Mboka ya ninginithwa ye li Oonzapo dhaJehova, ihe ngashingeyi ihayu uvithile we yalwe, tashi vulika nokuli ihaaye endathana we natse, katu ya tonde. Ohatu yi kuyo nokukambadhala okupendutha ishewe ohokwe yawo miinima yopambepo.

 Ngele omuntu okwa yono eyono lya kwata miiti iha thikile owala ta kondwa. Ihe nando ongawo, omuntu ngoka a ninginithwa e li Onzapo ngele okwa yono oompango dhOmbiimbeli noina hala okwiiyela ombedhi, ota ka kondwa mo megongalo noitatu ka endathana naye. Ombiimbeli otayi popi sha yela tayi ti: “Umbii mo omuyoni mokati keni.” — 1 Aakorinto 5:13.

 Ongiini shi na ko nasha nomusamane ngoka a kondwa, ihe omukulukadhi gwe noyana oye li natango Oonzapo dhaJehova? Ekwatathano lyopalongelokalunga ndyoka a li e na noyaandjawo ohali lunduluka, ihe ohaya kala natango ye na ekwatathano molwaashoka aantu yomegumbo limwe. Ekwatathano lyopandjokana, ohole yokuhola yaandjawo nosho wo eendathano opo hayi kala natango.

 Aantu mboka ya kondwa otaya vulu okuya natango kokugongala kwetu. Ngele oya hala, ohaya vulu wo okupewa omayele kaakuluntugongalo. Elalakano olyo okukwathela omuntu ngoka a vule ishewe okuninga gumwe gwomOonzapo dhaJehova. Aantu mboka ya kondwa noye ekelahi eihumbato ewinayi nohayu ulike kutya oye na ehalo shili okukala pamithikampango dhOmbiimbeli ohaya taambiwa ko ya ninge ishewe iilyo yegongalo.