•  Oonzapo dhaJehova ohadhi mono ngiini kutya esiku lyefudho lyontumba oye na oku li dhana nenge hasho?

•  Mbela Oonzapo dhaJehova sho ihaadhi dhana omasiku gomafudho gontumba, odhi hole ngaa aapambele yadho?

•  Mbela Oonzapo dhaJehova ohadhi lombwele yamwe kaaya dhane omasiku gomafudho gontumba?

 Manga Oonzapo dhaJehova inaadhi tokola okukutha ombinga mesiku lyefudho lyontumba, tango ohadhi tala kutya Ombiimbeli otayi ti ngiini. Omasiku gomafudho gamwe nosho wo shoka sha kwatelwa mo, oyi li lela ompinge nomakotampango gOmbiimbeli. Onkee moonkalo dha tya ngawo, Oonzapo dhaJehova ihadhi kutya nando ombinga. Ihe kombinga yomasiku galwe gomafudho, Onzapo kehe ohayi ningi etokolo yo yene, nokukambadhala okukala yi na “na eiyuvo lya yela koshipala shaKalunga noshaantu.” — Iilonga 24:16.

 Mpaka otapu landula omapulo gamwe ngoka Oonzapo dhaJehova hadhi ipula, uuna tadhi tokola ngele nadhi dhane esiku lyontumba lyefudho nenge hasho. a

•   Mbela esiku lyefudho ndika olya kankamena kelongo kaali li pamanyolo?

   Ekotampango lyOmbiimbeli: “Omuwa ota ti: Zii mo mokati kawo, ne mu iyoolole mo muyo. Inamu kala mu na ekwatathano naashoka sha nyata.” — 2 Aakorinto 6:15-17.

   Opo Oonzapo dhaJehova dhi iyoolole ko komalongo ngoka inaaga yogoka pambepo, sha hala okutya, ngoka ge li ompinge naashoka sha popiwa mOmbiimbeli, ihadhi dhana omasiku gomafudho ngoka ga kwatela mo iinima tayi landula.

   Omasiku gomafudho ngoka ga kankamena keitaalo lyontumba nenge kokulongela iikalunga. Jesus okwa ti: “Omuwa Kalunga koye oye awike u na oku mu galikana noye awike u na oku mu longela.” (Mateus 4:10) Oonzapo dhaJehova ohadhi landula elombwelo ndyoka, nomolwaashono ihaadhi dhana Okrismesa, Opaasa (o-Easter) nenge Esiku lyaaniilonga, oshoka omasiku gomafudho ngoka oga kankamena kokulongela iikalunga, pehala lyokulongela Jehova. Shimwe ishewe, ihadhi kutha ombinga momasiku gomafudho ngaka taga landula.

  •  Kwanzaa. O-Encyclopedia of Black Studies oya ti kutya edhina Kwanzaa “olya za kuutumbulilo wOshiswahili matunda ya kwanza, mboka tawu ti ‘oshipe.’ Shoka otashi ulike kutya esiku ndyoka lyefudho olya kankamena komadhano ge na ko nasha noshipe, ngoka ga popiwa mondjokonona yaAfrika.” Nonando yamwe oya tala ko esiku lyefudho Kwanzaa kaali shi lyopalongelokalunga, o-Encyclopedia of African Religion oye li yelekanitha noshituthi shomuAfrika, shoka hashi ningwa pethimbo lyeteyo lyotango. Oshipe shoka “ohashi gandjwa kiikalunga nokaathithi, shi li omukalo gwoku ya pandula.” Oya gwedha ko wo tayi ti: “Omukalo ngoka ogwa faathana naangoka gwokuulika olupandu nenyanyu, omolwaakwampungu mboka ya kwatelwa mesiku lyefudho lyaAfrika nolyaAmerika, Kwanzaa.”

