Aawe, Oonzapo dhaJehova kadhi shi oshimpaga. Pehala lyaashono, tse Aakriste mboka hatu kambadhala okuninga ngaashi tatu vulu tu landule oshiholelwa shaJesus Kristus nokuvulika komalongo ge.

 Oshitya “oshimpaga” kaantu yi ili noyi ili otashi popi iinima ya yoolokathana. Ihe natu tale kiinima yopaali mbyoka yi itaalwa kaantu apuhe shi na ko nasha noshitya oshimpaga, nokutala kutya omolwashike tse kaatu shi oshimpaga.

•   Yamwe ohaya ti kutya oshimpaga elongelokalunga epe hali ningi iinima inaayi taambiwa ko. Oonzapo dhaJehova inadhi tota po elongelokalunga epe. Mepingathano naashoka, tse ohatu longele Kalunga twa landula oshiholelwa shAakriste yomethelemumvo lyotango, mboka oshiholelwa shawo nomalongo gawo ga nyolwa mOmbiimbeli. (2 Timoteus 3:16, 17) Otwi itaala kutya Omanyolo omayapuki ogo ge na okukala taga dhana onkandangala ngele tashi ya kwaashoka sha taambiwa ko melongelokalunga.

•   Yamwe ohaya ti kutya oshimpaga osho elongelokalunga lya nika oshiponga li na omuwiliki gwopantu. Oonzapo dhaJehova kadhi na omuwiliki gwopantu. Ihe ohadhi wilikwa komithikampango ndhoka Jesus a tulila po aalanduli ye sho e ya lombwele a ti: “Omuwiliki gweni gumwe awike oKristus.” — Mateus 23:10.

 Ano Oonzapo dhaJehova kadhi shi oshimpaga, dho inadhi nika oshiponga, ihe elongelokalunga lyadho ohali etele iilyo yalyo uuwanawa nosho wo yalwe moshigwana. Pashiholelwa, otwa kwathela aantu oyendji ye ethe po iinima ya nika oshiponga mbyoka ya li ye ya pika, ngaashi okulongitha iingangamithi nokunwa sha pitilila. Kakele kaashono, ohatu longo aantu okulesha muuyuni awuhe, hatu kwathele aantu omayuvi yi ilonge okulesha nokunyola. Ohatu kwathele wo aantu mboka ya hupa miiponga yopaunshitwe. Ohatu longo nuudhiginini tu kwathele yalwe, ngaashi naanaa Jesus a lombwela aalanduli ye ya ninge. — Mateus 5:13-16.