Ahawe, inatu yi lundulula. Ihe mepingathano naashono, sho twa mono kutya omalongo ngoka twa li twi itaala itaga tsu kumwe thiluthilu nOmbiimbeli, otwa lundulula omalongo getu.

Nalenale manga inaatu tameka okunyanyangidha  Ombiimbeli yo-New World Translation of the Holy Scriptures mo-1950, otwa li twa konakona Ombiimbeli. Otwa li twa longitha etoloko kehe ndyoka lya li po, notwa li twa toto po omalongo getu gi ikolelela kwaashoka. Tala kiiholelwa yontumba yomalongo omakulu gOonzapo dhaJehova, ngoye to tokola mwene ngele otaga tsu ngaa kumwe naashoka Ombiimbeli tayi ti.

1.   Shoka twi itaala: Kalunga ke shi Omukwatatu. Oshifo shaJuli shomo 1882 sho-Zion’s Watch Tower osha ti: “Aaleshi yetu oye shi shi kutya nonando otwi itaala muJehova nomuJesus, nosho wo mOmbepo ondjapuki, otwa tinda thiluthilu shi ikolelela komanyolo, elongo ndyoka kutya mbaka oye li Ookalunga yatatu momuntu gumwe nenge, ngaashi yamwe haye shi popi, Kalunga gumwe maantu yatatu.”

     Ombiimbeli otayi ti ngiini: “Jehova Kalunga ketu oku li Jehova gumwe.” (Deuteronomium 6:4, The Holy Bible, ya nyolwa kuRobert Young) “Tseni otu na owala Kalunga gumwe. Oye Tate yetweni, omushiti gwiinima ayihe, mungoka tu na ethikilo. Otu na wo Omuwa gumwe awike, Jesus Kristus, ngoka Kalunga e mu shititha iinima ayihe, notu li po omolwe.” (1 Aakorinto 8:6) Jesus mwene okwa ti: “Tate oye omunene e vule ndje.” — Johannes 14:28.

2.   Shoka twi itaala: Kaku na omulilo gwoheli moka hamu hepekelwa aantu sigo aluhe. Oshifo shaJuni 1882 sho Zion’s Watch Tower shoka sha li shi na oshipalanyolo “Ondjambi yuulunde oyo eso,” shoka sha li sha tothwa mAaroma 6:23 okuza mOmbiimbeli yo-King James Version sha ti: “Oohapu ndhika odha yela nodhu ukilila. Otashi kumitha shili sho oyendji mboka haya ti kutya oya tala ko Ombiimbeli yi li Oohapu dhaKalunga haya kala nokupataneka oohapu ndhika, nohaya ambidhidha edhiladhilo ndyoka kutya oyi itaala, nohaya ti kutya Ombiimbeli ohayi ti kutya ondjambi yuulunde oyo okuhepekwa sigo aluhe.”

     Shoka Ombiimbeli tayi ti: “Omwenyo nguka tagu yono — ogwo gu na okusa.” (Hesekiel 18:4, 20, OB-1954) Egeelo lyahugunina lyaamboka ye li ompinge naKalunga, kali shi ehepeko lyaaluhe, ihe ‘egeelo lyehanagulo lyaaluhe.’ — 2 Aatessalonika 1:9.

3.   Shoka twi itaala: Uukwaniilwa waKalunga owo epangelo lyolela, ihe kawu shi owala onkalo yomomutima gwomuntu. Oshifo shaDesemba shomo-1881 sho-Zion’s Watch Tower osha popi kombinga yUukwaniilwa waKalunga, sha ti: “Okudhikwa po kuukwaniilwa mbuka, nopwaahe na omalimbililo, otaku ka ningitha omaukwaniilwa agehe kombanda yevi ga hanagulwe po.”

     Shoka Ombiimbeli tayi ti: ‘Pomasiku gaakwaniilwa mbeyaka Kalunga nguka komegulu ota ka dhika uukwaniilwa mboka itaawu ka hula po nando nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.’ — Daniel 2:44, yelekanitha NW.

 Ahawe, molwaashoka ohatu tsikile okulongitha omatoloko galwe gOmbiimbeli miilonga yetu yokuuvitha. Nonando ohatu gandja Oombiimbeli dho-New World Translation oshali oshinima shoka shi li oshitopolwa shekonakonombiimbeli ndyoka hatu gandja, ohatu nyanyukilwa wo okukonakona nayalwe mboka ye wete shi li hwepo ya longithe omatoloko galwe.