Ohatu yalula Oonzapo dhaJehova twa kwatela mo owala mboka haya kutha ombinga mokuuvitha onkundana ombwanawa yUukwaniilwa waKalunga omwedhi kehe. (Mateus 24:14) Shika osha kwatela mo Oonzapo ndhoka dha ninginithwa nosho wo mboka inaaya ninginithwa, ihe oya gwana okukutha ombinga miilonga yokuuvitha.

 Hasho nando. Omayambidhidho hago hagu utha kutya omuntu okwa gwana okuyalulwa e li Onzapo nenge a mone oshinakugwanithwa shontumba nenge uuthembahenda mehangano lyetu. (Iilonga 8:18-20) Olundji omayambidhidho ohaga gandjwa nopwaa na okutseyithila yalwe. Onzapo kehe ohayi yamba po ethimbo lyayo, oonkondo dhayo niiniwe yayo kiilonga yetu yomuuyuni awuhe, shi ikolelela kehalo lyayo nokonkalo.—2 Aakorinto 9:7.

 Omwedhi kehe, Oonzapo ohadhi gandja oolapota dhiilonga yadho yokuuvitha kegongalo lyadho lyomoshitopolwa. Oolapota ndhoka ohaye dhi gandja nehalo ewanawa.

 Egongalo ohali gongele oolapota ndhoka, e tali tumu omuyalu aguhe kumwe koshitayimbelewa shoka tashi li tonatele. Oshitayimbelewa ohashi tumu omiyalu dhoshilongo kehe nenge dhoshitopolwa kehe koombelewa dhetu oonene muuyuni.

 Pehulilo lyomumvo gwiilonga kehe, a omwaalu gwOonzapo dhomoshilongo kehe gwomumvo ngoka, ohagu ndhindhilikwa. Omiyalu ndhoka ohadhi tulwa kumwe, opo ku monike kutya Oonzapo dhaJehova odhi li ngapi muuyuni awuhe. Oolapota dhoshilongo kehe ohadhi tulwa kepandja lyetu lyokointaneta, kohi yoshitopolwa “Iilonga yOonzapo dhaJehova.” Oolapota ndhoka ohadhi tu tsu omukumo, ngaashi owala ndhoka dha li dha tsu omukumo Aakriste yopetameko.—Iilonga 2:41; 4:4; 15:3.

 Nonando aantu mboka ihatu ya kwatele momiyalu dhOonzapo, ohatu ya taamba ko momagongalo getu. Oyendji yomuyo ohaya dhimbulukwa pamwe natse Edhimbuluko lyeso lyaKristus, onkee ano omwaalu gwaamboka haya kala pEdhimbuluko ohagu kala ogundji, molwaashoka ogwa kwatela mo Oonzapo naamboka kaaye shi Oonzapo. Mo 2023, omwaalu gwaamboka ya li pEdhimbuluko ogwa li 20 461 767.

 Oyendji mboka ihaaya gongala pamwe natse, ohaya mono mo uuwanawa mokukonakona Ombiimbeli natse oshali. Mo 2023, otwa ninga omakonakonombiimbeli 7 281 212 omwedhi kehe, nagamwe oga li ga ningwa naantu ya yoolokathana pethimbo limwe.

 Aantu mboka haya tumwa kepangelo ya yalule aantu, olundji ohaye shi ningi mokupula aantu kutya ohaya yi kelongelokalunga lini. Pashiholelwa, ehangano lyomoAmerika li na ko nasha nomayalulo gaantu, olya ti kutya “eyalulo lyawo ohali ulike kutya aantu oyi itala ko aayambidhidhi yelongelokalunga lyomoshitopolwa shawo.” Olya gwedha ko wo kutya iizemo yomayalulo “oyi ikolelela komadhiladhilo gopaumwene, ihe hakuushili.” Mepingathano naashono, aantu mboka hatu yalula ye li Oonzapo dhaJehova, oomboka owala haya uvithile yalwe nohaya gandja oolapota dhawo dhi na sha niilonga yokuuvitha, ihe haamboka yi itala ko ye li Oonzapo.