O-Watch Tower Bible and Tract Society of Pennsylvania ehangano ndyoka elalakano lyalyo kaali shi okuninga oshimaliwa, ndyoka lya totwa po mo 1884, kohi yoompango dhehangano lyo-Pennsylvania, moAmerika. Ohali longithwa kOonzapo dhaJehova, opo ku yambidhidhwe iilonga yawo muuyuni awuhe, mbyoka ya kwatela mo okunyanyangidha Oombiimbeli niileshomwa ya kankamena kOmbiimbeli.

 Shi ikolelela keuvathanotsokumwe lyawo, elalakano lyehangano ndika oli na ko nasha “niinima yopalongelokalunga, nelongo lyopakalunga nonokukwathela aantu,” unene tuu “moku ya uvithila noku ya longa evaangeli lyUukwaniilwa waKalunga mewiliko lyaKristus Jesus.” Iilyo yomehangano ndika oye ya mo owala ya hiywa, ihe inashi ikolelela komayambidhidho ngoka omuntu ha gandja. Iilyo yomehangano nosho wo aakwatelikomeho, ohaya ambidhidha Olutuwiliki lwOonzapo dhaJehova.

 Kakele kedhina Watch Tower Bible and Tract Society of Pennsylvania, Oonzapo dhaJehova ohadhi longitha omadhina gopaveta ogendji miilongo yi ili noyi ili. Momadhina gamwe gopaveta, omwa kwatelwa omautumbulilo ngaashi “Watch Tower,” “Watchtower” nenge omatoloko gomautumbulilo ngoka.

 Omadhina gopaveta ngoka gi ili nogi ili, oge tu kwathela tu vule okulonga oshindji okuza ngaa sho ga totwa po. Oshindji ngaashi:

•   Okunyola nokunyanyangidha. Otwa nyanyangidha Oombiimbeli omamiliyona 220 lwaampono nosho wo iileshomwa ya kankamena kOmbiimbeli tayi ihilile pomabiliyona 40. Iileshomwa yetu oya tolokwa momalaka ge vulithe po 900. Epandja lyetu lyokointaneta, jw.org, ohali kwathele aantu ya leshe Ombiimbeli kointaneta momalaka ge vulithe 160, oshali shamuhongi. Olye ya kwathela wo ya mone omayamukulo komapulo gopaMbiimbeli, ngaashi “Uukwaniilwa waKalunga oshike?”

•   Elongo. Ohatu ningi oosikola dhelongo lyopaMbiimbeli dhi ili nodhi ili. Pashiholelwa, okuza mo 1943, Oonzapo dhaJehova 9 000 lwaampono, odha kala nokumona mo uuwanawa medheulo ndyoka hali gandjwa mOsikola yOmbiimbeli yoWatchtower yaGilead, noya kwathelwa ya longe ye li aatumwa nenge ya koleke nokuhumitha komeho iilonga yetu muuyuni awuhe. Shimwe ishewe, oshiwike kehe aantu omamiliyona, mwa kwatelwa naamboka kaaye shi Oonzapo, ohaya longwa pomakugongala getu. Ohatu gandja wo elongo lyaakuluntu notu na okambo kokulonga aantu okulesha nokunyola, hoka ka nyanyangidhwa momalaka 120.

•   Iikwatha. Otwa kala nokugandja iikwatha kwaamboka ya dhengwa kiiponga kutya nduno oombyoka hayi etithwa kaantu, ngaashi edhipago lyopamihoko ndyoka lya li lya ningwa moRwanda, mo 1994 nenge mbyoka yopaunshitwe, ngaashi ekakamo lyevi ndyoka lya li lya holoka moHaiti, mo 2010.

 Nonando oshindji osha longwa okupitila momahangano nosho wo momadhina gopaveta ngoka hatu longitha, iilonga yetu inayi ikolelela kiinima mbyoka. Omukriste kehe oku na oshinakugwanithwa shopaumwene shokugwanitha po oshilonga shoka twa pewa kuKalunga shokuuvithila aantu noku ya longa onkundana ombwanawa. (Mateus 24:14; 28:19, 20) Otwa itaala kutya Kalunga ota ambidhidha iilonga yetu nonokutya ota tsikile okukala ngoka “ta kokitha.” — 1 Aakorinto 3:6, 7.