Tu li Oonzapo dhaJehova, ohatu longo nuudhiginini, opo tu tunge omaukwanegumbo getu nosho wo gayalwe. Otwa simaneka Kalunga ngoka oye a toto po elongekidho lyuukwanegumbo. (Genesis 2:21-24; Aaefeso 3:14, 15) Ohe tu longo omakotampango ngoka taga adhika mOmbiimbeli, ngoka ga kwathela aantu muuyuni awuhe ya kale ye na ondjokana ya kola nokukala mo ya nyanyukwa.

 Ohatu ningi ngaashi tatu vulu tu landule omayele gOmbiimbeli, oshoka ohage tu kwathele tu kale aasamane, aakulukadhi naavali ye li nawa. (Omayeletumbulo 31:10-31; Aaefeso 5:22–6:4; 1 Timoteus 5:8) Uunongo mboka tawu adhika mOmbiimbeli, ohawu kwathele nokuli nomaukwanegumbo ngoka ga topoka palongelokalunga ga pondole. (1 Petrus 3:1, 2) Tala shoka sha popiwa kuyamwe mboka kaaye shi Oonzapo, mboka ookuume kawo kopandjokana ya ningi Oonzapo dhaJehova:

•   Tate Clauir, gwokoBrazilia, okwa ti: “Omimvo hamano dhopetameko mondjokana yetu, okunyenyeta nokwiiyuvitha nayi ongoye owala to ti opuwo. Nonando ongawo, sho Ivete a ningi Onzapo yaJehova, okwa kala omunahole nomwiidhidhimiki. Omalunduluko ngoka a ningi, oga kwathela ondjokana yetu yaa teke.”

•   Meme Agness, gwokoZambia, okwa ti: “Sho omusamane gwandje, Chansa, a tameke okukonakona Ombiimbeli nOonzapo dhaJehova, osha li sha geyitha ndje, oshoka onda li tandi dhiladhila kutya ohadhi topola omaukwanegumbo gaantu. Ihe lwanima onde ke shi mona kutya Ombiimbeli oya kwathela lela ondjokana yetu yi kale yi li hwepo.”

 Sho hatu yi muukalele, ohatu ulukile aantu ooyakwetu nkene okutula miilonga uunongo womOmbiimbeli taku vulu oku ya kwathela

•   ya hogolole pandunge ookuume kawo kopandjokana

•   yi idhidhimikilathane omumvo gwawo gwotango mondjokana

•   yu ungaunge nawa nooyinamweno, noohemweno nosho wo noosuwala

•   ya kwate nawa iimaliwa

•   ya yande okunyenyeta

•   yi ilonge nkene ye na okudhimina po

•   ya dheule oyana

 Eeno, omathimbo gamwe ohashi etitha omaupyakadhi. Pashiholelwa, olopota yomo 1998 ndjoka ya li ya ningwa kehangano lyokuninga omapekapeko lyedhina Sofres, oya ti kutya ondjokana 1 yomoondjokana 20, moka mu na kuume kopandjokana Onzapo, omo owala mwa li uupyakadhi wa kwata miiti, sho aaihokani mboka ya topoka palongelokalunga.

 Jesus okwa li a hungeneke kutya mboka taya landula omalongo ge, otaya ka tsakaneka omashongo okuza kaakwanezimo omathimbo nomathimbo. (Mateus 10:32-36) Omunandjokonona Will Durant, okwa nyola kutya kohi yEpangelo lyaRoma, “Aakriste oya li haya lundilwa kutya otaya teya po omaukwanegumbo,” a oshinima shoka hashi tamanekelwa wo Oonzapo dhaJehova kunena. Mbela shika otashi ti kutya Oonzapo odho hadhi etitha okwaauvathana?

 Sho Ompangu yUuthemba wOmuntu yaEuropa ya konakona omalundilo ngoka taga ti kutya Oonzapo dhaJehova ohadhi teya po omaukwanegumbo, oya mono kutya iilyo yuukwanegumbo mbyoka kaayi shi Oonzapo, olundji oyo unene hayi etitha okwaauvathana, molwaashoka “ihayi taamba ko shoka sha tokolwa kugumwe gwaandjawo shi na ko nasha neitaalo lye noihayi mu simaneke.” Ompangu oya gwedha ko ya ti: “Oshinima shika osha ha moondjokana adhihe dhaamboka ya topoka palongelokalunga, ihe hamoondjokana owala moka mu na kuume kopandjoka gumwe e li Onzapo.” b Nonando Oonzapo odhi ungaungiwe nadho nayi, omolwelongelokalunga lyadho, ohadhi kambadhala okulandula omayele gOmbiimbeli ngoka taga ti: “Ngele ku na ngoka te mu ningile uuwinayi, inamu mu shunithila uuwinayi. . . . Ne yene kombinga yeni ningeni ashihe tamu shi vulu, mu kale nombili naantu ayehe.” — Aaroma 12:17, 18.

 Oonzapo ohadhi landula elombwelo lyomOmbiimbeli ndyoka tali ti otu na owala okuhokana nenge okuhokanwa ‘owala mOmuwa,’ sha hala okutya, okuya mondjokana naangoka gwomeitaalo lyadho. (1 Aakorinto 7:39) Shoka oshitegelelwa shopaMbiimbeli noshi na uuwanawa. Pashiholelwa, oshifo Journal of Marriage and Family shomo 2010, osha li shi na oshitopolwa tashi ti kutya “aaihokani mboka ye li melongelokalunga limwe, haya kutha ombinga momaipyakidhilo gopalongelokalunga ga faathana noye na eitaalo limwe,” ohaya kala lela ye na ekwatathano ewanawa mondjokana yawo. c

 Nonando ongawo, Oonzapo ihadhi ladhipike aantu yomeitaalo lyadho ye ethe po ookuume kawo kopandjokana mboka kaaye shi Oonzapo. Ombiimbeli otayi: “Omulumentu omukriste ngoka e na omukadhi kee shi omwiitaali, nomukadhi okwa zimina okukala naye, omulumentu ngoka ine mu henga po. Omukiintu omukriste ngoka a hokanwa komulumentu kee shi omwiitaali nokwa zimina okukala naye, nena omukiintu ngoka ine mu henga po.” (1 Aakorinto 7:12, 13) Oonzapo dhaJehova ohadhi vulika koshipango shoka.