Poompito odhindji, Ombiimbeli otayi ithana Jesus “Omuna gwaKalunga.” (Johannes 1:49) Uutumbulilo “Omuna gwaKalunga,” otawu ulike kutya Kalunga oye Omushiti nenge Onzo yomwenyo kehe, mwa kwatelwa nogwaJesus. (Episalomi 36:9; Ehololo 4:11) Ombiimbeli itayi longo kutya Kalunga okwa ningi he yaJesus momukalo moka aantu haya mono aanona.

Ombiimbeli otayi ithana wo aayengeli ye li “aana yaKalunga.” (Job 1:6, OB-1954) Ombiimbeli otayi ithana natango omuntu gwotango, Adam, kutya ‘oAdam yaKalunga.’ (Lukas 3:38) Nonando ongawo, molwaashoka Jesus oye oshishitwa shotango noye owala a shitwa meukililo kuKalunga, Ombiimbeli otayi popi Jesus oye Omuna gwaKalunga gwotango.

•  Mbela Jesus okwa li a kala megulu, omanga inee ya kombanda yevi e li omuntu?

•  Jesus okwa li ha ningi shike, omanga inee ya kombanda yevi?

Eeno. Jesus okwa li oshishitwa shopambepo megulu, omanga inaa valwa e li omuntu kombanda yevi. Jesus ye mwene okwa ti: “Ngame onda za megulu.” — Johannes 6:38; 8:23.

Kalunga okwa shiti Jesus tango, omanga inaa shita iinima yilwe. Ombiimbeli otayi popi shi na ko nasha naJesus, tayi ti:

• “Oye omutango gwiishitwa ayihe noku li kombanda yiishitwa ayihe.” — Aakolossa 1:15.

• ‘Oye ekota lyiishitwa ayihe yaKalunga.’ — Ehololo 3:14.

Jesus okwa gwanitha po ehunganeko kombinga yaangoka a popiwa “gwomezimo lya za koohekulululwa yomuuyuni wonale.” — Mika 5:2; Mateus 2:4-6.

Okwa li e na ondondo ya simana megulu. Jesus okwa li a popi shi na ko nasha nondondo ndjoka, sho a galikana a ti: “Tate, adhimitha ndje . . . neadhimo olyo tuu ndyoka nda li ndi na pungoye, uuyuni manga inaau shitwa.” — Johannes 17:5.

Okwa li a kwathele He, mokushita iinima yilwe ayihe. Jesus okwa li a longo pamwe naKalunga e li “engomba.” (Omayeletumbulo 8:30) Ombiimbeli otayi popi shi na ko nasha naJesus, tayi ti: “Kalunga okwa shititha Kristus iinima ayihe yomegulu noyokombanda yevi.” — Aakolossa 1:16.

Kalunga okwa li a longitha Jesus, a shite iinima ayihe yilwe. Iinima mbyoka oya kwatela mo iishitwa yilwe yopambepo nosho wo mbyoka hayi monika. (Ehololo 5:11) Oku shi faathanitha, ekwatathano ndyoka lya li pokati kaKalunga naJesus, olya fa ndyoka hali kala pokati komuthaneki gwomatungo nomutungi. Omuthaneki gwomatungo oha thaneke kutya etungo otali ka kala ngiini, omanga omutungi he li tungu paulelalela.

Okwa li Ohapu. Ombiimbeli otayi ithana Jesus “Ohapu,” uuna tayi popi etameko lyonkalamwenyo ye. (Johannes 1:1) Shika osha hala okutya, Kalunga okwa li a longitha Omwana a gandje omauyelele nomalombwelo kiishitwa yilwe yopambepo.

Osha fa shi li ngeyi kutya Jesus okwa li wo Omupopikalelipo gwaKalunga, ngoka ha fala omalombwelo ge kaantu kombanda yevi. Kalunga otashi vulika a li a popi okupitila muJesus ngoka e li Ohapu, sho a gandja omalombwelo kuAdam naEva, moshikunino shaEden. (Genesis 2:16, 17) Otashi vulika Jesus oye a li omuyengeli ngoka a li a wilike oshigwana shonale shaIsraeli mombuga, nonokutya oye gwewi ndyoka Aaisraeli ya li ye na okuvulika kulyo. — Eksodus 23:20-23. *