” — Aaroma 12:2.

• Aakadhona yamwe inaya hala okukala ya fa mboka haya ulikwa kotiivii nomoomuvi. Alexis ngoka e na oomvula 15, ota ti: “Aakadhona yomoomuvi oyi ihole yo yene, kaye na ko nasha nohaya ningi iinima yopakanona. Ihe ondi wete kutya oyendji yomutse otu na ngaa oondunge hewa. Ihatu kala owala tatu dhiladhila kaamati esiku alihe.”

  Ombiimbeli otayi ti: “Iikulya ya kola oyaakuluntu, mboka yi ilonga noyi igilila okuyoolola shoka shu uka nenge sha puka.” — Aahebeli 5:14.

• Iinima mbyoka hayi ulikwa kotiivii nomiifo kayi lile po aakadhona, ihe otayi humitha komeho omalalakano gaalandithi. Oongeshefa oonene, ngaashi oongeshefa dhokunyanyangidha, dhiikutu, dhuuteknolohi naandhoka dhi na ko nasha nomainyanyudho, ohadhi kwata ko aagundjuka manga nokuli inaaya thika mepipi lyoomvula omulongo nasha, molwaashoka odhi shi shi kutya otamu vulu oku ya zila oshimaliwa. Embo 12 Going on 29 olya ti: “Aalandithi ohaya lombwele uunona mboka kaawu na natango oomvula 13 kutya ngele kawu na iikutu mbyoka yi li momoode, uumeikapa, iikwaelektronika nenge uutenda, uulyenge nosho tuu, itawu kala wu holike. Aanona mboka ohaya mono aluhe omatseyitho gopangeshefa ngoka tage ya halitha iipala, nomanga kaaye shi kutya omilalo oshike.”

  Ombiimbeli otayi ti: “Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.” — 1 Johannes 2:16.

Dhiladhila komapulo ngaka: Olye ha mono mo uuwanawa ngele owa lenga unene ehangano nenge ongeshefa yontumba? Olye hashi kwathele lela ngele owa landa ongodhi yopeke opo ye ya, opo wu kale wa hokiwa kuyakweni? Sho to tala, aalandithi ongoye ye lile po, nenge oye lile po owala uuwanawa wawo yene?

• Ino kala ho taamba ko iinima ayihe mbyoka hayi ulikwa moomuvi, kotiivii nomiifo. Sho to ende to koko, oho tameke okudhiladhila kiinima yilwe, ihe haambyoka owala wu wete. Kala ho dhiladhila kutya okuyelekela aantu mboka haya ulikwa moomuvi, kotiivii nomiifo, otashi ka guma ngiini onkalamwenyo yoye. Alana, e na oomvula 14 ota ti: “Aakadhona mboka haya ulikwa moomuvi nomiifo, ohaya kala yi intampeka omeikapa noya zala nayi. Ihe aakadhona oyendji yoomvula omulongo nasha ihaya dhiladhila kutya shoka ihashi ya ningitha ya kale taya monika nawa, ihe ohashi ya ningitha owala ya kale ya fa tayi iyulike.”

• Itulila po omalalakano kutya ngoye owa hala wu kale omuntu a tya ngiini. Pashiholelwa, dhiladhila kuukwatya mboka wa hogolola petameko lyoshileshwa shika mboka wa hala aantu ya kale ye ku shile. Omolwashike itoo kambadhala okukala wu na uukwatya mboka nenge oku wu hwepopaleka? Ombiimbeli otayi ti: “[Zaleni] omuntu omupe. Kalunga ota shitulula aluhe omuntu nguka omupe mune, a fe ondjelo yomushiti gwe,” ihe handjelo ndjoka hayi humithwa komeho kaahalithi. — Aakolossa 3:10.

• Yelekela mboka ye na omikalo omiwanawa. Otashi vulika mboka ye na omikalo omiwanawa ya kale yaandjeni, ngaashi meme gwoye nenge memegona gwoye. Otashi vulika yamwe ookahewa koye nenge aashiwikile mboka ye na oondunge. Megongalo lyOonzapo dhaJehova omu na aakiintu Aakriste oyendji mboka to vulu okuholela. — Titus 2:3-5.

Eetopo: Longitha embo Natu holeleni eitaalo lyawo wu ilonge kombinga yaakiintu aanandunge mboka ya popiwa mOmbiimbeli mboka to vulu okuholela. Aakiintu mbaka ongaashi, Rut, Hanna, Abigajil, Ester, Maria naMarta. Embo Natu holeleni eitaalo lyawo olya nyanyangidhwa kOonzapo dhaJehova noto vulu oku li adha ko-jw.org/ng.