Aawe, molwaashoka okulongela Kalunga oku li etokolo lyomuntu ye mwene. (Aaroma 14:12) Oonzapo dhaJehova ohadhi longo oyana omakotampango gOmbiimbeli, ihe ngele oyana oya koko, oyo haya tokola yo yene ngele nayo otaya ningi Oonzapo dhaJehova nenge hasho. — Aaroma 12:2; Aagalati 6:5.

 Ngaashi owala aavali yalwe, Oonzapo dhaJehova nadho ohadhi kala dha halela oyana uuwanawa. Ohaya longo oyana shoka ye wete kutya otashi ke ye etela uuwanawa ngaashi: okukala ye na uunongo wontumba, omikalo omiwanawa nosho wo shoka Ombiimbeli tayi ti. Oonzapo dhaJehova odhi itaala kutya Ombiimbeli ohayi kwathele omuntu a kale e na onkalamwenyo yi na eityo. Onkee ohadhi kambadhala okuthindila omalongo gOmbiimbeli moyana, mokukonakona nayo Ombiimbeli nomokukala pokugongala kwopaKriste. (Deuteronomium 6:6, 7) Okanona kehe uuna ka koko, oko haka ningi etokolo ngele otaka taamba ko eitaalo lyaavali yako nenge hasho.

•  Mbela Oonzapo dhaJehova ohadhi ninginitha uuhanona?

•  Mbela Oonzapo dhaJehova ohadhi tondo oyana, ngele inaya hala okuninginithwa?

•  Omolwashike Oonzapo dhaJehova hadhi uvitha pamwe noyana?

•  Mbela Oonzapo dhaJehova ohadhi kutha ombinga momasiku gomafudho nenge momadhano galwe?

•  Mboka ya putudhilwa moshili ohaya kala yu uvite ngiini?

 Aawe. Ombiimbeli itayi popile okuninginithwa kuuhanona. Pashiholelwa, oyu ulika kutya manga Aakriste yomethelemumvo lyotango inaaya ninginithwa, tango “oyi itaale” e tayi itedhulula. (Iilonga 2:14, 22, 38, 41) Onkee ano, opo omuntu a ninginithwe, oku na okukala a koka nota vulu okuuva ko omalongo gOmbiimbeli, e gi itaala nokuninga etokolo okukala metsokumwe nomalongo ngoka. Iinima mbika itayi vulu okuningwa kokahanona.

 Sho aanona taya ende taya koko, mokweendela ko kwethimbo otashi vulika ya tokole ya ninginithwe. Nonando ongawo, sho taya ningi ngawo, naya kale yu uvite ko etokolo ndyoka taya ningi.

 Aawe. Nonando aavali ihaya kala yu uvite nawa, uuna okanona inaka taamba ko eitaalo lyawo, ohaya tsikile natango okukala ye ka hole nekwatathano lyawo ihali kala li ikolelela kokutinda kwako okuninga Onzapo.

 Ohatu uvitha pamwe naanona yetu, omolwomatompelo gontumba. a

•   Ombiimbeli otayi lombwele aavali ya longe oyana kombinga yaKalunga, nokuya dheula ye mu longele. (Aaefeso 6:4) Molwaashoka okulongela Kalunga okwa kwatela mo okuuvithila yalwe montaneho kombinga yaashoka wi itaala, okuuvitha oku li oshitopolwa sha simana shokulonga okanona kombinga yaKalunga. — Aaroma 10:9, 10; Aahebeli 13:15.

•   Ombiimbeli otayi ladhipike aagundjuka kondandalunde ya “hambelele edhina lyOmuwa.” (Episalomi 148:12, 13) Omukalo gwa simana gwokuhambelela Kalunga, okulombwela yalwe kombinga ye. b

•   Aanona ohaya mono mo uuwanawa, uuna taya uvitha pamwe naavali yawo. Pashiholelwa, ohayi ilongo okupopya naantu yi ili noyi ili, nohaya mono mo omaukwatya omawanawa ngaashi, olukeno, uunambili, esimaneko nosho wo okukala ye hole yalwe. Okuuvitha ohaku ya kwathele wo yu uve ko nawa shoka yi itaala mOmbiimbeli.

 Oonzapo dhaJehova ihadhi kutha ombinga momasiku gomafudho gopalongelokalunga nenge momadhano galwe ngoka inaaga hokiwa kuKalunga. c (2 Aakorinto 6:14-17; Aaefeso 5:10) Pashiholelwa, ihatu dhana omasiku gomavalo nenge Okrismesa, omadhano ngoka ga za kaapagani.

 Nonando ongawo, ohatu kongo ethimbo tu nyanyukilwe pamwe naapambele yetu nokupa aanona yetu omagano. Pehala lyokutegelela omasiku gokondandalunde ngoka ge li muulindeli ogo ge tu pe ompito yokukala pamwe naakwanezimo yetu nokupaathana omagano, ohatu kongo ethimbo tu kale pamwe nayo nokupaathana omagano momukokomoko gwomumvo.