Uutumbulilo “Alfa naOmega” otawu ulike kuJehova Kalunga, Omunankondoawike. Uutumbulilo mboka owa holoka mo lutatu mOmbiimbeli. — Ehololo 1:8; 21:6; 22:13. *

Ondanda A (alfa) nosho wo O (omega) odho dhi li petameko nopehulilo lyoalfabeta yOshigreka, elaka ndyoka lya li lya longithwa mokunyola oshitopolwa shOmbiimbeli shoka hashi ithanwa Etestamendi Epe, moka mwa kwatelwa embo lyEhololo. Oondanda ndhoka dhi li petameko nopehulilo lyoalfabeta yOshigreka, odha longithwa opo dhi ulike kutya Jehova oye awike etameko nehulilo. (Ehololo 21:6) Okuza monakuziwa okwa kala Kalunga Omunankondoawike nota tsikile okukala Kalunga Omunankondoawike sigo aluhe. Oye awike Kalunga ngoka ‘a kala ko nota kala aluhe sigo aluhe.’ — Episalomi 90:2.

Ombiimbeli oya longitha uutumbulilo mboka ya ukitha kuJehova Kalunga nokOmwana Jesus, ihe otawu gandja omaityo ga yoolokathana. Tala kiiholelwa iyali.

• MuJesaja 44:6, Jehova ota ti: “Ongame omutango nongame omuhugunini. Kaku na we Kalunga ponto yandje.” Movelise ndjoka, Jehova ota tsu omuthindo kutya oye awike Kalunga kashili ngoka ta kala ko sigo aluhe nokaku na we gulwe. (Deuteronomium 4:35, 39) Pompito ndjika, uutumbululo “omutango nomuhugunini” owu na eityo lya faathana nuutumbulilo “Alfa naOmega.”

• Shimwe ishewe, uutumbulilo “Omutango [pro’tos, ihe kawu shi alfa] nOmuhugunini [e’skha·tos, ihe kawu shi omega]” owa longithwa mEhololo 1:17, 18 nosho wo 2:8. Moovelise ndhoka, otamu popiwa omuntu ngoka a si nokonima e ta yumudhwa. Onkee ano, oovelise ndhoka itadhi popi Kalunga, molwaashoka ke na esiku a sile. (Habakuk 1:12) Ihe Jesus okwa li a si e ta yumudhwa. (Iilonga 3:13-15) Oye omuntu gwotango a yumudhilwa omwenyo gwomegulu, moka e li ngashingeyi “sigo aluhe.” (Ehololo 1:18; Aakolossa 1:18) Okuza mpono, Jesus oye a kala ta yumudha mboka ye na etegameno lyomegulu. (Johannes 6:40, 44) Onkee ano, oye gwahugunina a yumudhwa kuJehova shu ukilila. (Iilonga 10:40) Meityo ndyoka, Jesus ota vulu okwiithanwa “Omutango nOmuhugunini.”

Aawe. Ngoka ta popi mEhololo 22:13 ina popiwa kedhina, nomontopolwa ndjika omu na aapopi yi ili noyi ili. Omuprofesoli William Barclay okwa nyola a ti: “[Montopolwa ndjika] iinima inayi nyolwa melandulathano, . . . nolundji ohashi kala oshidhigu okumona kutya olye lela ta popi.” (The Revelation of John, embo 2, ndyoka lya nyolululwa, epandja 223) Onkee ano, “Alfa naOmega” ngoka a popiwa mEhololo 22:13, otaku vulu okutiwa Omuntu ngoka a popiwa moovelise dhilwe mEhololo, ano Jehova Kalunga.