MOmbiimbeli inamu tumbulwa oo-dinosaur kondandalunde. Ihe otayi popi kutya Kalunga okwa “shiti iinima ayihe,” onkee osha yela kutya oo-dinosaur nadho odha li dhimwe dhomiinima mbyoka a shiti. * (Ehololo 4:11) Nonando oo-dinosaur inadhi tumbulwa mo mOmbiimbeli, oya popya iishitwa yimwe moka tashi vulika nadho dha li dha kwatelwa mo:

• “Iikwameya iinene,” nenge “omavukule.” — Genesis 1:21; New American Bible.

• “Iimuna ayihe niihono ayihe.” — Genesis 1:25.

• “Iiyamakuti ayihe.” — Genesis 1:25.

Mbela oo-dinosaur odhe enda tadhi lunduluka okuza kiinamwenyo yilwe?

Omasipa ngoka ga lafululwa otaga ulike kutya inadhi endela ko tadhi lunduluka okuza miinamwenyo iikwawo. Shoka oshi li metsokumwe noohapu ndhoka dhi li mOmbiimbeli tadhi ulike kutya Kalunga okwa shiti iinamwenyo ayihe. Pashiholelwa, Episalomi 146:6 otali ti kutya Kalunga oye “Omushiti gwegulu nogwevi, gwefuta noshaa shoka sha kala muyo.”

Oo-dinosaur odha li ko ethimbo lini?

Ombiimbeli otayi popi kutya efuta niinamwenyo yokevi oya shitwa mesiku etitano netihamano, nenge momathimbo gokushita. * (Genesis 1:20-25, 31) Onkee, Ombiimbeli otayi ulike kutya odha kala ko ethimbo ele.

Mbela Evukule neningamba Leviatan oya li oo-dinosaur?

Aawe. Nonando iinamwenyo mbika ya popiwa membo lyaJob itayi vulu okupopiwa lela kutya oshike, Evukule, ondjambameya; neningamba Leviatan, ongandu. Omadhina ngoka otaga opalele, oshoka Omanyolo oga popya uukwatya mboka tawu tsu kumwe nuukwatya wiinamwenyo mbyoka. (Job 40:15-23; 41:1, 14-17, 31) Onkee omadhina “Evukule” nosho wo “Leviatan” itashi vulika ku tiwe oo-dinosaur. Kalunga okwa li a lombwele Job a konakone iinamwenyo mboka paumwene, na Job okwa li a kala ko ethimbo ele konima yoo-dinosaur dha hula ko nale. — Job 40:16; 41:8.

Oshe ende ngiini oo-dinosaur kaadhi kale ko we?

Ombiimbeli inayi popya kutya oo-dinosaur odha hulu ko ngiini. Ihe, otayi popi kutya iinima ayihe oya shitwa ‘kehalo lyaKalunga.’ Osha yela kutya Kalunga okwa li a shiti oo-dinosaur nelalakano. (Ehololo 4:11) Sho elalakano ndyoka lya gwanithwa po, Kalunga okwe etha oo-dinosaur dhi hule ko.