Tu li Oonzapo dhaJehova, ohatu kambadhala okukala Aakriste mboka ye li metsokumwe naashoka Jesus a longa aantu nokulonga shoka shi li metsokumwe naashoka sha li sha longwa kaayapostoli. Oshitopolwa shika osha popya paufupi iinima mbyoka twa itaala.

1.   Kalunga. Ohatu longele Omushiti, Kalunga kashili gumwe noku li Omunankondoadhihe, ngoka edhina lye Jehova. (Episalomi 83:18; Ehololo 4:11) OKalunga kaAbraham, Moses naJesus. — Eksodus 3:6; 32:11; Johannes 20:17.

2.   Ombiimbeli. Ombiimbeli otwe yi tala ko yi li etumwalaka lyaKalunga lya nwethwa mo, ndyoka a pa aantu. (Johannes 17:17; 2 Timoteus 3:16) Shoka twi itaala osha kankamena komamboMbiimbeli agehe 66, ngoka ga kwatela mo “Etestamendi Ekulu” nosho wo “Etestamendi Epe.” Omuprofesoli Jason D. BeDuhn okwa yelitha shoka, sho a nyola kutya Oonzapo dhaJehova odha kankamena “eitaalo lyadho nosho wo iilonga yadho kwaashoka lela Ombiimbeli tayi longo, nopwaa na okutokola kudho dhene kuyele kutya Ombiimbeli osho yi na okukala tayi ngawo.” a

    Omanga twa taamba ko shoka sha popiwa mOmbiimbeli ayihe, shoka otashi ulike kutya shoka twi itaala oshi na ekankameno. Otwa ndhindhilika wo kutya iitopolwa yOmbiimbeli yimwe oya nyolwa momukalo gwopathaneko nokayi na okuuviwa ko ngaashi ya nyolwa. — Ehololo 1:1.

3.   Jesus. Ohatu landula omalongo gaJesus Kristus nosho wo oshiholelwa she, notwe mu simaneka e li Omuhupithi gwetu noku li Omuna gwaKalunga. (Mateus 20:28; Iilonga 5:31) Onkee, tse Aakriste. (Iilonga 11:26) Nonando ongawo, otwi ilonga mOmbiimbeli kutya Jesus haye Kalunga Omunankondoadhihe nonokutya elongo lyUukwatatu inali kankamena kOmanyolo. — Johannes 14:28.

4.   Uukwaniilwa waKalunga. Uukwaniilwa owo epangelo lyo lela ndyoka li li megulu, ihe kawu shi oshinima shi li momitima dhAakriste. Otawu ka pingena po omapangelo agehe gopantu nokugwanitha po elalakano lyaKalunga li na ko nasha nevi. (Daniel 2:44; Mateus 6:9, 10) Shoka oshi li pokuningwa masiku, na Ombiimbeli oya hunganeka kutya otu li ‘momasiku gahugunina.’ — 2 Timoteus 3:1-5; Mateus 24:3-14.

    Jesus oye Omukwaniilwa gwUukwaniilwa waKalunga megulu. Okwa tameka okupangela mo 1914. — Ehololo 11:15.

5.   Ehupitho. Ekuliloyambo lyaJesus olye shi ningitha tashi wapa, opo tu mangululwe mo muulunde nomeso. (Mateus 20:28; Iilonga 4:12) Opo aantu ya mone mo uuwanawa mekulilo ndyoka, kaye okukala owala yi itaala muJesus, ihe oye na wo okuninga omalunduluko moonkalamwenyo dhawo, e taya ninginithwa. (Mateus 28:19, 20; Johannes 3:16; Iilonga 3:19, 20) Iilonga yomuntu ohayi ulike kutya eitaalo lye oli na omwenyo. (Jakob 2:24, 26) Nonando ongawo, ehupitho itali vulu okulongelwa, ihe otatu li mono okupitila ‘mesilohenda lyaKalunga.’ — Aagalati 2:16, 21.

6.   Egulu. Jehova Kalunga, Jesus Kristus nosho wo aayengeli aadhiginini oye li megulu. b (Episalomi 103:19-21; Iilonga 7:55) Okangundu okashona kaantu 144 000, otaya ka yumudhwa ya kale nomwenyo megulu noya pangele pamwe naJesus mUukwaniilwa. — Daniel 7:27; 2 Timoteus 2:12; Ehololo 5:9, 10; 14:1, 3.

7.   Evi. Kalunga okwa shita evi li kale ehala lyokukala aantu sigo aluhe. (Episalomi 104:5; 115:16; Omuuvithi 1:4) Kalunga ota ka yambeka aantu mboka haya vulika nomalutu ge na uukolele noku ka kala nomwenyo gwaaluhe meviparadisa. — Episalomi 37:11, 34.

8.   Uukolokoshi nosho wo okumona iihuna. Uupyakadhi mbuka owa tameke, sho omuyengeli gumwe gwaKalunga a tokola kaa vulike kuye. (Johannes 8:44) Omuyengeli ngoka lwanima okwe ki ithanwa “Satana” nosho wo “Omuhindadhi,” ngoka a heke aaihokani yotango ya game kombinga ye. Shoka oshe etitha iilanduliko yinikitha oluhodhi mbyoka wo natse ye tu guma tu li oluvalo lwayo. (Genesis 3:1-6; Aaroma 5:12) Opo ku monike ngele shoka Satana a popi oshi li ngaa mondjila, Kalunga okwe etha uukolokoshi nosho wo okumona iihuna ku kale po, ihe ite ke yi etha yi tsikile okukala po sigo aluhe.

