Eeno. Kalunga oku na ko nasha naapiya ye mboka taya alukwa. Shi na ko nasha naapiya yaKalunga mboka aadhiginini, Ombiimbeli otayi ti: “Omuwa ote ya kwatha, uuna ye li muuvu note ya galulile uukolele wawo.” (Episalomi 41:3) Ngele oto kondjo nuuvu woshinamenena, iinima itatu tayi landula, otayi vulu oku ku kwathela wu ungaunge nawo:

1. Galikana wu pewe oonkondo dhokwiidhidhimika. Oto vulu okumona ‘ombili yaKalunga, ndjoka yi vule uunongo auhe wopantu,’ notayi vulu oku ku kwathela wu pule komeho nonando owu li muupyakadhi. — Aafilippi 4:6, 7.

2. Kala wu na etaloko ewanawa. Ombiimbeli otayi ti: “Omutima gwa nyanyukwa otagu eta uundjangandjele, ihe omwenyo gwa nyanyagulwa otagu thipula omasipa.” (Omayeletumbulo 17:22) Kala aluhe to ningi omashendjo, molwaashoka itashi ka pupaleka owala omutenge gwoye, ihe otashi ka hwepopaleka wo uukolele woye.

3. Kala wu na einekelo momauvaneko gaKalunga. Etegameno ewanawa lyonakuyiwa otali vulu oku ku kwathela wu kale wa nyanyukwa, nokuli nonando oto kondjo nomukithi ngoka omudhigu. (Aaroma 12:12) Ombiimbeli oya hunganeka kutya otapu ka kala ethimbo ndyoka ‘kaapu na nando ogumwe ta ka tya: “Otandi ehama.”’ (Jesaja 33:24) Kalunga ota ka aludha uuvu woshinamenena mboka wa nyengana okupangwa kaanongononi yokunena. Pashiholelwa, Ombiimbeli otayi hokolola nkene uukulupe tawu ka hulithwa po, tayi ti: “Nena olutu lwe otalu shuna ko; talu kolo e talu nkondopala ishewe.” — Job 33:25.

Ndhindhilika: Kakele kekwatho ndyoka Kalunga ha gandja, Oonzapo dhaJehova ohadhi ka konga wo ekwatho lyopaunamiti li na ko nasha nomukithi gwoshinamenena. (Markus 2:17) Tse katu na epango lyokondandalunde ndyoka tatu popile, ihe omuntu kehe oku na okuninga ehogololo lye mwene li na ko nasha nepango lye.