MOmbiimbeli kamu na uuyelele wokondandalunde wu na ko nasha nokufika po omidhimba. Kamu na oshipango shi na ko nasha nokufumvika nenge nokufika omidhimba.

MOmbiimbeli omu na iiholelwa yaapiya aadhiginini yaKalunga mboka ya li ya fumvike oonakusa yawo. Pashiholelwa, Abraham okwa li a ningi oonkambadhala a konge nokuli nehala lya gamenwa lyokufumvika omukulukadhi gwe, Sara. — Genesis 23:2-20; 49:29-32.

Ombiimbeli oya tumbula wo yamwe mboka ya li aadhiginini, mboka ya fike po omidhimba dhoonakusa yawo. Pashiholelwa, sho omukwaniilwa gwaIsraeli, Saul, noyanamati yatatu ya li ya dhipagelwa molugodhi, omidhimba dhawo odha li dha thigwa moshitopolwa shaatondi yawo noyu ungaunga nadho nayi. Sho aakwiita aadhiginini Aaisraeli ye shi uvu, oya ka tala ko omudhimba gwaSaul nodhoyanamati, noye dhi fike po, naashoka sha hupu po oye shi fumvike. (1 Samuel 31:8-13) Ombiimbeli oyu ulika kutya omukalo ngoka ya li yu ungaunga nomidhimba ndhoka ogwa li gwa taambiwa ko. — 2 Samuel 2:4-6.

Euvoko lya puka: Okufika po omudhimba gwomuntu otashi mu imbi a ka yumudhwe kuKalunga.

Oshili: Kashi na nduno mbudhi kutya omuntu okwa fumvikwa, okwa fikwa po, okwa kanena mefuta nenge okwa li ka po kiilikama, Kalunga ota vulu owala oku mu yumudha. (Ehololo 20:13) Omunankondoawike ita nyengwa okushitila omuntu olutu olupe. — 1 Aakorinto 15:35, 38.