Kalunga haye nando he etitha iiponga yopaunshitwe mbyoka hayi holoka kunena, ihe oku na ko nasha naantu mboka ya gumwa kiiponga mbyoka. Uukwaniilwa waKalunga otawu ka hulitha po iinima ayihe mbyoka hayi etele aantu okumona iihuna, mwa kwatelwa iiponga yopaunshitwe. Omanga twa tegelela shoka shi ningwe, ngashingeyi Kalunga oha hekeleke mboka ya gumwa kiiponga yopaunshitwe. — 2 Aakorinto 1:3.

•  Omolwashike tatu vulu okukala nuushili kutya iiponga yopaunshitwe kayi shi egeelo lya za kuKalunga?

•  Mbela iiponga yopaunshitwe oyi li endhindhiliko lyomasiku gahugunina?

•  Kalunga oha kwathele ngiini mboka ya dhengwa kiiponga yopaunshitwe?

•  Mbela Ombiimbeli otayi vulu oku tu kwathela tu ilongekidhile iiponga yopaunshitwe?

•  Omanyolo ngoka taga vulu okuhekeleka mboka ya gumwa kiiponga yopaunshitwe

Iiponga yopaunshitwe oya yooloka ko kunkene Kalunga ha longitha oonkondo dhopaunshitwe, ndhoka dha popiwa mOmbiimbeli.

• Iiponga yopaunshitwe ohayi ehameke nohayi dhipaga aantu nopwaa na ondjoolola. Mepingathano naashoka, uuna Kalunga ta longitha oonkondo dhe dhopaunshitwe, oha shilipaleke kutya ota hanagula po owala aakolokoshi. Pashiholelwa, sho Kalunga a li a hanagula po oshilando shaSodom naGomorra, okwa li a hupitha omulumentu omuvuliki Lot noyanakadhona yaali. (Genesis 19:29, 30) Kalunga okwa li a tala momitima dhaantu yopethimbo ndyoka, e ta hanagula po owala mboka aakolokoshi. — Genesis 18:23-32; 1 Samuel 16:7.

• Olundji iiponga yopaunshitwe ohayi holoka nopwaa na omalondodho nenge owala omashuushuuka. Mepingathano naashono, Kalunga oha gandja omalondodho manga inaa longitha oonkondo dhopaunshitwe a hanagule po aakolokoshi. Aantu mboka ya pulakene komalondodho gaKalunga, oya li ya mono ompito yokuhupa. — Genesis 7:1-5; Mateus 24:38, 39.

• Poompito dhimwe, aantu oyo haye etitha iiponga yopaunshitwe. Ngiini mbela? Omokuyonagula po uunshitwe nomokutunga pomahala mpoka hapu holoka unene omakakamo gevi, omafundja nosho wo mpoka pu na onkalo yombepo kaayi li nawa. (Ehololo 11:18) Kalunga haye nando e na okupewa ombedhi, omolwomatokolo gaantu mboka. — Omayeletumbulo 19:3.

Eeno! Ombiimbeli oya hunganeka kutya otaku ka holoka iiponga pethimbo ‘lyehulilo lyuuyuni,’ nenge tu tye ‘momasiku gahugunina.’ (Mateus 24:3; 2 Timoteus 3:1, yelekanitha NW) Pashiholelwa, shi na ko nasha nethimbo lyetu, Jesus okwa ti: “Otaku ke ya oondjala nomakakamo gevi okoombinga noombinga.” (Mateus 24:7) Masiku Kalunga ota ka hulitha po iinima ayihe mbyoka hayi etele aantu uuwehame nokumona iihuna, mwa kwatelwa nokuli iiponga yopaunshitwe. — Ehololo 21:3, 4.

• Kalunga oha hekeleke mboka ya dhengwa kiiponga yopaunshitwe nOohapu dhe, Ombiimbeli. Ombiimbeli otayi tu shilipaleke kutya Kalunga oku na ko nasha natse noha kala u uvite nayi, uuna tatu mono iihuna. (Jesaja 63:9; 1 Petrus 5:6, 7) Oya popya wo euvaneko lyaKalunga li na ko nasha nethimbo ndyoka itaaku ka kala we iiponga yopaunshitwe. — Tala oshitopolwa “ Omanyolo ngoka taga vulu okuhekeleka mboka ya gumwa kiiponga yopaunshitwe.”

• Kalunga oha kwathele mboka ya dhengwa kiiponga yopaunshitwe okupitila maapiya ye. Kalunga oha longitha aapiya ye yokombanda yevi, ya landule oshiholelwa shaJesus. Osha li sha hunganekwa kutya Jesus ota ka hekeleka “mboka ye na omwenyo gwa nyanyagulwa” nosho wo “ayehe mboka taa lili.” (Jesaja 61:1, 2) Aapiya yaKalunga ohaya kambadhala okuninga sha faathana. — Johannes 13:15.

  Kalunga oha longitha aapiya ye ya gandje ekwatho ndyoka lya pumbiwa kwaamboka ya dhengwa kiiponga yopaunshitwe. — Iilonga 11:28-30; Aagalati 6:10.

Eeno. Nonando Ombiimbeli inayi nyolwa nelalakano lyokwiilongekidhila iiponga yopaunshitwe, muyo omu na omakotampango ngoka taga vulu oku tu kwathela. Tala kiiholelwa tayi landula:

• Ilongekidhila iiponga komeho yethimbo. Ombiimbeli otayi ti: “Omuntu onkotoki ota tala oshiponga e ta ka holama.” (Omayeletumbulo 22:3) Oshi li pandunge okwiilongekidhila oonkalo komeho yethimbo, ndhoka tadhi vulu okuholoka po ombaadhilila. Okwiilongekidha hoka okwa kwatela mo okulongekidha uundjato wetu wopaulumompumbwe nokukala tu shi kutya openi tatu ka tsakanena nooyakwetu, ngele pwa holoka oshiponga.

• Kala wa lenga omwenyo pehala lyiikwamaliko. Ombiimbeli otayi ti: “Muuyuni inatu ya mo nando onasha, osho wo itatu vulu okuza mo nasha.” (1 Timoteus 6:7, 8) Otwa pumbwa okukala tu na ehalo lyokuthiga po omagumbo getu niiniwe yetu, opo tu ka holame oshiponga. Natu dhimbulukwe kutya oomwenyo dhetu odho dhi na oshilonga unene dhi vulithe piinima yopamaliko. — Mateus 6:25.