Eeno. MOmbiimbeli omu na lela uumbangi mboka tawu ulike kutya Kalunga oko e li. Otayi tu ladhipike tu kale tu na eitaalo muKalunga, mokulongitha ‘omadhiladhilo’ getu nosho wo “oondunge,” ihe hamokwiitaala owala mwaashoka omalongelokalunga taga ti. (Aaroma 12:1; 1 Johannes 5:20, OB-1954) Tala komatompelo taga landula ga kankamena kOmbiimbeli:

• Okuunganekwa nawa kweshito, otaku ulike kutya oku na Omushiti. Ombiimbeli otayi ti: “Egumbo kehe oli na omutungi gwalyo, ihe ngoka a tungu ayihe, oKalunga.” (Aahebeli 3:4) Nonando etompelo ndyoka otali monika lyanathangwa, aalongwantu oyendji oya popya kutya otali ti sha lela. *

• Tu li aantu, ohatu kala twa hala okuuva ko eityo lyonkalamwenyo nosho wo elalakano lyayo. Nonando otu gwanithe po oompumbwe dhetu dhopalutu, oshinima shoka ohashi kala oshidhigu okuuva ko. Shika oshi li oshitopolwa ‘shompumbwe yetu yopambepo’ ndjoka ya popiwa mOmbiimbeli, ndjoka ya kwatela mo okukala nehalo lyokutseya Kalunga noku mu longela. (Mateus 5:3, NW; Ehololo 4:11) Ompumbwe ndjoka itayi gandja owala uumbangi kutya Kalunga oko e li, ihe otayi ulike wo kutya oku li Omushiti omunahole ngoka a hala okugwanitha po ompumbwe yetu yopambepo. — Mateus 4:4.

• Uuyelele wu na ko nasha nomahunganeko ngoka ga nyolwa mOmbiimbeli, owa nyolwa omathelemimvo dha ka pita notawu gwanithwa po naanaa ngaashi sha hunganekwa. Uuyelele womondjila wu na ko nasha nomahunganeko ngoka, otawu ulike lela kutya owa za konzo yi na oonkondo dhi vule dhopantu. — 2 Petrus 1:21.

• Aanyoli yOmbiimbeli oya li ya nyola kombinga yuunongononi, oshinima shoka kaasha li nando oshipu kuyo okuuva ko. Pashiholelwa, pethimbo lyonale aantu oyendji oya li yi itaala kutya evi otali ambidhidhwa kiinamwenyo, ngaashi kondjamba, kompinda nenge konani. Mepingathano naashoka, Ombiimbeli otayi tu lombwele kutya Kalunga okwa “tula evi powalawala.” (Job 26:7) Sha faathana, Ombiimbeli oya popya shi na ko nasha nomutungilo gwevi kutya oli li ‘ongonga.’ (Omayeletumbulo 8:31) Aantu oyendji oyu uvite kutya uuyelele mboka wa yela nawa wa nyolwa kaanyoli yOmbiimbeli, owa za shili kuKalunga.

• Ombiimbeli oya yamukula omapulo ogendji omadhigu, ngoka tashi vulika ga ningitha omuntu kii itaale muKalunga, ngele ina mona omayamukulo taga mbilipaleke. Pashiholelwa: Ngele Kalunga omunahole nomunankondoawike, omolwashike e etha muuyuni mu kale okumona iihuna nuukolokoshi? Omolwashike omalongelokalunga olundji haga hwahwameke aantu ya longe uuwinayi pehala lyokulonga uuwanawa? — Titus 1:16.