Oshike hashi ningwa po poshituthihango shOonzapo dhaJehova?
Oohango dhOonzapo dhaJehova olundji ohadhi kala paunathangwa nopalandulathano, nohapu gandjwa oshipopiwa oshifupi sha kankamena kOmbiimbeli. Lwanima otashi vulika wo ku landule oshituthi tashi ningilwa pehala lyontumba, mpoka hapu vulu wo okukala sha shokulya noshokunwa. a Jesus naye okwa li a yi koshituthihango muKana, petameko lyuukalele we. — Johannes 2:1-11.
Oshike hashi ningwa po pethimbo lyoshituthihango?
Oshinima sha simana shoka hashi ningwa po, ohapu gandjwa oshipopiwa shohango, shoka hashi kala uule wominute 30 nohashi gandjwa kOnzapo yaJehova. Oshipopiwa shoka shopahole notashi tungu ohashi tsu omuthindo nkene Ombiimbeli tayi vulu okukwathela aaihokani, opo ya kale ye na ondjokana tayi kalelele, yi na ombili nenyanyu. — Aaefeso 5:33.
Miilongo oyindji, omapangelo oga pitika Oonzapo dhaJehova dhi hokanithe. Omolwoshinima shoka, lwopehulilo lyoshipopiwa, mboka taya hokana ohaya ningi egano. Ohaya vulu wo okuzalekathana oolinga. Opo nduno naku ya hokanitha ta ningi etseyitho kutya ngashingeyi oya ninga omusamane nomukulukadhi.
Miilongo yilwe, epangelo olyo hali hokanitha mboka ya hala okuhokana. Aaihokani ohaya yi ko komeho yethimbo, manga oshipopiwa shohango inaashi gandjwa. Ngele aaihokani inaya ninga egano sho ya hokanene koombelewa dhepangelo, otaya vulu oku shi ninga pehulilo lyoshipopiwa. Ngele oya ninga egano, otaya vulu oku li endulula, taye shi ningi mepitathimbo. Pehulilo lyoshipopiwa ohapu ningwa egalikano, taku pulwa Kalunga a yambeke aaihokani mboka aape.
Oonzapo dhaJehova ohadhi ningile oohango dhadho peni?
Oonzapo odhindji ohadhi hogolola okupewa oshipopiwa shohango mOshinyanga shUukwaniilwa, ngele opu na. b Ngele aaihokani oya hala oku ka tyapula oshituthihango shawo lwanima, ohaya hogolola oku ke shi ningila kehala lilwe.
Oolye taya vulu okukala po?
Ngele oshipopiwa shohango otashi gandjelwa pOshinyanga shUukwaniilwa, kehe gumwe okwa manguluka okukala po kutya nduno Onzapo nenge ke shi Onzapo. Ngele aaihokani oye na mpoka taya ka tyapulila ohango yawo, oyo yene haya hogolola mboka taya ka tyapula pamwe nayo.
Aakalipo otaya vulu okuzala ngiini?
Nonando ohango yi li pOshinyanga shUukwaniilwa ihaayi kala yi na omuzalo gwokondandalunde, Oonzapo dhaJehova ohadhi kambadhala okulandula shoka Ombiimbeli tayi ti kombinga yokuzala omizalo ndhoka dhi shi okutalwa notadhi opalele. Ohadhi kala dha pandula, uuna yalwe taya zala momukalo gwa faathana. (1 Timoteus 2:9) Odhoshili kutya omakotampango ga faathana ohaga longo wo nopethimbo lyetyapulo lyoshituthihango, ngele opu na ompito ya tya ngawo.
Ohapu gandjwa ngaa omagano?
Ombiimbeli otayi tu ladhipike tu kale hatu gandja nehalo ewanawa. (Episalomi 37:21) Oonzapo dhaJehova ohadhi nyanyukilwa okugandja nosho wo okutaamba omagano, pethimbo lyoshituthihango. (Lukas 6:38) Nonando ongawo, Oonzapo ohadhi yanda okupula omagano nenge okutseyitha omadhina gaamboka ya gandja omagano. (Mateus 6:3, 4; 2 Aakorinto 9:7; 1 Petrus 3:8) Iikala mbyoka kayi li metsokumwe nOmanyolo notayi vulu wo okuningitha yamwe ya kale inaaya manguluka.
