Oto vulu okutseya kalunga mokwiilonga kombinga ye nomokuninga iinima mbyoka tayi mu nyanyudha. Opo nduno Kalunga ‘nota hedha kungoye.’ (Jakob 4:8) Ombiimbeli otayi tu shilipaleke kutya Kalunga “ke li kokule nomuntu nando ogumwe.” — Iilonga 17:27.

•  Oshike tu na okuninga opo tu tseye Kalunga?

•  Omitotolombo kombinga yokutseya Kalunga

Lesha Ombiimbeli

• Ombiimbeli otayi ti: “Enyolo kehe olya nyolithwa kOmbepo yaKalunga.” — 2 Timoteus 3:16.

• Shoka tali ti: Kalunga oye Omunyoli gwOmbiimbeli. Okwa li a wilike aanyoli yOmbiimbeli ya nyole omadhiladhilo ge. Okupitila membo ndika li ikalekelwa, Kalunga okwa holola elalakano lye li na ko nasha natse. Okwa holola wo puuyelele omaukwatya ge ngaashi ohole, uuyuuki nohenda. — Eksodus 34:6; Deuteronomium 32:4.

• Shoka to vulu okuninga: Lesha Ombiimbeli esiku kehe. (Josua 1:8) Sho to lesha ipula ngeyi: ‘Shika otashi longo ndje shike kombinga yaKalunga e li omuntu.’ — Episalomi 77:12.

  Pashiholelwa lesha Jeremia 29:11, e to ipula ngeyi: ‘Mbela Kalunga okwa halela ndje shike, elago nenge omupya? Mbela oKalunga omukwanyanya nenge okwa halela ndje onakuyiwa ombwanawa?’

Konakona eshito

• Ombiimbeli otayi ti: “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti.” — Aaroma 1:20.

• Shoka tali ti: Eshito lyaKalunga ndyoka tu wete otali holola oshindji kombinga yuukwatya we, ngaashi owala iilonga yomuthaneki hayi holola oshindji kombinga ye nenge ngaashi owala eshina ndyoka lya kitakana tali vulu okuholola oshindji kombinga yomulongi gwalyo. Natu tale kiinima mbika: Uuluyi womuntu mboka wa shitwa momukalo gwa kitakana otawu holola uunongo waKalunga, omanga okutala nkene ha pangele oonkondo dhetango nosho wo oonyothi, otaku holola oonkondo dhe. — Episalomi 104:24; Jesaja 40:26.

• Shoka to vulu okuninga: Kutha ethimbo wu konakone nowu ilonge kombinga yeshito. Sho to shi ningi ipula ngeyi, ‘Iinima iikumithi mbyoka ndi wete meshito otayi holola shike kombinga yaKalunga?’ * Odhoshili kutya meshito omu na iinima oyindji mbyoka itaayi vulu oku tu lombwela kombinga yOmushiti, nomolwaasho e tu pe Ombiimbeli.

Longitha edhina lyaKalunga

• Ombiimbeli otayi ti: “Otandi gamene mboka ye shi kutya ongame Omuwa. Uuna taa ithana ndje, otandi ya yamukula.” — Episalomi 91:14, 15.

• Shoka tali ti: Kalunga ngoka edhina lye Jehova, oha gandja eitulomo li ikalekelwa kumboka ye shi edhina lye nohaye li longitha nesimaneko. * (Episalomi 83:18; Maleaki 3:16) Kalunga okwe tu lombwela kutya oye lye moku tu tseyithila edhina lye. Okwa ti: “Ongame Jehova. Ndyoka olyo edhina lyandje.” — Jesaja 42:8, NW.

• Shoka to vulu okuninga: Longitha edhina Jehova uuna to popi kombinga ye.

Popya naJehova megalikano

• Ombiimbeli otayi ti: “Omuwa oku li popepi naayehe mboka taye mu ithana.” — Episalomi 145:18.

• Shoka tali ti: Jehova oha hedha popepi naamboka taye mu galikana ye na eitaalo. Egalikano olyo omukalo gumwe moka tatu vulu okulongela Kalunga nesimaneko.

