Hasho nando, Ombiimbeli itayi longo kutya evi olya mbatalala. * Ombiimbeli kayi shi embo lyuunongononi. Natango mOmbiimbeli kamu na shoka tashi kondjithathana nuunongononi. Ombiimbeli otayi ti owala kutya “oya kola sigo aluhe.” — Episalomi 111:8.

•  Ombiimbeli oya hala okutya shike sho ya popi “koombinga adhihe dhevi?”

•  Ondiapoli oya li ya makele Jesus kombinga yashike?

Uutumbulilo “koombinga adhihe dhevi” nosho wo “sigo okooha dhuuyuni” kawu na okuuviwa ko wu li ngaashi wa popiwa mOmbiimbeli, ando evi lya shitwa li na mpa lya hulila. (Jesaja 11:12; Job 37:3) Pehala lyaashoka, uutumbulilo mbuka wu li molupe lwomupopyothano otawu ulike kevi alihe. Ombiimbeli oya popya oombinga ne dhokompasa momukalo gwa faathana. — Lukas 13:29.

Uutumbulilo mboka wa tolokwa “koombinga” nenge “kooha” otawu monika wa fa omupopyothano ngoka gwa za koshitya “omawawa.” Embo lyedhina The International Standard Bible Encyclopedia olya ti kutya “molwaashoka okadhila ohaka longitha omawawa gako ka siikile uudhilona wako, [oshitya shika shOshihebeli]” otashi ulike koshinima sha tuwalala sha pwa ko.” Embo olyo tuu ndyoka olya gwedha ko lya ti kutya muJob 37:3 nosho wo muJesaja 11:12 “uutumbulilo kooha nenge koombinga dhevi otawu ulike kevi alihe.” *

Opo a makele Jesus “Omuhindadhi okwa fala ishewe Jesus kondundu ondeendeka e te mu ulukile omapangelo agehe gomuuyuni nomasimano gago.” (Mateus 4:8) Aantu yamwe ohaya ti kutya ehokololo ndika lyOmbiimbeli otali longo kutya uuyuni awuhe ohawu monikila mokumbatalala kwevi. Onkee ano, ‘ondundu ondeendeka’ mehokololo ndika otayi monika ya fa omupopyothano, kayi shi ondundu yo yeneyene. Natu tale kutya omolwashike ehulithodhiladhilo ndika li li pandjela.

• Kaku na ondundu ya tya ngaaka shili kombanda yevi hoka to vulu okumonena ko omapangelo agehe yomuuyuni.

• Ondiapoli kaya li owala yu ulukile Jesus omapagelo, ihe “nomasimano gago” wo. Uuyelele wa tya ngaaka ihawu vulu okumonikila kokule, onkee ano, otashi monika sha fa shi li ngeyi kutya Ondiyapoli oya li ya longitha emoniko lyontumba, opo yu ulukile Jesus iinima mbika. Shika otashi vulika shi fe omuntu ta longitha okashina koproject nosikilina, opo u ulukile gumwe omathano gomahala ga yoolokathana kombanda yevi.

• Ehokololo lya fa ndyoka li li muLukas 4:5 otali ti kutya Ondiapoli oyu ulukile Jesus “iilongo ayihe yomuuyuni mepathimo limwe,” oshinima shoka omuntu itaa vulu okumona nomeho gomutse. Onkee ano, shika otashi ulike kutya Satana ka li a ulukile Jesus iilongo mbyoka yo yeneyene, ihe okwe mu makele momukalo gwontumba.