Oonzapo dhaJehova ihadhi dhana omasiku gomavalo, molwaashoka otwi itaala kutya omadhano goludhi ndoka inaga hokiwa kuKalunga. Nonando Ombiimbeli inayi popya lela sha yela kombinga yokudhana omasiku gomavalo, otayi tu kwathele tu vule okutompathana kombinga yiinima mbyoka hayi ningwa po nokutala nkene Kalunga e yi tala ko. Tala kiinima ine tayi landula nosho wo omakotampango gOmbiimbeli.

1.   Omadhano gomasiku gomavalo oga ziilila komithigululwakalo dhoshipagani. Shi ikolelela kembwiitya lyedhina Funk & Wagnalls Standard Dictionary of Folklore, Mythology, and Legend, aniwa omadhano ngoka oga ziilila keitaalo ndyoka tali ti kutya mesiku moka omuntu a valwa “oombepo oombwinayi nosho wo omanwethomo galwe ohayi mono ompito yi ponokele mboka taye li dhana” nosho wo kutya “okukala po kwookuume ke noku mu halela ompolo, ohashi mu gamene.” Embo The Lore of Birthdays olya ti kutya pethimbo lyonale okudhana omasiku gomavalo okwa li kwa “simana, oshoka omuntu okwa li ha ka pula kombinga yaashoka tashi ke mu ningilwa komeho,” oshinima shoka shi ikolelela “kaayanekeli.” Embo ndika olya tsikile ko tali ti kutya “omalehita ngoka haga temwa mesiku lyevalo, aantu oyi itaala kutya ohaga pe nakudhana evalo elago li ikalekelwa.”

    Nonando ongawo, Ombiimbeli itayi popile okulongitha uumpulile, okwaanekela nenge ‘iinima yilwe ya tya ngawo.’ (Deuteronomium 18:14, yelekanitha OB-1954; Aagalati 5:19-21) Etompelo limwe kutya omolwashike Kalunga a li inaa hokwa oshilando shonale shaBabilonia, olyo kutya aantu yamo oya li haya anekele, oshinima shoka sha kwatelwa muumpulile. (Jesaja 47:11-15) Oonzapo dhaJehova ihadhi kala unene tadhi ipula naampoka pwa ziilila omukalondjigilile kehe; ihe uuna Omanyolo taga popi shi na ko nasha naashoka, ihatu gi ipwililikile.

2.   Aakriste yopethimbo lyonale kaya li haya dhana omasiku gomavalo. Embo The World Book Encyclopedia olya ti kutya “oya li ya tala ko okudhana esiku lyevalo ku li omuthigululwakalo gwoshipagani.” Ombiimbeli otayi ulike kutya aayapostoli nosho wo yalwe mboka ya li ya longwa kuJesus meukililo, oya tula po oshiholelwa shoka shi na okulandulwa kAakriste ayehe. — 2 Aatessalonika 3:6.

3.   Oshinima owala shoka Aakriste ye na okudhimbulukwa, kashi shi evalo lyaJesus, ihe eso lye. (Lukas 22:17-20) Shika itashi kumitha, oshoka Ombiimbeli otayi ti kutya “nesiku lyokusa oli vule esiku lyokuvalwa.” (Omuuvithi 7:1) Pehulilo lyonkalamwenyo ye kombanda yevi, Jesus okwa li i iningile edhina ewanawa naKalunga, oshoka okwa ningitha esiku lyeso lye li kale lya simana li vule esiku lyevalo lye. — Aahebeli 1:4.

4.   Ombiimbeli inayi popya nando omupiya gwaKalunga a dhana esiku lyevalo. Mbela opwa ningwa epuko sho inaayi shi popya? Hasho nando, molwaashoka oya popya omadhano gomavalo gaali, gaamboka ya li ihaaya longele Kalunga. Ihe pomavalo agehe ngoka opwa li pwa ningwa iinima iiwinayi. — Genesis 40:20-22; Markus 6:21-29.

 Ngaashi owala aavali yalwe, Oonzapo nadho ohadhi ulukile oyana ohole momukokomoko gwomumvo, mwa kwatelwa oku ya pa omagano nokuninga uututhi wontumba. Ohaya kambadhala okulandula oshiholelwa oshiwanawa shaKalunga, ngoka ha gandja nehalo ewanawa iinima iiwanawa koyana. (Mateus 7:11) Aanona mboka aavali yawo Oonzapo ihaya kala ye uvite ya pitililwa po, ngele tatu tala kwaashoka yamwe ya ti:

•   Okakadhona kedhina Tammy, komimvo 12, oka ti: “Oshiyolithi unene okupewa omagano, uuna wa kala nale we ga tegelela.”

•   Okamati kedhina Gregory, komimvo 12, oka ti: “Nonando ihandi pewa omagano mesiku lyandje lyevalo, aavali yandje ohaya landele ndje omagano poompito dhilwe. Omukalo ngoka ondi gu hole, molwaashoka ihandi kala ndi shi kutya otandi pewa omagano.”

•   Okamati kedhina Eric, komimvo 6, oka ti: “Kandi wete uumunute omulongo mboka aantu haya kala taya li iikuki tayi yalulwa yo tayi imbi okaimbilo, ku li oshituthi. Ila kaandjetu wu tale kutya oshituthi sholela osha tya ngiini!”