• Shoka to vulu okuninga: Galikana kuKalunga aluhe. (1 Aatessalonika 5:17) Mu lombwela iimpwiyu yoye nosho wo nkene wu uvite. — Episalomi 62:8. *

Kala wi itaala muKalunga

• Ombiimbeli otayi ti: “Kape na ngoka ta hokiwa kuKalunga, ngele ke na eitaalo.” — Aahebeli 11:6.

• Shoka tali ti: Opo tu hedhe popepi naKalunga, otu na okukala tu na eitaalo muye. PaMbiimbeli, okukala wu na eitaalo osha kwatela mo oshindji, kaashi shi owala okukala wi itaala kutya Kalunga oko e li. Otashi ti wo kutya owu na okukala wi inekelela thiluthilu momauvaneko ge nokukala wu shi kutya omithikampango dhe odhi li mondjila. Opo wu kale wu na uukuume nomuntu gwontumba, owu na okukala we mu inekela.

• Shoka to vulu okuninga: Eitaalo lya shili oli ikolelela kontseyo. (Aaroma 10:17) Onkee ano, konakona Ombiimbeli nokuulika kutya owi inekelela Kalunga nosho wo omayele ge. Oonzapo dhaJehova otadhi ka kala dha nyanyukwa okukonakona Ombiimbeli nangoye. *

Ninga shoka tashi nyanyudha Kalunga

• Ombiimbeli otayi ti: “Oshoka ohole yokuhola Kalunga oyo okuvulika kiipango ye.” — 1 Johannes 5:3.

• Shoka tali ti: Jehova oha hedha kwaamboka ye mu hole notaya ningi ngaashi taya vulu ya vulike kiipango ye.

• Shoka to vulu okuninga: Sho to konakona Ombiimbeli, ndhindhilika shoka Kalunga e hole naashoka e tonde. Ipula to ti: ‘Omalunduluko geni tandi vulu okuninga, opo ndi nyanyudhe Omushiti gwandje?’ — 1 Aatessalonika 4:1.

Mona nkene Kalunga e na ko nasha nangoye mokutula miilonga omayele ge

• Ombiimbeli otayi ti: “Konakona mwene, u mone, nkene Omuwa omwaanawa.” — Episalomi 34:8.

• Shoka tali ti: Kalunga ote ku hiya wu mone mwene nkene omwaanawa. Uuna wa mono nkene e ku hole note ku ambidhidha, oto ka kala wa hala okuhedha popepi naye.

• Shoka to vulu okuninga: Sho to lesha Ombiimbeli, tula miilonga omayele gaKalunga, noto ka mona uuwanawa mboka hawu zi moku shi ninga. (Jesaja 48:17, 18) Tala wo kiiholelwa yoohandimwe mboka ya sinda omashongo, ya hwepopaleka oonkalamwenyo dhawo nodhomaukwanegumbo gawo noya mona enyanyu lyashili kekwatho lyaKalunga. *

Omutotolombo: Itatu vulu okutseya Kalunga, molwaashoka iha monika.

Oshili: Iinima yimwe kombinga yaKalunga iidhigu okuuviwa ko, ngaashi kutya iha monika, oshoka oku li omuntu gwopambepo. Nonando ongawo, otatu vulu oku mu tseya. Ombiimbeli otayi ti kutya otwa pumbwa oku mu tseya, opo tu ka mone omwenyo gwaaluhe. (Johannes 17:3) Ombiimbeli oya longitha omautumbulilo ngoka tatu vulu okuuva ko, opo yi tu lombwele kombinga yOmushiti gwetu, yi tu hololele omaukwatya ge, elalakano lye li na ko nasha naantu, nevi nosho wo omithikampango dhe. (Jesaja 45:18, 19; 1 Timoteus 2:4) Ngaashi sha popiwa metetekelo, Ombiimbeli oya holola wo edhina lyaKalunga. (Eksodus 15:2, 3, OB-1954) Shoka otashi tu ulukile kutya otatu vulu okutseya Kalunga nokuhedha popepi naye. — Jakob 4:8.