Aawe. Oonzapo dhaJehova kadhi li ompinge notuntila. Otwa tala ko okutuntilwa ku li etokolo ndyoka Omukriste kehe e na okuninga paumwene. Oonzapo dhaJehova odhindji ohadhi hogolola okutuntilwa.

 Ohatu kongo epango lyomungunda nohatu kala twa pandula omahumokomeho ogendji ngoka haga ningwa muunamiti, nelalakano lyokushunitha pevi omikithi ndhoka dha nika oshiponga. Otwa pandula kiilonga yuudhiginini mbyoka hayi longwa koondohotola naapangi, unene tuu pomathimbo omadhigu.

 Oonzapo dhaJehova ohadhi longele kumwe naayakuli yopaunamiti. Pashiholelwa, okuza ngaa sho omukithi gwo-COVID-19 gwa tukuka muuyuni, Oonzapo dhaJehova odha kala nokunyanyangidha uuyelele momalaka omathele kepandja ndika lyokointaneta, tadhi ladhipike aantu ya vulike komilandu dhi na ko nasha negameno, ndhoka dha tulwa po miitopolwa yawo. Omilandu ndhika odha kwatela mo esimano lyokwiikala kokule oshinano shontumba, okukala momwaalu ngoka gu uthwa uuna mu li ongundu, okwiikalekelwa, okwiiyonga komake, okuzala uulapi wokwiisikila kokana nokomayulu nosho wo dhilwe ndhoka dha tulwa po komapangelo. — Aaroma 13:1, 2.

 Uule womimvo omilongo, iileshomwa yOonzapo dhaJehova oya kala tayi tsu omuthindo omakotampango taga landula:

•   Omuntu kehe oye mwene e na okuninga etokolo li na ko nasha nepango lye. — Aagalati 6:5.

   Oshifo Penduka mo! shomasiku 8 Febuluali 1987, osha ti: “Itashi popile omuti gwontumba nenge epango lyontumba kutya olyo li vule omakwawo noitashi gandja omayele ge na ko nasha nuunamiti. Elalakano lyasho, okugandja uuyelele nokweethela etokolo momake gomuleshi, ano oye a tale kutya ota ningi po shike.”

   Oshifo Penduka mo! shomasiku 22 Auguste 1965, osha ti: “Oshi li etokolo lyomuntu ye mwene, ngele ye noyana oya hala okutuntilwa.”

•   Ohatu ka konga epango lyopaunamiti, oshoka otwa lenga omwenyo. — Iilonga 17:28.

   Oshungolangelo yOshiingilisa yesiku 1 Juli 1975, oya ti: “Uuna Oonzapo dhaJehova tadhi ehama, ohadhi ka konga ekwatho lyopaunamiti koondohotola yi ili noyi ili. Odhi hole omwenyo nohadhi ningi ngaashi tadhi vulu shi ikolelela kOmanyolo, opo dhi gu kaleke po.”

   Oshungolangelo yOshiingilisa yesiku 1 Febuluali 2011, oya ti: “Oonzapo dhaJehova ohadhi taamba ko nehalo ewanawa omiti nenge epango lyopaunamiti. Odha hala okukaleka po uukolele wadho nokulelepeka onkalamwenyo yadho. Ngaashi Lukas, Omukriste gwomethelemumvo lyotango, Oonzapo dhaJehova dhimwe kunena nadho oondohotola. . . . Odhoshili kutya Oonzapo dhaJehova ohadhi kala dha pandula iilonga yuudhiginini yaamboka haya gandja ekwatho lyopaunamiti. Ohadhi kala wo dhe ya pandula, omolwekwatho ndyoka hadhi pewa, e tadhi ti po hwepo.”