Mbela iinamwenyo ohayi yi megulu?
Shoka Ombiimbeli tayi ti
Ombiimbeli otayi longo kutya miishitwa ayihe kombanda yevi, aantu owala yomwaalu gwa ngambekwa taya yi megulu. (Ehololo 14:1, 3) Otaya yi mo ya ka pangele pamwe naJesus, ye li aakwaniilwa naayambi. (Lukas 22:28-30; Ehololo 5:9, 10) Aantu oyendji otaya ka yumudhwa ya ka kale nomwenyo moparadisa kombanda yevi. — Episalomi 37:11, 29.
MOmbiimbeli inamu popiwa kutya iinamwenyo ohayi yi megulu, omolwetompelo ewanawa. Iinamwenyo itayi vulu okukatuka oonkatu ndhoka dha pumbiwa, opo yi kale ya gwana ‘okwiithanwa kuKalunga’ nenge tu tye okukala neithano lyomegulu. (Aahebeli 3:1) Oonkatu ndhoka odha kwatela mo okukala nontseyo, neitaalo nokuvulika kiipango yaKalunga. (Mateus 19:17; Johannes 3:16; 17:3) Aantu oyo owala ya shitwa nelalakano lyokukala nomwenyo sigo aluhe. — Genesis 2:16, 17; 3:22, 23.
Opo oshishitwa shokombanda yevi shi ye megulu, oshi na tango okuyumudhwa. (1 Aakorinto 15:42) MOmbiimbeli omwa popiwa omayumuko ogendji. (1 Aakwaniilwa 17:17-24; 2 Aakwaniilwa 4:32-37; 13:20, 21; Lukas 7:11-15; 8:41, 42, 49-56; Johannes 11:38-44; Iilonga 9:36-42; 20:7-12) Nonando ongawo, omayukumuko agehe ngoka ogaantu, ihe hagiinamwenyo.
Mbela iinamwenyo oyi na omwenyo?
Aawe. Ombiimbeli otayi kutya iinamwenyo naantu oye li omwenyo. (Numeri 31:28) Sho omuntu gwotango, Adam, a shitwa, ka li a pewa omwenyo, ihe okwa “ningi omunamwenyo.” (Genesis 2:7) Omwenyo ogwa thikama po miinima iyali: “ontsi yevi” nosho wo “ombepo yomwenyo.”
Mbela omwenyo ohagu si?
Eeno, Ombiimbeli otayi longo kutya omwenyo ohagu si. (Levitikus 21:11; Hesekiel 18:20) Aantu niinamwenyo ngele ya si, ohaya shuna montsi yevi. (Omuuvithi 3:19, 20) Niitya yimwe, ihapu hupu sha shi na omwenyo. *
Mbela iinamwenyo ohayi yono?
Aawe. Okuyona otashi ti okudhiladhila, okukala wu uvite nenge okuninga oshinima shoka shi li ompinge nomithikampango dhaKalunga. Opo oshishitwa shi yone, oshi na okukala hashi vulu okuninga omatokolo, ihe iinamwenyo kayi na uuthembahenda mboka. Ohayi katuka shi ikolelela pamukalo gwayo gwiinamwenyo, monkalamwenyo yayo ndjoka ya ngambekwa. (2 Petrus 2:12) Mokweendela ko kwethimbo ohayi si, nonando ihayi yono.
Mbela osha taambiwa ko iinamwenyo yi ungaungiwe nayo nonyanya?
Aawe. Kalunga okwa pa aantu uuthemba wokupangela iinamwenyo, ihe haku ungaunga nayo nonyanya. (Genesis 1:28; Episalomi 8:6-8) Kalunga oku na ko nasha nonkalonawa yoshinamwenyo kehe, mwa kwatelwa noyuudhila uushona. (Jona 4:11; Mateus 10:29) Okwa lombwela mboka haye mu longele yu ungaunge nawa niinamwenyo. — Eksodus 23:12; Deuteronomium 25:4; Omayeletumbulo 12:10.
^ okat. 5 Opo wu mone uuyelele owundji, tala ontopolwa 6 yembo Ombiimbeli otayi tu longo shike?
Opu na ishewe uuyelele mbuka
“Kandi uvite we kutya onda pumbwa okweeta elunduluko muuyuni”
Ombiimbeli oya kwathele ngiini gumwe ngoka a li a hala okweeta elunduluko muuyuni a mone shoka tashi ka eta iinima kondjila?
KOMBINGA YETU
Pula ekonakonombiimbeli
Kundathaneneni epulo lyopaMbiimbeli nenge wu ilonge oshindji kombinga yOonzapo dhaJehova.