Aawe. Oonzapo dhaJehova Aakriste mboka yi itaala mOmanyolo. Nonando omalongelokalunga gamwe ogi itaala kutya okugongala kwAajuda moPalestina okwa kankamena kehunganeko lyomOmbiimbeli, Oonzapo dhaJehova inadhi itaala oshinima shoka. Inadhi itaala kutya oshiningwanima shika shopapolitika osha popiwa mOmanyolo. Nokuli Omanyolo inaga popya sha nando shi na ko nasha nokuhumitha komeho epangelo lyopantu nenge ongundu yomuhoko gwontumba nenge aantu yontumba. Oshungolangelo, oshifo shopambelewa shOonzapo dhaJehova, osha popi sha yela kutya: “Kapu na nando enyolo tali ambidhidha ongundu yopolitika yAajuda.”

 Embo Encyclopædia Britannica otali popi kombinga “yongundu yAajuda ndjoka yu unganekwa nelalakano lyokwaambidhidha nokutota po oshilongo shAajuda moPalestina.” Ongundu ndjika oya thikama po miilyo yelongelokalunga noyopapolitika. Oonzapo dhaJehova ihadhi ambidhidha ongundu ndjika palongelokalunga nenge papolitika.

 Ehangano lyOonzapo dhaJehova olyopalongelokalunga owala noihali kutha ombinga mopolitika, mwa kwatelwa ehangano ndika lyopapolitika. Okwaakutha ombinga mopolitika kwOonzapo dhaJehova okwiiwetikile nosho wo kutya miilongo yimwe Oonzapo otadhi hepekwa nonyanya, omolwoshinima shika. Otwi itaala kutya Uukwaniilwa waKalunga womegulu owo owala tawu ka eta ombili yaaluhe kombanda yevi; kapu na epangelo lyopantu nenge ongundu yontumba tayi ke shi pondola.

 Ekotampango lya simanenena melongelokalunga lyOonzapo dhaJehova, okuvulika koompango dhomapangelo miilongo moka dhi li. Ihadhi kala dhi li ompinge nomalelo gomapangelo nenge dhi kuthe ombinga momayipumomumwe.