  •  Oshituthi shedhina Mid-Autumn Festival. Embo Holidays, Festivals, and Celebrations of the World Dictionary olya ti kutya shika osho “oshituthi shokusimaneka oshikalunga shomwedhi.” O-Religions of the World—A Comprehensive Encyclopedia of Beliefs and Practices oya ti kutya osha “kwatela mo omukalo gwAachiina, moka.”

  •  Oshituthi Nauruz (Nowruz). Ehangano lyedhina United Nations Educational, Scientific and Cultural Organization olya ti: “Oshituthi shoka osha ziilila keitaalo lyo-Zoroastrianism, noshi li shimwe shomiituthi mbyoka ya talika ko iiyapuki yi li mokalindeli okakulu keitaalo lyo-Zoroastrian. . . . Aakwampungu yopethimbo lyomutenya mboka ya tseyika nedhina Rapithwin, mboka yi itaalwa kutya ohaya telaalithwa kohi yevi kaakwampungu yopethimbo lyokufu, ano pethimbo lyoomwedhi dhuutalala, oya li haya hambelelwa nokutaambwa ko ishewe nomadhano ngoka haga ningwa omutenya mesiku ndyoka pamuthigululwakalo gwOshinowruz.”

  •  Esiku lyo-Shab-e Yalda. Embo Sufism in the Secret History of Persia, olya popya kutya oshituthi shika hashi dhanwa pethimbo lyuutalala “oshi na ekwatathano nelongelokalunga lyaMithra, oshikalunga shuuyelele.” Osha fa wo shi li ngeyi kutya esiku ndika otashi vulika li na ekwatathano nokulongela iikalunga yetango yAaroma noyAagreka. b

  •  Esiku lyOmapandulo. Ngaashi owala esiku lyo-Kwanzaa, esiku ndika olya kankamena komadhano giituthi mbyoka ya li hayi dhanwa nale shi na ko nasha nokusimaneka iikalunga yi ili noyi ili. Embo A Great and Godly Adventure—The Pilgrims and the Myth of the First Thanksgiving, otali ti kutya mokweendela ko kwethimbo “omadhano ngoka gonale gopamuthigululwakalo oga ka taambwa ko koongeleka dhopaKriste.”

   Omasiku gomafudho ngoka ga kankamena kiidhila nenge keitaalo li na ko nasha nelago. Ombiimbeli oya ti kutya mboka ‘hamu yalele Gad (oshimenka shelago) oshililo’ one “mboka hamu etha Omuwa.” (Jesaja 65:11, yelekanitha OB-1954) Onkee ano, Oonzapo dhaJehova ihadhi dhana omasiku gomafudho taga landula:

  •  Esiku lyo-Ivan Kupala. Embo The A to Z of Belarus olya ti: “Shi ikolelela keitaalo ndyoka lya tseyika nawa, mesiku lyo-Ivan Kupala, ohapu kala oonkondo dhimwe dhuumpulile ndhoka hadhi monika owala komuntu ngoka i itumba noku na anuwa elago.” Oshituthi shika osha li shopashipagani nosha li hashi dhanwa pokwenye (kiilongo yaEuropa). O-Encyclopedia of Contemporary Russian Culture oya ti kutya “konima sho aapagani ya taamba ko Uukriste, esiku ndika olya hengumukile mumwe nesiku lyefudho lyongeleka [okudhimbulukwa “esiku eyapuki lyaJohannes Omuninginithi”].”

  •  Esiku lyomumvo omupe lyo-Lunar (Esiku lyomumvo omupe lyAachiina nenge Esiku lyomumvo omupe lyAakorea). Embo Mooncakes and Hungry Ghosts—Festivals of China olya ti: “Pethimbo ndika lyomumvo, ohapu gandjwa unene eitulomo komaukwanegumbo, kookuume nokaakwanezimo, opo ya halelwe omayambeko gelago, omumvo ngoka omupe noya simaneke iikalunga naathithi.” Sha faathana o-Encyclopedia of New Year’s Holidays Worldwide oya ti kutya mesiku lyomumvo omupe gwAakorea “ohamu galikanwa aakwampungu, hamu tidhwa oombepo dhuuwinayi, hamu halelwa omumvo omupe gwelago nokukambadhala okumona kutya omumvo ngoka omupe otagu ke enda ngiini.”