9.   Eso. Aantu mboka ya sa, ihaya kala po we. (Episalomi 146:4; Omuuvithi 9:5, 10) Ihaya kala taya pi momulilo gwoheli.

    Kalunga ota ka yumudha aantu omabiliyona. (Iilonga 24:15) Nonando ongawo, aantu mboka taya ka tinda okwiilonga kombinga yomithikampango dhaKalunga konima ngele ya yumudhwa, otaya ka hanagulwa po sigo aluhe noitaya ka kala we ye na etegameno lyokuyumudhwa. — Ehololo 20:14, 15.

10.   Uukwanegumbo. Ohatu kala metsokumwe nomithikampango dhaKalunga dhi na ko nasha nondjokana kutya oyi na okukala pokati komulumentu gumwe nomukiintu gumwe, noye na owala okuhengana ngele shila gumwe a yi pondje yondjokana. (Mateus 19:4-9) Otu na uushili kutya uunongo mboka tawu adhika mOmbiimbeli ohawu kwathele aanegumbo ya pondole. — Aaefeso 5:22–6:1.

11.   Okulongela kwetu Kalunga. Ihatu galikana omushigakano nenge iimenka yontumba. (Deuteronomium 4:15-19; 1 Johannes 5:21) Okulongela kwetu Kalunga okwa kwatela mo iinima ya simana tayi landula:

    •   Okugalikana kuKalunga. — Aafilippi 4:6.

    •   Okulesha nokukonakona Ombiimbeli. — Episalomi 1:1-3.

    •   Okutedhatedha kwaashoka twi ilonga mOmbiimbeli. — Episalomi 77:12.

    •   Okugongala pamwe tu galikane, tu konakone Ombiimbeli, tu imbe, tu popye kombinga yeitaalo lyetu notu tse omukumo ooitaali ooyakwetu nosho wo yalwe. — Aakolossa 3:16; Aahebeli 10:23-25.

    •   Okuuvitha “elaka . . . etoye lyOshilongo.” — Mateus 24:14.

    •   Okukwathela mboka ye li mompumbwe. — Jakob 2:14-17.

    •   Okutunga nokukaleka po Iinyanga yUukwaniilwa nosho wo omatungo galwe ngoka haga longithwa mokuhumitha komeho iilonga yetu yokulonga aantu Ombiimbeli muuyuni awuhe. — Episalomi 127:1.

    •   Okukutha ombinga mokukwathela mboka ya dhengwa kiiponga. — Iilonga 11:27-30.

12.   Ehangano lyetu. Otu li momagongalo ngoka gu unganekwa nawa, negongalo kehe ohali tonatelwa kolutu lwaakuluntugongalo. Nonando ongawo, aakuluntugongalo kaye shi aasita noihaya futwa. (Mateus 10:8; 23:8) Ihatu gandja iitimulongo noihapu umbwa ongalo pokugongala kwetu. (2 Aakorinto 9:7) Iilonga yetu ayihe ohayi ambidhidhwa nomayambidhidho ngoka kaapu na ngoka ha kala e shi kutya otwa gandja shi thike peni.

     Olutuwiliki, ndoka lwa thikama po mokangundu okashona kAakriste ya pyokoka mboka haya longo koombelewa dhetu oonene, ohalu gandja omalombwelo kOonzapo dhaJehova muuyuni awuhe — Mateus 24:45.

13.   Uukumwe wetu. Otwa hangana muuyuni awuhe meitaalo lyetu. (1 Aakorinto 1:10) Ohatu longo wo nuudhiginini, opo kaatu kale twa topoka omolwonkalathano, omuhoko, uukwashigwana nenge oondondo. (Iilonga 10:34, 35; Jakob 2:4) Nonando ongawo, ehogololo lyokukaleka po uukumwe wetu oli li miikaha yetu yene. Onzapo kehe ohayi ningi omatokolo metsokumwe neiyuvo lyayo ndyoka lya dheulwa kOmbiimbeli. — Aaroma 14:1-4; Aahebeli 5:14.

14.   Eihumbato lyetu. Ohatu kambadhala okuulika ohole yashili miilonga yetu. (Johannes 13:34, 35) Ohatu yanda okulonga shoka Kalunga e tonde, mwa kwatelwa elongithonayi lyombinzi, ano oku yi tulwa momalutu getu. (Iilonga 15:28, 29; Aagalati 5:19-21) Otu li aanambili noihatu kutha ombinga miita. (Mateus 5:9; Jesaja 2:4) Otwa simaneka omapangelo giilongo moka tu li nohatu vulika koompango dhago, shampa owala itaadhi tu ningitha tu yone oompango dhaKalunga. — Mateus 22:21; Iilonga 5:29.

15.   Ekwatathano lyetu nayalwe. Jesus okwe tu lombwela a ti: “Hola mukweni ngaashi ngoye wi ihole mwene.” Okwa ti wo kutya Aakriste “kaye shi yomuuyuni” mbuka. (Mateus 22:39; Johannes 17:16) Onkee ano, ohatu kambadhala ‘okuningila kehe gumwe uuwanawa.’ Nonando ongawo, ihatu kutha ombinga miinima yopapolitika nohatu yanda okwiipuma mumwe nomalongelokalunga galwe. (Aagalati 6:10; 2 Aakorinto 6:14) Ihe otwa simaneka omatokolo gayalwe miinima mbyoka. — Aaroma 14:12.

 Ngele owu na omapulo ga gwedhwa po kombinga yaashoka Oonzapo dhaJehova dhi itaala, oto vulu okulesha uuyelele owundji kombinga yetu kepandja lyetu lyokointaneta, okukwatathana nayimwe yomoombelewa dhetu, okugongala pamwe natse pOshinyanga shUukwaniilwa shoka shi li popepi nangoye nenge wu popye nOnzapo yomoshitopolwa sheni.