“Jerusalem oshipe,” uutumbulilo mboka wa holoka lwaali mOmbiimbeli, oshilando shopathaneko shoka shi lile po ongundu yaalanduli yaJesus mboka taya yi megulu ya ka pangele pamwe naye mUukwaniilwa waKalunga. (Ehololo 3:12; 21:2) Ombiimbeli otayi ulike wo kutya ongundu ndjika otayi vulu okwiithanwa omufuko gwaKristus.

1. Jerusalem oshipe oshi li megulu. Pompito kehe Ombiimbeli ya popya Jerusalem oshipe, oye shi popya tashi kuluka tashi zi megulu, moka aayengeli ya langela omiyelo dhasho. (Ehololo 3:12; 21:2, 10, 12) Natango, uunene woshilando shoka otawu ulike kutya itashi vulu okukala kombanda yevi. Oshi thike “puupale wetanga 12 000” nenge “oshinano” shoometa 201.1. * (Ehololo 21:16; King James Version) Oshi na uule wu thike lwopookilometa 560 okuya mombanda.

2. Jerusalem oshipe, osha thikama po mongundu yaalanduli yaJesus, ano omufuko gwaKristus. Jerusalem oshipe ohashi ithanwa “omufuko omukiintu gwOnzigona.” (Ehololo 21:9, 10) Muutumbulilo mbuka wopathaneko, Onzigona, oJesus Kristus. (Johannes 1:29; Ehololo 5:12) “Omukiintu gwOnzigona,” omufuko gwaKristus, ota thaneke Aakriste mboka taya ka hangana naJesus megulu. Ombiimbeli oya faathanitha ekwatathano ndyoka li li pokati kaJesus nAakriste mboka, kutya olya fa lyomusamane nomukulukadhi. (2 Aakorinto 11:2; Aaefeso 5:23-25) Shimwe ishewe, Jerusalem oshipe osha tungilwa komamanya kwa nyolwa “omadhina gaayapostoli yOnzigona omulongo nayaali.” (Ehololo 21:14) Uuyelele mbuka otawu tu kwathele tu mone kutya Jerusalem oshipe oshike, molwaashoka Aakriste mboka taya ka kala nomwenyo megulu oya “tungilwa kekankameno hoka ku na aayapostoli naahunganeki.” — Aaefeso 2:20.

3. Jerusalem oshipe oshitopolwa shepangelo lyontumba. Jerusalem shonale osha li oshilandopangelo shaIsraeli, ehala moka omukwaniilwa David, omwanamati Salomo noluvalo lwawo lwa li lwa pangele “koshipangelapundi shoka sha tulwa po kOmuwa.” (1  Ondjalulo 29:23) Jerusalem oshipe, ohashi ithanwa ‘oshilando oshiyapuki,’ shoka tashi thaneke epangelo lyaKalunga okuza mezimo lyaDavid. (Nehemia 11:1) Natango, Jerusalem oshipe ohashi ithanwa ‘oshilando oshiyapuki,’ shoka sha thikama po mwaamboka taya ka kala naJesus megulu “notaa ka pangela kombanda yevi.” — Ehololo 5:9, 10; 21:2.

4. Jerusalem oshipe otashi ke etela aantu omayambeko kombanda yevi. Jerusalem oshipe otashi popiwa “tashi kuluka tashi zi megulu kuKalunga,” shoka tashi ulike kutya Kalunga ohe shi longitha u ukithe iinima kombanda yevi. (Ehololo 21:2) Uutumbulilo mbuka owa kwatakanitha Jerusalem oshipenUukwaniilwa waKalunga, mboka Kalunga ha longitha, opo a gwanithe po ehalo lye “kombanda yevi ngaashi megulu.” (Mateus 6:10) Elalakano lyaKalunga li na ko nasha naantu kombanda yevi, olya kwatela mo omayambeko ngaka:

   • Okukutha po uulunde. “Omulonga gwomeya gomwenyo” otagu kunguluka okuza muJerusalem oshipe” notagu gandja omeya ‘komiti dhomwenyo’ ndhoka tadhi ‘aludha aantu.’ (Ehololo 22:1, 2) Ealudho ndika lyopalutu nolyopambepo otali ka kutha pouulunde notali ningitha aantu ya ka vule okumona omwenyo gwaaluhe, ngaashi lya li elalakano lyaKalunga lyopetameko. — Aaroma 8:21.

   • Ekwatathano ewanawa pokati kaKalunga naantu. Uulunde owa topola ko aantu kuKalunga. (Jesaja 59:2) Uulunde ngele wa kuthwa po, ehunganeko ndika otali ka gwanithwa po thiluthilu: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo”. — Ehololo 21:3.

   • Okumona iihuna neso otayi ka hula po. Okupitila mUukwaniilwa we, Kalunga “ota ka theta omahodhi agehe momeho gawo. Oko noitaku ka kala we eso, oluhodhi, elilo nenge uuwehame.” — Ehololo 21:4.