   Omasiku gomafudho ngoka ga kankamena kedhiladhilo lyomwenyo ihaagu si. Ombiimbeli oya popya sha yela kutya omwenyo ohagu si. (Hesekiel 18:4) Onkee ano, Oonzapo dhaJehova ihadhi dhana omasiku gomafudho taga landula, oshoka otaga humitha komeho eitaalo lyomwenyo ihaagu si:

  •  Esiku lyoomwenyo adhihe (Esiku lyoonakusa). O-New Catholic Encyclopedia otayi ti kutya mesiku ndika “ohamu dhimbulukiwa aasi ayehe. Okuza mo 500 E.N. lwaampono sigo omo 1500 E.N. lwaampono, aantu oyendji oya kala yi itaala kutya oomwenyo adhihe ndhoka dhi li momulilo gweyogolitho, mesiku ndyoka ohadhi holoka molupe lwiiluli, lwaalodhi, lwiishitukila nosho tuu, yi ye kaantu mboka ye ya ninga nayi, sho ya li momwenyo.”

  •  Oshituthi sho-Qingming (Ch’ing Ming) nosho wo oshituthi shiiluli ya sa ondjala. Iituthi mbika iyali ohayi ningwa, opo ku simanekwe aakwampungu. Embo Celebrating Life Customs Around the World—From Baby Showers to Funerals olya ti kutya pethimbo lyoshituthi Ch’ing Ming, “iikulya, iikunwa nosho wo iimaliwa yomafo ohayi fikwa nelalakano ku shilipalekwe kutya oonakusa itaya si ondjala, enota noinaya hepa iimaliwa.” Embo ndyoka olya popya wo kutya “mOmwedhi gwOshituthi shIiluli ya sa Ondjala, unene tuu muusiku mboka ku na omwedhi gu udha, [aadhani yoshituthi] oyi itaala kutya ohapu kala ekwatathano enene pokati kaasi naanamwenyo shi vulithe omausiku galwe. Onkene osha simana okunyanyudha aasi nokusimaneka aakwampungu.”

  •  Oshituthi sho-Chuseok. O-The Korean Tradition of Religion, Society, and Ethics oya ti kutya oshituthi shika osha kwatela mo “okugandja iikulya nomaviinu koomwenyo dhoonakusa.” Okugandja hoka otaku ambidhidha “eitaalo lyomwenyo hagu tsikile okukala po, konima sho olutu lwa sa.”

   Omasiku gomafudho ngoka ge na ekwatathano nuumpulile. Ombiimbeli otayi ti: “Ino pitika aantu yoye ya nonome nenge ya anekele, ya kale nuumpulile nenge ya lye omayuku, ya tikile nenge ya pule iihehelela, oombepo dhuumpulile nenge aathithi. Omuwa Kalunga koye oha tondo aantu mboka haa ningi iinima mbika iinyanyalithi.” (Deuteronomium 18:10-12) Opo Oonzapo dhaJehova dhi yande uumpulile woludhi kehe, mwa kwatelwa okuyanekela (omukalo gwokunonoma), ihadhi dhana oshituthi shoka hashi ithanwa Halloween nosho wo iituthi tayi landula:

  •  Esiku lyo-Sinhala nosho wo Omumvo omupe Tamil. O-Encyclopedia of Sri Lanka oya ti: “Iinima yopamuthigululwakalo mbyoka hayi ningwa poshituthi shoka, . . . oya kwatela mo okuninga iinima yontumba mbyoka ya talika ko kaayanekeli kutya ohayi eta elago.”

