Oonzapo dhaJehova ohadhi landula omayele gOmbiimbeli ge na ko nasha nokwaalandula omalundilo agehe nomasheko. Pashiholelwa, Ombiimbeli oya popya mOmayeletumbulo tayi ti: “Ngoka ta kumagidha omusheki, oti isitha ohoni.” (Omayeletumbulo 9:7, 8; 26:4) Pehala lyokukala owala tatu tsu oompata molwaashoka twa lundilwa, ohatu gandja eitulomo kokukala twa hokiwa kuKalunga. — Episalomi 119:69.

 Odhoshili kutya Ombiimbeli otayi ti kutya opu na “ethimbo lyokumwena, nethimbo lyokupopya.” (Omuuvithi 3:7) Ohatu gandja eitulomo kaanamitima omiwanawa mboka ya hala okutseya oshili, ihe ohatu yanda okutsa oompata naantu. Kungawo ohatu landula omalongo nosho wo oshiholelwa shaJesus noshAakriste yopetameko.

•   Jesus ka li a yamukula, sho a li ta lundilwa koshipala shaPilatus. (Mateus 27:11-14; 1 Petrus 2:21-23) Natango, Jesus ka li a yamukula, sho a lundilwa kutya ye onkolwi nomufukedhi. Pehala lyaashono, oonkatu dhe odha li dhe ya sitha ohoni, naashoka oshi li metsokumwe nekotampango ndyoka tali ti: “Uunongo waKalunga owa hololwa kiilonga ye.” (Mateus 11:19) Poompito dhimwe, Jesus okwa li ha yamukula mboka taye mu lundile, uuna e wete sha pumbiwa. — Mateus 15:1-3; Markus 3:22-30.

   Jesus okwa longa aalanduli ye kaaya teke omukumo, uuna taya lundilwa. Okwa ti: “One aanelago, aantu ngele taye mu sheke, taye mu tidhagana, taye mu popile muuwinayi auhe nokufundja omolwandje.” (Mateus 5:11, 12) Jesus okwa ti wo kutya uuna aalanduli ye taya lundilwa, otashi ka kala ompito ombwanawa yokugandja uunzapo, nota ka gwanitha po euvaneko lye ndyoka tali ti: “Otandi ke mu pa iitya noondunge tadhi nyenge aatondi yeni ayehe oku mu kondjitha noku mu ludhikitha.” — Lukas 21:12-15.

•   Omuyapostoli Paulus okwa lombwela Aakriste ya yande okutsa oompata naantu mboka ye li ompinge, ‘omolwiinima mbyoka kaayi na oshilonga noitayi kwatha sha.’ — Titus 3:9; Aaroma 16:17, 18.

•   Omuyapostoli Petrus okwa ladhipika Aakriste ya popile eitaalo lyawo mpoka tashi wapa. (1 Petrus 3:15) Okwa tsa wo omuthindo kutya omukalo dhingi gwoku shi ninga, okupitila unene miilonga, ihe hamoohapu owala. Okwa nyola a ti: “Kalunga okwa hala, mu mweneke okupopya kwaagoya niilonga iiwanawa.” — 1 Petrus 2:12-15.