Euvoko lya puka: Oonzapo dhaJehova ihadhi dhana Opaasa, molwaashoka kadhi shi Aakriste.

 Euvoko lyomondjila: Otwi itaala kutya Jesus Kristus oye Omuhupithi gwetu nohatu ningi oonkambadhala dha mana mo opo tu “landule ondjila ndjoka a li e yi ende.” — 1 Petrus 2:21; Lukas 2:11.

 Euvoko lya puka: Inamu itaala kutya Jesus okwa yumudhwa kuusi.

 Euvoko lyomondjila: Otwi itaala kutya Jesus okwa yumudhwa; otu shi kutya eyumuko lye olya simanenena keitaalo lyAakriste nohatu li popi sho tatu uvithile aantu. — 1 Aakorinto 15:3, 4, 12-15.

 Euvoko lya puka: Ihamu kala mu na ko nasha sho aanona yeni taya pitililwa po komainyanyudho gOpaasa.

 Euvoko lyomondjila: Otu hole aanona yetu; ohatu ningi kehe shimwe tatu vulu tu ya dheule noku ya kwathela ya kale ya nyanyukwa. — Titus 2:4.

•   Omukalo ngoka Opaasa hayi dhanwa itagu tsu kumwe nOmbiimbeli.

•   Jesus ka li a lombwele aalongwa ye ya dhimbulukwe eyumuko lye, ihe eso lye. Ohatu dhimbulukwa eso lye omumvo kehe twi ikolelela kokalindeli kOmbiimbeli. — Lukas 22:19, 20.

•   Otwi itaala kutya iinima mbyoka hayi ningwa pOpaasa kunena, ya za kiituthi yonale yi na ko nasha noluvalo, oya ningitha Opaasa yi kale inaayi hokiwa kuKalunga. Kalunga ngoka “omulaadhi” nenge omukodhi okwa hala tu mu longele oye awike nohu uvithwa nayi kelongelokalunga ndyoka tali longo iilonga mbyoka inaa hokwa. — Eksodus 20:5; 1 Aakwaniilwa 18:21.

 Otwi itaala kutya etokolotoko lyetu okukala ihaatu dhana Opaasa olya kankamena lelalela kOmbiimbeli, ndjoka tayi tu ladhipike tu “dhiginine owino neuveko,” pehala lyokulandula owala omithigululwakalo dhopantu. (Omayeletumbulo 3:21; Mateus 15:3) Nonando ohatu kundathana nayalwe shoka twi itaala kombinga yOpaasa ngele oye tu pula, otwa simaneka wo uuthemba womuntu kehe wokutokola okuninga shoka a hala. — 1 Petrus 3:15.