  •  Esiku lyo-Songkran. Embo Food, Feasts, and Faith—An Encyclopedia of Food Culture in World Religions olya popi kombinga yoshituthi shoka shokuAsia kutya edhina lyasho “olya za koshitya shOshisanskrit . . . shoka tashi ti ‘okwiinyenga’ nenge ‘okulunduluka.’ [Oshituthi shoka] ohashi ningwa, opo ku ndhindhilikwe okwiinyenga kwetango, sho tali piti pongundu yoonyothi.”

   Omadhano ngoka ga kwatathana nOmpango yaMoses ndjoka ya hulithwa po keyambo lyaJesus. Ombiimbeli otayi ti: “Ompango oya hulu, sho Kristus e ya.” (Aaroma 10:4) Aakriste ohaya mono natango uuwanawa momakontampango gomOmpango yaMoses, ndjoka ya pelwe Aaisraeli pethimbo lyonale. Nonando ongawo, ihaya dhana iituthi yOmpango ndjoka, unene tuu mbyoka ya li tayi thaneke Mesiasa, ngoka Aakriste yi itaala kutya okwe ya nale. Ombiimbeli otayi ti: “Mbika ayihe oyo omuzizimba gwowala gwiinima yokomeho, ihe oshinima sho shene oKristus.” (Aakolossa 2:17) Kakele kaashoka, ngashingeyi iituthi mbyoka oya kwatela mo omikalondjigilile itaadhi tsu kumwe nOmbiimbeli, nomolwaashono Oonzapo dhaJehova ihadhi kutha ombinga miituthi ngaashi mbika tayi landula:

  •  Oshituthi sho-Hanukkah. Moshituthi shika ohamu dhimbulukiwa eyapulo lyotempeli yAajuda muJerusalem. Ihe Ombiimbeli oya ti kutya Jesus okwa ningi Omuyambi Omukuluntu nokwa yi ‘metsali moka ta yakula, li na esimano enene nolya gwana, nokali shi oshinima shomeshito ndika.’ (Aahebeli 9:11) KAakriste, otempeli ndjoka yopambepo oya pingena po otempeli yo yeneyene yomuJerusalem.

  •  Esiku lyo-Rosh Hashanah. Ndika esiku lyotango lyomumvo gwOshijuda. Pethimbo lyonale, poshituthi shoka opwa li hapu yambelwa Kalunga omayambo gi ikalekelwa. (Numeri 29:1-6) Ihe Jesus Kristus, ngoka e li Mesiasa, okwa ‘hulitha po oontselelandjambo niikulyandjambo,’ nokungawo itayi ti sha we momeho gaKalunga. — Daniel 9:26, 27.

•   Mbela omasiku gomafudho ohaga ningitha omaitaalo ga ye mumwe?

   Ekotampango lyOmbiimbeli: “Omwiitaali nomukeeneitaalo otaa vulu tuu okukala ye na uukumwe? Otempeli yaKalunga otayi vulu ngiini okulongela kumwe niikalunga?” — 2 Aakorinto 6:15-17.

   Nonando Oonzapo dhaJehova ohadhi kambadhala okukala dhi na ombili naantu ooyakwawo nokusimaneka uuthemba wakehe gumwe wokuhogolola shoka a hala okwiitaala, ohadhi yanda omadhano ngoka haga humitha komeho okumbwanga mumwe omaitaalo momikalo tadhi landula.

   Omadhano gopalongelokalunga nenge ge na ko nasha niiningwanima mbyoka tayi humitha komeho okuhanganitha aantu yomaitaalo ga yoolokathana. Sho Kalunga a li a fala oshigwana she shonale kevi epe, hoka kwa li ku na aantu yomaitaalo gi ili nogi ili, okwa li e shi lombwele a ti: “Ino hangana nando okuli nayo nenge nookalunga yawo. . . . Ngele to longele ookalunga yawo, otashi ka ninga omwigo gwoye.” (Eksodus 23:32, 33) Onkee ano, Oonzapo dhaJehova ihadhi kutha ombinga momasiku gomafudho taga landula.

