‘Okupopya omalaka’ otaku ulike koshikumithalonga shoka sha li sha kwathele Aakriste yopetameko ya popye omalaka ngoka inaayi ilonga. (Iilonga 10:46) Oya li yu uvitiwike nawa kaantu mboka ya tseya omalaka ngoka taya popi. (Iilonga 2:4-8) Kalunga okwa li a pe yamwe yomAakriste mboka ya li ko omimvo 2 000 nasha dha ka pita omagano gokupopya omalaka, kekwatho lyombepo ondjapuki. — Aahebeli 2:4; 1 Aakorinto 12:4, 30.

•  Okupopya omalaka okwa li kwa tamekele peni nuunake?

•  Elalakano lyokupopya omalaka olya li lyashike?

•  Mbela okwa li taku ka kalelela?

•  Okwa li kwa hulu uunake?

•  Mbela aantu otaya vulu ngaa okupopya omalaka kunena ngaashi nale?

•  Oshike tashi ulike kutya Aakriste yashili oyenipo?

Oshikumithalonga shika osha li sha ningwa tango muJerusalem ethimbo lyongula, mesiku lyOshituthi shAajuda shoPentekoste mo 33 E.N. Aalongwa yaJesus 120 lwaampono oya li ya gongala pamwe sho ‘ayehe yu udhithwa ihe Ombepo Ondjapuki e taa tameke okupopya omalaka omakwiilongo.’ (Iilonga 1:15; 2:1-4) Ongundu yaantu “ya za kiilongo ayihe yokombanda yevi” oya li ya gongala ‘noyu uvu ooitaali taa popi melaka lyaandjawo.’ — Iilonga 2:5, 6.

1. Okuulika kutya Kalunga oye ta kwathele Aakriste mboka. Pethimbo lyonale, Kalunga okwa li a longo iikumithalonga, opo u ulike kutya oye ta kwathele aapiya ye aadhiginini, ngaashi Moses. (Eksodus 4:1-9, 29-31; Numeri 17:10) Sha faathana, okupopya omalaka okwa li taku ulike kutya Kalunga oye a li ta kwathele egongalo lyopaKriste ndyoka opo lya totwa po. Omuyapostoli Paulus okwa nyola a ti: “Onkee ano omagano gokupopya omalaka gaa shiwike ogo endhindhiliko lyaamboka inaa itaala, halyaamboka yi itaala.” — 1 Aakorinto 14:22.

2. Okukwathela Aakriste yu uvithile aantu nawanawa. Mboka ya li yu uvu aalanduli yaJesus taya popi omalaka mesiku lyaPentekoste oya li ya ti: “Atuhe otu ya uvite taa popi iilonga iinene yaKalunga melaka lyetu.” (Iilonga 2:11) Shika otashi ulike kutya elalakano lya simana lyoshikumithalonga shoka olya li okukwathela Aakriste ya “tseyithile aantu ayehe” nenge ye ya uvithile nawanawa noya ‘ninge aantu ayehe aalongwa,’ ngaashi Jesus a li e ya lombwele. (Iilonga 10:42; Mateus 28:19) Konyala aantu 3 000 mboka ya mono oshikumithalonga shoka noya li yu uvithilwa, oya ningi aalongwa esiku ndyoka. — Iilonga 2:41.

Aawe. Omagano gombepo ondjapuki, mwa kwatelwa ngoka gokupopya omalaka, kaga li taga ka kalelela. Ombiimbeli oya hunganeke ya ti: “Okupopya elaka lyaKalunga itaku kala sigo aluhe, omagano gokupopya omalaka gaa shiwike itaga kala sigo aluhe.” — 1 Aakorinto 13:8.

Omagano gombepo ondjapuki oga li ga pewa Aakriste yalwe komeho gaayapostoli, nokuli olundji aayapostoli oyo ya li haya tenteke iikaha yawo kooitaali ooyakwawo. (Iilonga 8:18; 10:44-46) Osha fa shi li ngeyi kutya, mboka ya li ya pewa omagano gombepo ondjapuki kaayapostoli kaya li taya vulu oku ga pa yalwe. (Iilonga 8:5-7, 14-17) Natu shi thaneke ngeyi. Omuntu ngoka ha longo mepangelo ota vulu okugandja ombapila yokuhinga komuntu gwontumba. Ihe ngoka e yi pewa ke na uuthemba wopaveta wokupa omuntu gulwe ombapila yokuhinga. Otashi vulika okupopya omalaka kwa hulu sho aayapostoli ayehe ya si nosho wo mboka ya li ya pewa omagano ngoka kuyo.

Oshikumithalonga shokupopya omalaka osha li sha hulu pehulilo lyomumvo 100 E.N. Kapu na omuntu kunena ta vulu okupopya shili kutya ota vulu okupopya omalaka koonkondo dhaKalunga. *

Jesus okwa ti kutya ohole oyo tayi ku ulika kutya Aakriste yashili oyenipo. (Johannes 13:34, 35) Omuyapostoli Paulus okwa li a popi kutya ohole oyo tayi ka kala aluhe tayi ka ndhindhilikitha mo Aakriste yashili. (1 Aakorinto 13:1, 8) Okwa li u ulike kutya ombepo yaKalunga otayi ka kwathela Aakriste ya kokeke omaukwatya ngoka tagi ithanwa “iiyimati yOmbepo.” Uukwatya wotango mboka a li a tumbula owo ohole. — Aagalati 5:22, 23.