Otwa kankamekela omataloko getu naashoka hatu ningi ngele tashi ya pomafumviko komalongo gOmbiimbeli, mwa kwatelwa iinima tayi landula:

•   Oshi li paunshitwe okukala twa nika oluhodhi, omolweso lyomuholike gwetu. Aalongwa yaJesus oya li ya lili, omolwomaso gaaholike yawo. (Johannes 11:33-35, 38; Iilonga 8:2; 9:39) Onkee, inatu tala ko efumviko li li ethimbo lyokulya nokunwa. (Omuuvithi 3:1, 4; 7:1-4) Pehala lyaashono, otwe li tala ko li li ethimbo lyokuulika uukwawo wanankali. — Aaroma 12:15.

•   Oonakusa kaye na shoka ye shi. Kutya nduno otwa za momuhoko guni nenge meputuko lini, ohatu yanda omikalondjigilile nenge okuninga iinima yontumba mbyoka inaayi kankamena kOmbiimbeli, mbyoka tayi ulike kutya oonakusa oye shi sha notaya vulu okunwetha mo aanamwenyo. (Omuuvithi 9:5, 6, 10) Shika osha kwatela mo omikalondjigilile ngaashi okulala omitanda, iituthi yokudhika omamanya nokuhalela oonakusa omayambeko, okuyambela oonakusa, okupopya nayo noku ya pula ekwatho nosho wo omikalo dhontumba dhi na ko nasha naaselekadhi. Ohatu yanda omikalondjigilile adhihe ndhoka, opo tu vulike kOmbiimbeli, ndjoka tayi ti: ‘Iyoololii mo, inamu kala mu na ekwatathano naashoka sha nyata.’ — 2 Aakorinto 6:17.

•   Oonakusa oye na etegameno. Ombiimbeli otayi longo kutya otaku ka kala eyumuko nonokutya ethimbo otali ya, uuna itaaku ka kala we eso. (Iilonga 24:15; Ehololo 21:4) Etegameno ndika ohali tu kwathele tu yande okulila sha pitilila, ngaashi naana lya li lya kwathele Aakriste yopetameko. — 1 Aatessalonika 4:13.

•   Ombiimbeli oyi na omayele omawanawa. (Omayeletumbulo 11:2) Inatu itaala kutya efumviko oli na okukala ompito “yokwiitangela” iinima mbyoka tu na. (1 Johannes 2:16) Ihatu ningi omafumviko guuzeko, ngoka haga ningwa nelalakano lyokwiiyulika nenge niinima yondilo ngaashi iiketha, opo yi fuule aakalipo.

•   Ihatu kambadhala okuthiminikila yalwe shoka twi itaala kombinga yomafumviko. Shi na ko nasha noshinima shika, ohatu landula ekotampango ndyoka tali ti: “Kehe gumwe gwomutse ote ki ihokolola koshipala shaKalunga polwe mwene.” (Aaroma 14:12) Nonando ongawo, ngele otwa pewa ompito, ohatu kambadhala okuyelitha shoka twi itaala “momukalo gwombili nogwesimaneko.” — 1 Petrus 3:15, yelekanitha NW.

 Ehala: Ngele aanegumbo oya tokola ya kale ye na oshipopiwa shefumviko, ohashi vulika shi ningilwe kehe mpoka aanegumbo ya tokola shi ningilwe, ngaashi kOshinyanga shUukwaniilwa, pegumbo, kehala hoka haku fikilwa omidhimba nenge komawendo.

 Oshipopiwa: Ohapu gandjwa oshipopiwa, opo shi hekeleke mboka ya silwa, nohashi yelitha shoka Ombiimbeli tayi ti kombinga yeso nosho wo yetegameno lyeyumuko. (Johannes 11:25; Aaroma 5:12; 2 Petrus 3:13) Moshipopiwa ohashi vulika mu popiwe omaukwatya omawanawa ganakusa, notashi vulika shi tse omuthindo iiyilongomwa tayi tsu omukumo kombinga yoshiholelwa shuudhiginini shomuntu ngoka. — 2 Samuel 1:17-27.

 Ohashi vulika wo pu imbwe eimbilo lya kankamena kOmanyolo. (Aakolossa 3:16) Pehulilo ohapu ningwa egalikano tali hekeleke. — Aafilippi 4:6, 7.

 Ongalo: Ihatu umbitha aantu ongalo, kutya nduno opomafumviko nenge okokugongala kwetu. — Mateus 10:8.

 Aakalipo: Mboka kaaye shi Oonzapo nayo oya manguluka okukala po poshipopiwa shefumviko shoka tashi ningilwa kOshinyanga shUukwaniilwa. Ngaashi owala omakugongala getu galwe, kehe gumwe okwa manguluka okuya okupulakena koshipopiwa shefumviko.

 Onzapo kehe ohayi tokola yo yene shi ikolelela keiyuvo lyawo lya dheulwa kOmbiimbeli. (1 Timoteus 1:19) Nonando ongawo, ihatu kutha ombinga miituthi yopalongelokalunga mbyoka tu wete kutya kayi li metsokumwe nOmbiimbeli. — 2 Aakorinto 6:14-17.