Onda valelwa moshilando Calgary moshitopolwa Alberta, moKanada. Sho nda li okahanona, aavali yandje oya hengana, ngame nameme e tatu tembukile kegumbo lyookuku mboka ya vala meme. Ookuku oya li ye tu hole nameme, nonda li handi kala nda nyanyukwa pethimbo nda li okanona. Natango ohandi dhimbulukwa ethimbo ndyoka ewanawa.

 Sho ndi na omimvo heyali, onkalamwenyo yandje oya ende tayi ningi ondhigu, sho meme natate ya hokanununa e tatu tembukile ko St. Louis moshitopolwa Missourin, moAmerika. Nziya konima yaashono, onda li nde shi mono mo kutya tate oku na onyanya. Pashiholelwa, esiku lyandje lyotango nda za kosikola hoka nda tembukila, tate okwa li a mono kutya onda hindwa ihe inandi ninga po sha. Shoka osha li she mu geyitha, nokwa li a latha ndje uupuka shi vulithe nokuli nopuunona mboka wa li wa hindi ndje. Shoka onde shi kwatele onkone, nonda tameke okukala handi kondjo nuunona kosikola, pethimbo owala ndi na omimvo heyali.

 Iikala iiwinayi yatate oya li hayi uvitha nayi meme, naashoka osha li hashi etitha oontamanana pokati kawo. Sho ndi na omimvo 11, onda tameke okulongitha iingangamithi niikolitha. Onda ende tandi ningi omuhahu, nolundji onda kala handi kondjo naantu momapandaanda. Sho nda mana osikola, okulonga omiyonena okwa li kwa lundulula ndje thiluthilu.

 Sho ndi na omimvo 18, onda yi metanga limwe lyuukwiita lyo-Marine Corps, moAmerika. Metanga moka onda li nda dheulwa nkene ndi na okudhipaga aantu. Konima yomimvo ntano, onde li thigi po nonde ki ilongela uutseyimwenyo, opo ndi vule okukonga iilonga yimwe yi na ko nasha nokuninga omakonakono haga ithanwa Federal Bureau of Investigation. Onda li nda tameke neilongo lyandje kouniveesiti moAmerika, nonda tsikile nalyo koKanada, sho nda tembukile ko.

 Sho ndi li kouniveesiti hoka, onda li ndu uvithwa nayi noonkondo kaantu. Aantu oya li yi ihole yo yene, iinima muuyuni oya li tayi monika yaa na oshilonga nomaupyakadhi muuyuni oga li taga monika itaaga vulu okukandulwa po. Kanda li we ndi na einekelo kutya aantu otaya vulu okukaleka uuyuni ehala li li hwepo.

 Kanda li ndi na elalakano monkalamwenyo. Onkee onda tameke okugandja eitulomo kokunwa omalovu, kokulongitha iingangamithi, kokwiikongela oshimaliwa oshindji nokuya momilalo dha nyata. Onda li ndi hole okuya kuututhi nonda li ndi hole aakiintu shimwe to nyengwa. Edheulo ndyoka nda mona muukwiita, olya ningitha ndje ndi kale ndi hole omalugodhi. Onda li ndi iwete ndi shi shoka shi li mondjila nosha puka, onkee onda li handi vulu okulombwela omuntu kutya shoka ta ningile yalwe kashi li pauyuuki. Paushili wo wene, onda li ndi hole elongithonkondo nonda ende owala tandi nayipala.

 Esiku limwe manga ngame nakuume kandje twa li tatu longitha iingangamithi mela lyomevi maandjetu notwa li tatu longekidha tu tume omapangwe gokulanditha, ngoka ga li inaaga pitikwa, kuume kandje okwa pula ndje ngele onda itaala muKalunga. Onde mu yamukula nda ti: ‘Ngele Kalunga oye ha etitha okumona iihuna muuyuni, inandi hala oku mu tseya!’ Esiku lya landula sho nda yi kiilonga yandje iipe, omuniilonga pamwe nangame ngoka e li Onzapo yaJehova, okwa pula ndje a ti: “Mbela sho to dhiladhila Kalunga oye he tu etele okumona iihuna hoka ku li muuyuni?” Epulo ndyoka olya li lya kumitha ndje, omolwoshinima shoka opo nda adhika nda popi esiku lya tetekela. Onkee onda li nda hala okuuva oshindji. Muule woomwedhi hamano dha ka landula ko, otwa kala tatu kundathana iinima oyindji, nokwa li a ulukile ndje omayamukulo okuza mOmbiimbeli gomapulo gandje omadhigu, ngoka nda li ndi na kombinga yonkalamwenyo.

 Omuyalekwa gwandje ngoka nda li ndi li naye pethimbo ndyoka, ka li a hala ndi mu kuthile ko kombinga yaashoka nda li tandi ilongo. Osoondaha yimwe onde mu lombwele kutya onda hiya Oonzapo kegumbo lyetu dhi konakone natse Ombiimbeli. Esiku lya landula sho nda zimbuka kiilonga, onda adha a kutha mo iinima ayihe megumbo e ta yi noondjila dhe. Onda yi pondje nonda li te hukula ehodhi. Onda li wo nda galikana kuKalunga noku mu pula ekwatho. Shoka osho sha li oshikando shotango tandi tumbula edhina lyaKalunga, Jehova, megalikano. — Episalomi 83:18, NW.

