Eeno, molwaashoka Kalunga okwa hala aantu ya gongale pamwe, opo ye mu longele. Ombiimbeli otayi ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa.” — Aahebeli 10:24, 25.

Jesus oku ulika kutya aalanduli ye otaya ka tota po ongundu yu unganekwa nawa, sho e ya lombwele a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:35) Omukalo gwa simana moka tatu vulu okuulika ohole, omokukala tatu endathana nooitaali ooyakwetu tu li aalongwa yaKristus. Oyu unganekwa nawa momagongalo moka haya gongala pandjigilile, opo ya longele Kalunga. (1 Aakorinto 16:19) Kungawo, ohaya kala ye li aamwayinathana muuyuni awuhe. — 1 Petrus 2:17.

Owa pumbwa okuninga oshindji kaashi shi owala okukala wu li melongelokalunga lyontumba

Nonando Ombiimbeli otayi ulike kutya otu na okukala hatu gongala pamwe tu longele Kalunga, itayi longo nando kutya omuntu ota vulu owala okunyanyudha Kalunga, ngele oku li oshilyo shelongelokalunga. Opo omuntu a kale a hokiwa kuKalunga, elongelokalunga lye oli na okukala lya nwetha mo onkalamwenyo ye yesiku kehe. Pashiholelwa, Ombiimbeli oya ti: “Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.” — Jakob 1:27.