WANGƆ 01

Ngbangɔ lengbi ti zangɔ mɔ

E zu e ndo hũnda tɛrɛ e na ndo mɛ aba dungɔ lɛ ngɛ̃́, apɛnɔ, kwa, nga na ndo bi mɛ na gangɔ. E ndo tengbi na akpale mɛ aba dungɔ lɛ ngɛ̃ tɛ e ti bi kɔi kɔi, mabere gingɔ falanga ti kãngɔ na azi ti ndasewa tɛ e, nga na ye mɛ e li ti nɛngɔ ya ala du na dengɔ bɛ. Azi gba ndo hũ ya Ngbangɔ ndo hɛ̃ gbinya ti ahũnda ti ngbondoni mɛ aba dungɔ lɛ ngɛ̃́ wa ni ndo hɛ̃nga wangɔ mɛ aba se ti dungɔ na dengɔ bɛ. Mɔ ka mɔ hĩnga zo kɔi mɛ Ngbangɔ lengbi ti zangɔ lo?

1. Ahũnda mɛ Ngbangɔ hɛ̃ gbinya ni nɛ?

Ngbangɔ hɛ̃ gbinya na ndo ahũnda ti ngbondoni mɛ: Dungɔ lɛ ngɛ̃́ bandandó ngasia? Nda mɛ e ge lɛ sese nɛ? Nda mɛ anzɔ̃ azi ndo hũ pɛnɔ nɛ? Ye mɛ ndo ɔ na pɛ kwá nɛ? Se du ya azi zu ndo ye dungɔ na siriri, wa nda mɛ to sĩ ndɛ ge lɛ sese so nɛ? Lɛ sese na tingɔ ngasia na bi mɛ na gangɔ nɛ? Ngbangɔ hɛ̃ gbinyã mɛ alengbi na ndo ahũnda olo. Amiliɔ̃ tɛ azi ndo hũ ya agbinya ti Ngbangɔ ndo gbɔ̃ bɛ.

2. Ngasia la Ngbangɔ alengbi ti zangɔ mɔ ti nɛngɔ ya mɔ du na dungɔ lɛ ngɛ̃́ ti dengɔ bɛ nɛ?

Ngbangɔ sĩ na awangɔ ti nzɔ̃ni. Na ndakisa ni kambisa ye me azi ti ndasewa li ti nɛngɔ ya ala du na dengɔ bɛ. Ni kambisa hɛ̃ e ye me e li ti nɛngɔ ya e nwɔ̃ sɔngɔ bɛ tɛ e nga na se mɛ elengbi ti sepalangɔ na kwa tɛ e. Na ngoi mɛ mɔ na mandangɔ buku mɛ ko, mɔ na hĩngangɔ wangɔ mɛ Ngbangɔ hɛ̃ na ndo akpale olo nga na akpale mɛndɛ̃. Ngoi mɛndɛ̃ mɔ na hũngɔ ya “Atɛnɛ tɛ Nzapa zu mɛ asu kaya buku [Afa ya, aye zu mɛ kaya Ngbangɔ] ni ndoza zo.”—2 Timɔte 3:16.

Ta buku olo du Ngbangɔ ma. Kanda ni lengbi ti zangɔ mɔ ya mɔ manda Ngbangɔ. Na loni la e yɔ kati mɔ ya mɔ di avɛrsɛ zu mɛ akpãni kaya wangɔ kɔi kɔi wa mɔ ginga hĩngangɔ se mɛ ni mangbi na tɛnɛ mɛ mɔ ndo manda.

GI HĨNGANGƆ LO MƐNDƐ̃

Gi hĩngangɔ se mɛ Ngbangɔ aza na azi mɛndɛ̃, ye mɛ mɔ li ti nɛngɔ ya mɔ sepala na dingɔ ni, nga na nda mɛ ayɔ ya aza mɔ ti nɛngɔ ya mɔ gbɔ̃ nda ni nzɔ̃ni.

3. Ngbangɔ lengbi ti fangɔ e na lége

Ngbangɔ nga ma moinda bere tɔrshɛ mɛ ndo za kpengbani. Ni ndo za e ya e mu ekateli ti nzɔ̃ni, wa ni ndo fanga na e yangondo aye mɛ na lingɔ tɛrɛ lo na bi mɛ na gangɔ.