  •  Esiku lyo-Loy Krathong. O-Encyclopedia of Buddhism oya ti kutya pethimbo lyoshituthi shika shAathai “aantu ohaya ningi uuyaha womafo, ya tula mo omalehita nenge uuti wokutsininitha ezima ewanawa, e taya tula uuyaha mboka momeya. Aantu oyi itaala kutya uuyaha mboka ohawu kutha po omupya. Onkee mesiku ndyoka ohaku dhimbulukiwa oshinkoti oshiyapuki, shoka sha thigwa po kuBuddha.”

  •  Esiku lyOkwiitedhulula lyoPashigwana. Omunambelewa gumwe okwa popya moshifokundaneki shomoPapua New Guinean, shedhina The National, kutya mboka haya kutha ombinga moshiningwanima shika “oya taamba ko ekankameno lyeitaalo lyUukriste.” Okwa ti wo kutya esiku ndyoka oli li “onzo yomakotampango gAakriste yomoshilongo.”

  •  Esiku lyo-Vesak. Embo Holidays, Festivals, and Celebrations of the World Dictionary olya ti kutya “ndika esiku eyapuki lela momasiku gomaitaalo gOshibuddha, lyokudhana evalo lyaBuddha, uunongo we nosho wo eso lye nenge okulalakanena kwe elago.”

   Omadhano ngoka ga kankamena komithigululwakalo, ngoka itaaga popilwa kOmbiimbeli. Jesus okwa lombwele aawiliki yomalongelokalunga a ti: “Ne otamu kutha oohapu dhaKalunga oonkondo omolwomithigululwakalo dheni.” Okwa popi wo kombinga yawo kutya okulongela kwawo Kalunga kakwa li taku ti sha, oshoka oya longo “omalongo gopaipango yaantu.” (Mateus 15:6, 9) Oonzapo dhaJehova odha taamba ko elondodho ndyoka, nomolwaashono ihadhi kutha ombinga miituthi yopalongelokalunga oyindji.

  •  Esiku lyo-Epiphany (Esiku lyAakwaniilwa Yatatu, Timkat, nenge Los Reyes Magos). O-The Christmas Encyclopedia oya ti kutya aantu ohaya dhana esiku ndyoka tashi vulika taya dhimbulukwa aayanekeli yoonyothi mboka ya talele po Jesus nenge eninginitho lyaJesus. Oshituthi osha “lundululila iituthi yimwe yoshipagani yopethimbo lyokwenye, mbyoka hayi simanekitha iikalunga yomakunguluko gomeya, omilonga noothithiya, yi ninge yopaKriste.” O-Encyclopedia of Society and Culture in the Ancient World oya ti kutya Timkat, oshituthi shimwe sholudhi lumwe naashoka, “oshi na lela omidhi dha kola komithigululwakalo.”

  •  Oshituthi shi na ko nasha nomukadhona Maria a ya megulu. Oshituthi shika ohashi dhanwa, molwaashoka okwi itaalwa kutya yina yaJesus okwa londo a yi megulu nolutu lwopanyama. Embo Religion and Society—Encyclopedia of Fundamentalism olya ti: “Eitaalo ndyoka kalya li lya tseyika kAakriste yopetameko noinali tumbulwa mo mOmanyolo.”

  •  Oshituthi shi na ko nasha nokwiitaala kutya Maria okwa li a manguluka ko kuulunde, sho a ningi omusimba. O-New Catholic Encyclopedia oya ti: ‘Eitaalo ndyoka kutya Maria okwa li a manguluka ko kuulunde, sho a ningi omusimba, inali popiwa mo mOmanyolo. Ongeleka oyo owala ya tota po oshinima shoka.’

  •  Esiku lyo-Lent. O-New Catholic Encyclopedia oya ti kutya ethimbo lyokwiitedhulula nolyokwiidhilika olya totwa po “methelemimvo etine,” konima yomimvo 200, sho Ombiimbeli ya pwa okunyolwa. O-encyclopedia oya popi wo kombinga yesiku lyotango lyo-Lent tayi ti: “Mesiku Etitatu koshiwike lyomutoko, aayambi oya li haya thaneke omushigakano nomutoko moombamba dhiipala yiilyo yawo. Shoka osha li hashi ya dhimbulukitha kutya oya pumbwa okwiitedhulula. Omukalondjigilile nguka ogwa li gwa taambwa ko pambelewa kongeleka yaKatoolika, mo 1091.”

