NEW YORK. Oonzapo dhaJehova otadhi pula ekwatho kepangelo lyaRusia nosho wo kaanambelewa yOmpangu yopombanda mboka ya hala okwiindika iilonga yadho moshilongo shoka. Ekwatho ndika otadhi li pula okupitila moshikonga shokunyola oontumwafo shoka shu unganekwa muuyuni awuhe. Olutuwiliki lwOonzapo dhaJehova otalu pula, opo Oonzapo muuyuni awuhe dhi kuthe ombinga moshikonga shika. Oonzapo dhaJehova muuyuni odha konda poomiliyona hetatu (8 000 000).

Omasiku sho ga li 15 Maalitsa 2017, Uuministeli wUuyuuki moRusia owa tulile mo Oonzapo dhaJehova oshipotha mompangu yopombanda tawu ti kutya ehangano lyadho olya nika oshiponga, nomahala galyo oge na okupatwa e taga landithwa po. Mboka ya tula mo oshipotha oya hala wo okwiindika iilonga mbyoka hayi longwa mombelewa yokutonatela iilonga yehangano lyetu moshilongo moka. Ngele ompangu yopombanda oya gama kwaamboka ya tula mo oshipotha, nena ombelewa onene yOonzapo dhaJehova moRusia ndjoka yi li mo-St. Petersburg otayi ka patwa. Shimwe ishewe, omadhina gomahangano gopaveta ge li 400 ngoka hadhi longitha moshilongo shoka itaga ka longithwa we, shoka tashi ka ningitha, opo omatungo gokugongalela gOonzapo dhaJehova 2 300 kaaga longithwe we moRusia. Shika otashi ti kutya omatungo agehe goshitayimbelewa shOonzapo dhaJehova nosho wo omahala moka hadhi ningile okugongala kwadho moshilongo ashihe otaga ka ninga po gepangelo. Oonzapo dhaJehova otashi vulika dhi ka falwe wo kompangu, uuna tadhi gwanitha po iilonga mbyoka hadhi ningi omolweitaalo lyadho. Ompangu yopombanda okwa tegelelwa yi ka ninge etokolo momasiku 5 Apilili.

Omupopiliko gwOonzapo dhaJehova, okuza koombelewa oonene, David A. Semonian, okwa ti: “Olutuwiliki lwOonzapo dhaJehova olwa hala okugandja eitulomo lela koshinima shika sha kwata miiti. Okutamaneka aakwashigwana mboka kaaye shi aakolokoshi, yo ohaya vulika kompango kutya ehangano lyawo olya nika oshiponga, ya fa ye li iikulo oshi li lela okulongitha nayi oompango. Metamaneko ndyoka kamu na nando uushili washa.”

Oonzapo dhaJehova hapo tadhi itoto oshikonga shoka shokunyola oontumwafo muuyuni awuhe. Konyala omimvo 20 dha ka pita, Oonzapo odha li dha nyola oontumwafo tadhi popile ooitaali ooyakwawo moRusia mboka ya li taya popilwa muuwinayi kaakwanepangelo yamwe pethimbo ndyoka. Oonzapo dhaJehova odha li wo dha nyolele aakwanepangelo miilongo ngaashi Jordan, Korea nosho wo Malawi ya hulithe po okuhepeka Oonzapo miilongo moka.

Omupopiliko gwOonzapo, Semonian okwa gwedha ko a ti: “Okulesha Ombiimbeli, okwiimba nokugalikana pamwe nooitaali ooyakweni kashi shi epogolo nando. Otu na einekelo kutya oshikonga shika shokunyola oontumwafo muuyuni awuhe otashi ki inyengitha aakwanepangelo moRusia ya hulithe po oshinima shoka taya ningile ooitaali ooyakwetu shaahe li pauyuuki.”

Mboka haya kwatathanwa nayo kiikundaneki:

Kondje yiilongo: David A. Semonian, Ombelewa yuuyelele wopaigwana, +1-845-524-3000

MoRusia: Yaroslav Sivulskiy, +7-812-702-2691