Ohapu dhengwa uuhalasa kumwe?
Aawe. Oonzapo dhaJehova ihadhi dhenge uuhalasa kumwe, molwaashoka oshinima shoka osha ziilila komithigululwakalo dhomalongelokalunga giifundja. c Oonzapo ohadhi halele aaihokani omayambeko momikalo dhilwe.
Ohapu umbwa olwiishi nenge sha shilwe?
Aawe. Momahala gamwe, aantu ohaya umbile aafuko olwiishi, iilya nenge sha shilwe. Ohaye shi ningi, oshoka oyi itaala kutya iinima mbyoka otayi vulu okweetela aafuko elago, enyanyu nokukala nomwenyo omule. Ihe Oonzapo dhaJehova ohadhi yanda kehe shimwe sha kwatathana niidhila. Shika osha kwatela mo okuhalela yalwe elago, shoka kaashi li metsokumwe nomakotampango gOmbiimbeli. — Jesaja 65:11.
Ohapu kala ngaa okulya nokunwa?
Pethimbo lyoshipopiwa kOshinyanga shUukwaniilwa, ihapu kala iikulya niikunwa. Aafuko yamwe ohaya hogolola ya kale ye na lwanima okulya nokunwa pehala lyontumba. (Omuuvithi 9:7) Ngele oya tokola pu kale omalovu, ohaya shilipaleke kutya otaga ka kala ge eleka notaga ka pewa owala mboka ye na omimvo ndhoka dha pitikwa omuntu a nwe omalovu. — Lukas 21:34; Aaroma 13:1, 13.
Ohapu dhanwa ngaa oongalo nenge pu ndaaniswe?
Ngele aafuko oye na mpoka taya ka tyapulila oshituthihango shawo, otaya vulu okuhogolola ya kwatele mo oongalo nokundanisa. (Omuuvithi 3:4) Oongalo ndhoka taya hogolola, ohadhi kala dhi shi okupulakenwa, nohaya hogolola ndhoka ye hole nodhi holike meputuko lyawo. Pethimbo lyoshipopiwa kOshinyanga shUukwaniilwa, olundji ohamu kala mwa kwatelwa omaimbilo ga kankamena kOmbiimbeli.
Oonzapo dhaJehova ohadhi ningi ngaa oshituthidhimbuluko shohango?
Molwaashoka omakotampango gOmbiimbeli inaga pitika go inaga indika iituthidhimbuluko yoohango, aaihokani Oonzapo oyo yene haya tokola ngele otaye shi dhimbulukwa nenge hasho. Ngele oya tokola oku shi dhimbulukwa, otaya vulu oku shi ninga ye li oyo ayeke nenge nookuume nosho wo aakwanezimo.
a Omikalondjigilile dhokondandalunde niitegelelwa yopaveta, otashi vulika yi kale ya yoolokathana shi ikolelela komahala gi ili nogi ili.
b Omumwatate ngoka ta gandja oshipopiwa iha pula ofuto yasha, na ihaku pulwa ku futwe Oshinyanga shUukwaniilwa.
c Ngele owa hala uuyelele wa gwedhwa po kombinga yaampoka pwa ziilila omukalo gwoshipagani gwokudhenga uuhalasa kumwe, tala oshitopolwa “Omapulo ga za kaaleshi,” mOshungolangelo yOshiingilisa yo 15 Febuluali 2007.
Opu na ishewe uuyelele mbuka
OKUGONGALA
Oshike hashi ningwa pokugongala kwOonzapo dhaJehova?
Tala okavidio haka wu shi imonene ngoye mwene.
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Mbela Oonzapo dhaJehova odhi na oompango kombinga yokweendelathana?
Mbela okweendelathana omukalo owala gwokwiinyanyudha nenge ogu vulithe po mpoka?
KOMBINGA YETU
Okugongala kwegongalo kwOonzapo dhaJehova
Tseya mpoka hatu gongala nosho wo nkene hatu longele Kalunga.