Ombiimbeli otayi ti kutya okugeya sha pitilila okwa nika oshiponga kungoka a geya nokwaamboka ye li puye. (Omayeletumbulo 29:22) Nonando haaluhe hashi kala sha puka okukala wa geya, Ombiimbeli otayi ti kutya mboka haya “geelathana” nenge haya geye sha pitilila itaya ka hupithwa. (Aagalati 5:19-21) MOmbiimbeli omu na omakotampango ngoka taga vulu okukwathela omuntu a kale ihaa geye unene.

•  Okugeya okwa puka aluhe?

•  Uunake okugeya haku kala kwa puka?

•  Oshike tashi tu kwathele tu pangele ongeyo?

•  Oovelise dhOmbiimbeli ndhoka tadhi popi kombinga yokugeya

Aawe. Inashi puka okugeya poompito dhimwe. Pashiholelwa, omulumentu omudhiginini gwedhina Nehemia okwa li a “geye” sho u uvu kutya aalongelikalunga ooyakwawo oya li taya thindilwa kongudhi. — Nehemia 5:6.

Omathimbo gamwe, Kalunga naye oha geye. Pashiholelwa, sho oshigwana she shonale sha teya euvaneko lyasho lyoku mu longela oye awike e tashi tameke okulongela iikalunga, Ombiimbeli otayi ti: “Omuwa nokwa pindjile Aaisraeli.” (Aatokolihapu 2:13, 14) Nonando ongawo, ongeyo hayo uukwatya wa dhenga mbanda waJehova Kalunga. Oha geye aluhe pauyuuki nohe shi ningi neipangelo. — Eksodus 34:6; Jesaja 48:9.

Okugeya ohaku kala owala kwa puka ngele inaaku pangelwa nenge kaaku li pauyuuki. Aantu olundji ohaya geye omolwuulunde mboka ya thigulula. Pashiholelwa:

• Kain okwa li a “geye” noonkondo sho Kalunga a li inaa hokwa eyambo lye. Kain okwe etha ongeyo ndjoka yi pindjile sigo a dhipaga omumwayina. — Genesis 4:3-8.

• Omuhunganeki Jona naye okwa li a “geye” noonkondo sho Kalunga a sile Aaninive ohenda. Kalunga okwa li e mu pukulula e te mu lombwele kutya ‘okugeya kwe kaku li mondjila.’ Okwa li wo e mu lombwele u ulukile olukeno Aaninive mboka yi itedhulula. — Jona 3:10–4:1, 4, 11. *

Iiholelwa mbika otayi ulike kutya kaantu aalunde, “ondjahi yomuntu ihayi longo shoka shu uka koshipala shaKalunga.” — Jakob 1:20.

• Kaleka momadhiladhilo kutya okugeya sha pitilila okwa nika oshiponga. Aantu yamwe ohaya dhiladhila kutya okuulika kutya oya geya, osho tashi ulike kutya oye na oonkondo. Ihe paushili wo wene, omuntu ngoka ihaa pangele ongeyo ye, oku na uunkundi wa kwata miiti. Ombiimbeli otayi ti: “Omulumentu kee shi kwiidhidhimika, okwa fa oshilando sha teka po shaa na edhingililokuma.” (Omayeletumbulo 25:28; 29:11) Mepingathano naashoka, ngele otwa kala hatu pangele ongeyo yetu, otatu ku ulika kutya katu shi aagoya nonokutya otu na oondunge. (Omayeletumbulo 14:29) Ombiimbeli otayi ti: “Omutalanteni oku vule ofule.” — Omayeletumbulo 16:32.

• Ilonga okupangela ongeyo yoye manga inaayi ku ningitha wu ninge oshinima shoka to ki ipa uusama musho. Episalomi 37:8 otali ti: “Ino iyethela moshimpwiyu nenge muugeyi; mbika ayihe otayi fala muupyakadhi.” Kala wu shi kutya uuna to hala okugeya, owu na aluhe ehogololo. Oto vulu okuhogolola wu kale inoo geya opo kuu ninge oshinima shoka tashi ku “fala muupyakadhi.” Aaefeso 4:26 otaya ti kutya “ngele tamu geye, inamu etha ondjahi yeni yi mu fale sigo omokuyona.”

• Ngele otashi vulika, inda kokule uuna wu uvite kutya owu li pokugeya. Ombiimbeli otayi ti: “Okutameka ondokosho okwa fa okupanuna omeya; onkee ano loteka oontamanana, manga inaadhi tukuka.” (Omayeletumbulo 17:14) Nonando oshi li pandunge okukandula po okwaauvathana naangoka mwa ningithana naye nayi, amuhe omwa pumbwa okungungumana tango, opo nee tamu kundathana nawa uupyakadhi mboka wa holoka po.

•  Konga uuyelele awuhe. Omayeletumbulo 19:11 otaga ti: “Oondunge dhomuntu otadhi mu ningi omunamutimahenda.” Otashi ka kala pandunge ngele otwa kongo uuyelele wi ihwa po, manga inaatu thika pehulithodhiladhilo. Ngele otwa pulakene nawa kehokololo alihe, itatu ka kala twa geya unene. — Jakob 1:19.

•  Galikana wu kale wu na ombili yopamadhiladhilo. Egalikano otali vulu oku ku kwathela wu mone ‘ombili yaKalunga, ndjoka yi vule uunongo auhe wopantu.’ (Aafilippi 4:7) Egalikano olyo omukalo gumwe moka tatu vulu okupewa ombepo ondjapuki yaKalunga, ndjoka tayi vulu oku tu kwathela tu kokeke omaukwatya ngaashi ombili, eidhidhimiko, uukuume neikwatonawa nenge eipangelo. — Lukas 11:13; Aagalati 5:22, 23.

• Hogolola ookuume koye pandunge. Olundji ohatu holele omaukwatya gaamboka hatu kala nayo unene. (Omayeletumbulo 13:20; 1 Aakorinto 15:33) Nomolwaashono Ombiimbeli tayi tu londodha tayi ti: “Ino endathana nomugeyentu, ngoye ino kala pamwe nomuntu omupwidhi.” Omolwashike mbela? “Otashi vulika oto igilile omapola gawo e to ilukilile omwigo.” — Omayeletumbulo 22:24, 25.