Aluhe euvoko lyetu ohali kala lya kankamena kOmbiimbeli, onkene ohatu lundulula efatululo lyetu shi ikolelela keuvoko lya yela lyopamanyolo. a

 Omalunduluko ga tya ngawo, oge li metsokumwe nekotampango lyOmbiimbeli ndyoka li li mOmayeletumbulo 4:18, tali ti: “Ondjila yaayuuki oya fa uuyelele weluwa tali tende, mboka tau yele sigo kwa shi.” Ngaashi owala uuna etango tali piti hali eta uuyelele, Kalunga naye ohe tu pe euvoko li na ko nasha noshili peuthwathimbo lye. (1 Petrus 1:10-12) Ngaashi Ombiimbeli ya hunganeka, Kalunga ote endelelitha “ehulilo lyuuyuni.” — Daniel 12:4.

 Omalunduluko ngoka kage na oku tu kumitha nenge oku tu piyaganeka. Nokuli noshigwana shaKalunga shonale osha li shi na euvoko lya puka miinima yontumba nosha li sha pumbwa okulundulula etaloko lyasho.

•   Moses okwa li i igandja ye mwene a mangulule oshigwana shaIsraeli uule womimvo 40, manga Kalunga inee mu langeka po. — Iilonga 7:23-25, 30, 35.

•   Aayapostoli oya li ya ndopa okuuva ko ehunganeko ndyoka lya li tali popi kombinga yeso neyumuko lyaMesiasa. — Jesaja 53:8-12; Mateus 16:21-23.

•   Aakriste yamwe yopetameko oya li ye na etaloko lya puka kombinga ‘yesiku lyOmuwa.’ — 2 Aatessalonika 2:1, 2.

 Lwanima, Kalunga okwa li e ya pukulula, notu na okugalikana, opo a tsikile oku tu ningila sha faathana. — Jakob 1:5.