  •  Oshituthi sho-Meskel (nenge Maskal). O-Encyclopedia of Society and Culture in the Medieval World oya ti kutya oshituthi shoka shAaetiopia ohashi ningwa, “opo ku minikilwe Omushigakano gwoLela (hoka kwa li kwa alelwa Jesus), mokutema omulilo noku gu dhingoloka taya ndanisa.” Nonando ongawo, Oonzapo dhaJehova ihadhi longitha omushigakano melongelokalunga lyadho.

•   Mbela esiku lyefudho ohali simanekitha omuntu gwontumba, ehangano nenge endhindhiliko lyontumba lyopashigwana?

   Ekotampango lyOmbiimbeli: “Omuwa ota ti: ‘Otandi pangula omuntu ngoka ta pilamene ndje noti inekele omuntu, oonkondo dhomuntu gwowala.’”—Jeremia 17:5.

   Nonando Oonzapo dhaJehova ohadhi pandula aantu ooyakwawo noku ya kwatela momagalikano gawo, ihadhi kutha ombinga miituthi ngaashi mbika tayi landula:

   Omasiku gomafudho ngoka haga tumbalekitha omupangeli gwontumba nenge omuntu gwontumba a simanekwa. Ombiimbeli otayi ti: “Inamu inekela we omuntu. Oye omufudho gwowala. Oku na omwago gwashike?” (Jesaja 2:22) Onkee ano, Oonzapo dhaJehova ihadhi dhana omasiku gomavalo, nonando oli kale lyomunenentu.

   Omadhano ge na ko nasha nepandela lyopashigwana. Oonzapo dhaJehova ihadhi dhana esiku lyefudho li na ko nasha nepandela lyopashigwana. Omolwashike? Omolwaashoka Ombiimbeli otayi ti: “Yandeni iikalunga.” (1 Johannes 5:21) Aantu yamwe kunena, inaya tala ko epandela li li oshimenka, oshinima shoka hashi simanekwa nokugalikanwa. Ndele omunandjokonona gwedhina Carlton J. H. Hayes okwa nyola a ti: “Epandela oli li endhindhiliko enene lyeitaalo muukwashigwana, nolya talika ko li li oshinima sha simanenena shoka shi na okugalikanwa.”

   Omasiku gomafudho nenge omadhano ngoka haga tumbalekitha aayapuki. Oshike sha li sha ningwa po, sho omulumentu gumwe omutilikalunga a tsile oongolo omuyapostoli Petrus? Ombiimbeli otayi ti: “Petrus okwe mu lombwele a ti: ‘Thikama, oshoka nangame wo omuntu gwowala.’” (Iilonga 10:25, 26) Molwaashoka Petrus nosho wo aayapostoli yalwe kaya li ya taamba ko esimaneko nenge etumbaleko li ikalekelwa, Oonzapo dhaJehova ihadhi kutha ombinga miituthi yokusimaneka mboka ya talika ko aayapuki, ngaashi tayi landula:

  •  Esiku lyAayapuki Ayehe. O-New Catholic Encyclopedia oya ti: “Oshituthi shika ohashi ningwa, opo ku simanekwe aayapuki ayehe . . . Kaku shiwike kutya oshituthi shika osha ziilila peni.”

  •  Esiku lyomukadhona gwomoGuadalupe (Fiesta of Our Lady of Guadalupe). O-The Greenwood Encyclopedia of Latino Literature oya ti kutya oshituthi shika ohashi simaneke omukiintu “omuyapuki, ngoka ha gamene Mexico,” nayamwe oyi itaala kutya oye Maria, yina yaJesus. Okwi itaalwa kutya okwa li i ihololele pashikumithalonga omuthigona gumwe, mo 1531.