 Konima yomasiku gaali, onda tameke okukonakona Ombiimbeli oshikando shandje shotango naaihokani yamwe Oonzapo. Konima sho ya yi, onda tsikile okulesha embo Ngoye Oto Vulu Okukala nOmwenyo Sigo Aluhe mOparadisa kombanda yEvi, e tandi li mana ko uusiku mboka. a Shoka ndi ilongo kombinga yaJehova Kalunga nosho wo Omwana, Jesus Kristus, osha li sha gumu ndje komutima. Onda li nda mono kutya Jehova omunalukeno noha kala e uvite nayi, uuna tatu mono iihuna. (Jesaja 63:9) Onda li unene nda gumwa kohole yaKalunga yokuhola ndje nokeyambo ndyoka Omwana a gandja, omolwandje. (1 Johannes 4:10) Onda li nda thiki pehulithodhiladhilo kutya Jehova okwa kala nokwiidhidhimikila ndje “oshoka ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Petrus 3:9) Onda li ndi uvite kutya Jehova ota hilile ndje kuye. — Johannes 6:44.

 Oshiwike shoka osho nda tameke okuya kokugongala. Onda li ndi na omafufu omale, handi zala uutenda neholokopo lyandje olya li etilithi. Nonando ongawo, Oonzapo odha li dha ungaunga nangame nawa, nda fa owala omukwanezimo gwadho ngoka inaadhi mona ethimbo nuule. Odha li lela dha ulike kutya odhi li Aakriste yashili. Onda li ndi uvite nda fa ndi li kegumbo nookuku, nenge nokuli ndi tye momudhingoloko omwaanawa kaaku na we.

 Iinima mbyoka nda li tandi ilongo mOmbiimbeli, oya li ya kwathele ndje ndi ninge omalunduluko nziya. Omafufu gandje onde ga tete ko, onda etha po okuya momilalo dha nyata, okulongitha iingangamithi nokunwa sha pitilila. (1 Aakorinto 6:9, 10; 11:14) Onda li nda hala okunyanyudha Jehova. Onkee sho ndi ilongo kutya iinima yimwe mbyoka nda li handi ningi oku yi tonde, onde yi etha po pehala lyoku yi ipwililikila, nonando kasha li oshipu. Onda li handi ipopile tandi ti: ‘Itandi vulu we okwiihumbata ngeyi.’ Onda li nda kambadhala okulundulula okudhiladhila kwandje noonkantu dhandje nopwaa na okukakadhala. Oshizemo, onda li nda mono nziya kutya onkalamwenyo yandje otayi ende tayi hwepopala, omolwokuninga iinima momukalo ngoka Jehova a hokwa. Onda li nda ninginithwa mo 29 Juli 1989, konima yoomwedhi hamano okuza sho nda tameke okukonakona Ombiimbeli.

 Ombiimbeli oya kwathela ndje ndi lundulule iikala yandje. Monakuziwa, olundji uuna nda tsakanene nomugeyintu, onda li handi mu ihumbatele nayi. Ihe ngashingeyi ohandi ningi ngaashi tandi vulu ndi kale “nombili naantu ayehe.” (Aaroma 12:18) Otandi pandula Jehova noonkondo, sho Oohapu dhe nombepo ye ondjapuki ya kwathele ndje ndi ninge omalunduluko. — Aagalati 5:22, 23; Aahebeli 4:12.

 Pehala lyokukala omupika gwiingangamithi, gwelongithonkondo nogwomilalo dha nyata, ngashingeyi ohandi kambadhala ndi nyanyudhe Jehova Kalunga noku mu pa shi thike pokuvula kwandje. Shoka osha kwatela mo okukwathela yamwe ye mu tseye. Konima yomimvo omishona sho nda ninginithwa, onda tembukile koshilongo shimwe, opo ndi ka uvithile miitopolwa moka mu na ompumbwe onene yaauvithi. Momukokomoko gwomimvo, onda kala tandi nyanyukilwa okulonga aantu oyendji Ombiimbeli nokumona nkene tayi lundulula oonkalamwenyo dhawo. Onda nyanyukwa wo sho meme naye a ningi Onzapo yaJehova, omolwiikala neihumbato lyandje ewanawa.

 Mo 1999, onda hiti osikola ndjoka hayi ithanwa ngashingeyi Osikola yAauvithi yUukwaniilwa, mo El Salvador. Osikola ndjoka oya dheula ndje noya longekidha ndje ndi pitithe komeho iilonga yokuuvitha, yokulonga aantu noyokuninga omatalelopo guusita megongalo. Lwanima momumvo omo tuu moka, onda hokana omuholike gwandje, Eugenia. Atuhe otwa kala aakokolindjila yondjigilile moGuatemala.

 Ngashingeyi onda nyanyukwa shili monkalamwenyo, pehala lyokukala nda yemata. Okutula miilonga shoka Ombiimbeli tayi longo, okwa mangulula ndje komilalo dha nyata nokelongithonkondo, nokwa kwathela ndje ndi kale nda nyanyukwa shili monkalamwenyo nondi na ombili.