Di Nzembo 119:105, wa na pɛni hɛ̃ gbinya ti ahũnda olo mɛ:

Dangɔ bɛ mɛ wa sungɔ bia olo na ni na ndo Ngbangɔ nɛ?
Wa dangɔ bɛ mɛ mɔ na ni na ndo Ngbangɔ nɛ?

4. Ngbangɔ lengbi ti hɛ̃ngɔ gbinya ti ahũnda tɛ e

Wali kɔi luandó gbinya na ndo hũnda mɛndó lo ndo hũnda na tɛrɛ lo na pɛ abulu gba kaya Ngbangɔ. Ba VIDEO, wa na pɛni hɛ̃ gbinya ti ahũnda olo mɛ.

VIDEO: Kobungisa elikya na yo soki moke te! (1:48)

So ya video mɛ, ahũnda mɛ wali olo ndo hũndandó na tɛrɛ lo nɛ?
Ngasia la mandangɔ Ngbangɔ azandó lo nɛ?

Ngbangɔ ndo sa ngunu bɛ e ya e hũnda ndo. Di Matie 7:7, wa na pɛni hɛ̃ gbinya ti hũnda olo mɛ:

Ahũnda mɛ mɔ na ni mɛ Ngbangɔ lengbi ti hɛ̃ngɔ gbinya ni nɛ?

5. Dingɔ Ngbangɔ alengbi ti hɛ̃ngɔ mɔ dengɔ bɛ

Azi gba ndo sepala na dingɔ Ngbangɔ, wa ni ndo hɛ̃nga la nzɔ̃ kpale. Ba VIDEO, wa na pɛni hɛ̃ gbinya ti ahũnda olo mɛ.

VIDEO: Kotanga Biblia (2:05)

Na ya video olo, dangɔ bɛ mɛndó apalanga na ni na ndo dingɔ mbɛti nɛ?
Wa nda mɛ ala banda sepalangɔ na dingɔ Ngbangɔ nɛ?

Ngbangɔ na awangɔ mɛ ndo fa e na lége, ndo gbɔ̃ bɛ e wa ni ndo hɛ̃nga e nzɔ̃ dangɔ bɛ. Di Roma 15:4, wa na pɛni hɛ̃ gbinya ti hũnda olo mɛ:

Mɔ na yengɔ ya aza mɔ ya mɔ hĩnga nzɔ̃ dangɔ bɛ mɛ kaya Ngbangɔ?

6. Azi mɛndɛ̃ alengbi ti zangɔ mɔ ya mɔ gbɔ̃ nda tɛnɛ ti ya Ngbangɔ nzɔ̃ni

Azi gba ndo sepala na dingɔ Ngbangɔ ala nvɛ̃ni, wa ando du nzɔ̃ni nvɛ̃ni se zo mɛndɛ̃ za la. Di Awa Pangɔ Kwa 8:26-31, wa na pɛni hɛ̃ gbinya ti ahũnda olo mɛ:

Elengbi ti gbɔ̃ngɔ nda tɛnɛ ti ya Ngbangɔ ngasia?—Ba vɛrsɛ ti 30 nga na 31.

Kɔli kɔi mɛ zo ti etiopia ndó na gwɛ̃ ya aza lo ti nɛngɔ ya lo gbɔ̃ nda tɛnɛ tɛ Nzapa mɛndó lo ndo di ni. Ndɛ nga lo mɛ ko, azi gba ndo hũ nzɔ̃ni ya, ti nɛngɔ ya ani gbɔ̃ nda tɛnɛ ti ya Ngbangɔ ko, ayɔ ya azi mɛndɛ̃ aza ani

AZI MƐNDƐ̃ NDO TƐNƐ YA: “Mandangɔ Ngbangɔ adu gelengɔ na ngoi.”

Wa mɔ, mɔ da tɛ mɔ bɛ mɔ ya nɛ? Na lo nɛ?

NA NDUNU NI

Ngbangɔ ndo hɛ̃ e awangɔ mɛ aba dungɔ lɛ ngɛ̃́ ti bi kɔi kɔi, ni hɛ̃ gbinya ti ngbondoni mɛ aba dungɔ lɛ ngɛ̃́, ni ndo za azi wa ni ndo hɛ̃nga la nzɔ̃ dangɔ bɛ.