  •  Esiku lyEdhina. Embo Celebrating Life Customs Around the World—From Baby Showers to Funerals olya ti: “Esiku lyedhina olyo esiku lyoshituthi shoka hashi ningilwa omuyapuki, ngoka a lukilwa okaana sho taka shashwa nenge taka kolekwa.” Olya gwedha ko kutya “mesiku ndyoka aantu ohaya ningi iinima yopaitaalo.”

   Omadhano ga kwatathana nomahangano gopapolitika nenge gopankalathano. Ombiimbeli otayi ti: “Okwiinekela Omuwa oku vule okwiitula maantu.” (Episalomi 118:8, 9) Oonzapo dhaJehova ihadhi kutha ombinga mEsiku lyAagundjuka nenge mEsiku lyOomeme, molwaashoka odhi shi kutya Kalunga oye ta ka kandula po omaupyakadhi ngoka ge li muuyuni, ihe haantu mboka yi inekelwa. Omolwetompelo lya faathana, ihadhi kutha ombinga momasiku gomapangelo gokuhulitha po uupika nenge galwe ngoka gu ukila hoka. Pehala lyaashono, odha tegelela Uukwaniilwa waKalunga owo wu ye wu kandule po uupyakadhi wu na ko nasha nuukwamuhoko nosho wo nokwaathikepamwe. — Aaroma 2:11; 8:21.

•   Mbela esiku lyefudho ndyoka otali tumbalekitha oshigwana nenge omuhoko gwontumba shi vulithe dhilwe?

   Ekotampango lyOmbiimbeli: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” — Iilonga 10:34, 35.

   Nonando Oonzapo dhaJehova odhindji odhi hole iilongo moka dhi li, ohadhi yanda omadhano ngoka taga tumbaleke oshigwana nenge omuhoko gwontumba momikalo tadhi landula.

   Iituthi mbyoka tayi tumbalekitha omatangakwiita. Pehala lyokuyambidhidha iita, Jesus okwa lombwela aalanduli ye a ti: “Holeni aatondi yeni, galikaneneni aahepeki yeni.” (Mateus 5:44) Onkee ano, Oonzapo dhaJehova ihadhi kutha ombinga miituthi mbyoka tayi tumbalekitha aakwiita, mwa kwatelwa omasiku gomafudho ngaka taga landula:

  •  Esiku lyo-Anzac. Embo Historical Dictionary of Australia olya ti kutya “Anzac oshi lile po Australian and New Zealand Army Corps” nonokutya “esiku lyefudho lyo-Anzac olye ende tali lundulukile mesiku lyokudhimbulukwa mboka ya dhipagelwa miita.”

  •  Esiku lyOonakulwa Aakulu (Esiku lyokudhimbulukwa, Osoondaha yEdhimbuluko nenge Esiku lyEdhimbuluko). O-Encyclopædia Britannica oya ti kutya omasiku ngoka gomafudho, ohamu dhimbulukiwa “oonakulwa aakulu yomatangakwiita ga homata nosho wo mboka ya dhipagelwa miilongo moka mwa li iita.”

   Esiku lyokudhimbulukwa ondjokonona yoshigwana nenge emanguluko. Jesus okwa popya shi na ko nasha naalanduli ye a ti: “Ngashi ngame ndaa shi gwomuuyuni, osho wo nayo kaye shi yomuuyuni.” (Johannes 17:16) Nonando Oonzapo dhaJehova odhi hole okwiilonga kombinga yondjokonona yoshigwana, ihadhi kutha ombinga miituthi ngaashi mbika tayi landula:

  •  Esiku lyaAustralia. Embo Worldmark Encyclopedia of Cultures and Daily Life olya ti kutya mesiku moka ohamu dhimbulukwa “esiku lyomo 1788, sho aakwiita Aayingilisa ya li ya tsilike epandela nokutseyitha kutya Australia okwa ninga oshikolonyekwalongo oshipe.”

