Aawe. Ombiimbeli inayi tya iimaliwa oyo uuwinayi nenge kutya oyo hayi etitha uuwinayi awuhe nenge uukolokoshi awuhe. Uutumbulilo “iimaliwa oyo ekota lyuuwinayi awuhe” inawu ihwa po notawu kondjithathana naashoka Ombiimbeli tayi ti. Ombiimbeli oya ti kutya ‘mohole yiimaliwa omo tamu zi uukolokoshi auhe.’ — 1 Timoteus 6:10.

•  Ombiimbeli otayi ti ngiini kombinga yiimaliwa?

•  Omolwashike Ombiimbeli tayi londodha kombinga yohole yiimaliwa?

•  Ongiini tatu vulu okumona mo uuwanawa momayele gOmbiimbeli ge na ko nasha niimaliwa?

•  Omanyolo ngoka taga popi kombinga yiimaliwa

Ombiimbeli oya popya kutya iimaliwa ngele oya longithwa pandunge, otayi vulu okukala ekwatho enene nenge nokuli “egameno.” (Omuuvithi 7:12) Shimwe ishewe, Ombiimbeli otayi pandula mboka haya gandja kuyalwe omagano, mwa kwatelwa nogiimaliwa. — Omayeletumbulo 11:25.

Pethimbo opo tuu mpoka, Ombiimbeli otayi londodha mboka ya pititha komeho iimaliwa monkalamwenyo. Otayi ti: “Mokukala kweni inamu mangwa kohole yeliko, ihe kaleni mwa gwana naashoka mu na.” (Aahebeli 13:5) Oshiilongomwa osho shika kutya otu na okulongitha iimaliwa pandjele, ihe haku lalakanena eliko. Pehala lyaashono, otu na okukala twa gwanenwa kiinima mbyoka lela twa pumbwa, ngaashi iikulya, oonguwo nehala lyokukala. — 1 Timoteus 6:8.

Aanalwiho itaya ka mona omwenyo gwaaluhe. (Aaefeso 5:5) Etompelo limwe olyo kutya olwiho olu li omukalo gwokulongela iikalunga nenge elongelokalunga lyiifundja. (Aakolossa 3:5) Etompelo ekwawo, olyo kutya uuna omunalwiho ta kambadhala okuninga shoka a hala, oha yono omakotampango gopaMbiimbeli. Omayeletumbulo 28:20 otayi ti: “Ngoka a pya ompiya okuninga omuyamba, ita kala inaa geelwa.” Aanalwiho otashi vulika nokuli ya yelekwe ya yone sha kwata miiti ngaashi okuningila aantu omatilitho, oku ya yuga koonkondo, oku ya kengelela, oku ya kwata po ombambyona nenge oku ya dhipaga.

Nonando ohole yokuhola iimaliwa ihayi ningitha gumwe a kale e na eihumbato ewinayi, otayi vulu oku mu etela iilanduliko yilwe iiwinayi. Ombiimbeli otayi ti kutya “mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya.” — 1 Timoteus 6:9.

Kalunga ota ka kala e tu hokwa note ke tu kwathela, ngele otwa kala kaatu li ompinge niinima mbyoka tu shi kutya oyu uka notayi mu nyanyudha. Kombinga yaamboka haye mu nyanyudha, okwe yu uvanekela a ti: “Itandi ku etha nando; itandi ku thigi po.” (Aahebeli 13:5, 6) Okwe tu shilipaleka wo kutya “omuntu omwiinekelwa ota yambekwa unene.” — Omayeletumbulo 28:20.