  •  Esiku lyo-Guy Fawkes. Embo A Dictionary of English Folklore olya ti kutya “mesiku ndyoka ohamu dhanwa nokudhimbulukiwa Guy Fawkes nosho wo Aakatoolika mboka ya li taye mu ambidhidha noya ndopa, sho ya li taya kambadhala okudhipaga omukwaniilwa James gwotango nosho wo iilyo yegumbo lyopashigwana lyaIngilanda, mo 1605.”

  •  Esiku lyEmanguluko. Embwiitya Merriam-Webster’s Unabridged Dictionary olya popya kutya miilongo oyindji, esiku ndika ohali ikalekelwa, opo ku dhanwe nokudhimbulukwa esiku moka oshilongo shontumba sha li sha manguluka.

•   Mbela mesiku lyefudho ndika aantu ohayi ihumbata momukalo inaagu yogoka?

   Ekotampango lyOmbiimbeli: “Osha gwana, sho mwa kala nale hamu longo iilonga ya faathana noyaapagani. Omwa kala muukeeneidhiliko, muuhalu, muunkolwi, muufukedhi, momanwino nomiihuna yesimaneko lyiimenka.” — 1 Petrus 4:3.

   Metsokumwe nekotampango ndyoka, Oonzapo dhaJehova ohadhi yanda omadhano ngoka taga hwahwameke okunwa sha pitilila nosho wo iituthi yaa na elandulathano. Oonzapo dhaJehova ohadhi nyanyukilwa okukala pamwe nookuume kadho, notashi vulika dhi hogolole okunwa omalovu pandjele nenge okwaa ga nwa nando. Ohadhi kambadhala okulandula omayele gopaMbiimbeli ngoka taga ti: “Mwaashihe shoka tamu ningi, ngele tamu li nenge tamu nu, longeni ayihe nokusimanekitha Kalunga.” — 1 Aakorinto 10:31.

   Onkee, Oonzapo dhaJehova ihadhi kutha ombinga miituthi yoludhi ndoka, mbyoka hayi humitha komeho eihumbato ndyoka lya pangulwa kOmbiimbeli. Shoka osha kwatela mo oshituthi shAajuda shedhina Purim. Nonando oshituthi Purim osha kala hashi dhanwa okuza nale, opo ku dhimbulukiwe okumangululwa kwAajuda methelemimvo etitano K.E.N., pambo Essential Judaism ngashingeyi otashi vulika “hashi dhanwa kAajuda nohaya holele iituthi ngaashi Mardi Gras.” Aantu oyendji “mboka haya dhana oshituthi shoka, ohaya zala nayi (olundji aalumentu ohaya kala ya zala oonguwo dhoshimeme), ohayi ihumbata momukalo inaagu yogoka, ohaya nu sha pitilila nokuninga omakudhilo shimwe to nyengwa.”

 Eeno. Ombiimbeli otayi longo kutya aantu naya kale ye hole nokusimaneka aapambele yawo ayehe, kutya nduno oye li meitaalo lini. (1 Petrus 3:1, 2, 7) Odhoshili kutya ngele gumwe gwomOonzapo dhaJehova okwa etha po okukutha ombinga momadhano gontumba, aapambele ye yamwe otashi vulika ya geye, yu uve nayi nenge nokuli ya kale ye wete ya kengelelwa. Onkee ano, Oonzapo dhaJehova odhindji ohadhi katuka onkatu dhi shilipaleke aapambele yadho kutya odhi ya hole, noku ya yelithila momukalo omwaanawa omatokolo gawo nosho wo oku ya talela po poompito dhimwe.

 Aawe. Odhi itaala kutya omuntu kehe oku na okuninga omatokolo ye mwene. (Josua 24:15) Oonzapo dhaJehova ohadhi ‘simaneke aantu ayehe,’ kutya nduno oye li melongelokalunga lini. — 1 Petrus 2:17.