WANGƆ 22

Mɔ lengbi ti pangɔ nzɔ̃ pa hɛ̃ azi mɛndɛ̃ ngasia?

Ngoi mɛ mɔ manda Ngbangɔ ko, mɔ lengbi ti hũngɔ ya, ‘ayɔ ya azi zu hĩnga tɛnɛ olo mɛ!’ Ti biani, azi na gwɛ̃ ti hĩngangɔ bɛta tɛnɛ ti ya Ngbangɔ. E ba ye mɛ mɔ li ti nɛngɔ ya mɔ nwɔ̃ mbɛtɔ mɛ mɔ na ni, wa mɔ banda fangɔ tɛnɛ na dengɔ bɛ zu.

1. Mɔ kambisa ye mɛ mɔ ndo manda hɛ̃ azi mɛ mɔ hĩnga la ngasia

Ava Yezo tɛnɛndó ya: “Ye mɛ e hũ na lɛ e, nga na tɛnɛ mɛ e ma na ma e ko, ta e lengbi ti ziangɔ pangɔ tɛnɛ ni ma.” (Awa Pangɔ Kwa 4:20) Ala ndo yendo tɛnɛ mɛ Yezo ha na la sĩ, ni la ala ndo li ngandó zu ti kambisangɔ ni hɛ̃ azi. Mɔ ndo ma nga tɛrɛ mɔ ngaso? Se du so ko, gi se ti kambisangɔ hɛ̃ azi ti ndasewa tɛ mɔ nga na akwa mɔ na tɔndɔngɔ zu aye mɛ mɔ ndo manda.—Di Kɔlɔsɛ 4:6.

Se mɛ mɔ banda na ni

Mɔ lengbi ti tɛnɛngɔ tɛnɛ ti ya Ngbangɔ hɛ̃ zo kɔi ti ndasewa tɛ mɔ ya: “Mbi manda lo kɔi mɛ mbi sepala na ni gba na ya pɔsɔ mɛ.”
Di vɛrsɛ mɛ alengbi ti sangɔ ngunu bɛ kwa mɔ mɛ tɛrɛ lo ndo so bere lo na sɔngɔ bɛ.
Se kwa mɔ kɔi hũnda mɔ ya mɔ nzɔ̃ni? Kambisa hɛ̃ lo aye mɛ mɔ manda kaya Ngbangɔ bere omɛ mɔ manda ka bombi.
Fa akwa mɔ na sitɛ ti jw.org
Yɔ ka ti azi mɛndɛ̃ ya ala ga ba se mɛ mɔ ndo manda na Ngbangɔ bere ala yɔ mandangɔ Ngbangɔ kaya jw.org.

2. Nda mɛ du nzɔ̃ni ya mɔ banda fangɔ tɛnɛ ndoni kɔi na ayata ti ya bombi nɛ?

Ava Yezo ndo fandó tɛnɛ hɛ̃ azi zu. Yezo “to[ndo] la sɛ sɛ uzu tɛ [lo] ka ya kɔdɔrɔ zu” ti nɛngɔ ya ala pa nzɔ̃ pa. (Luka 10:1) Se ti nzɔ̃ni ti fangɔ tɛnɛ niko alindó ya azi gba ma nzɔ̃ pa. Pangɔ nzɔ̃ pa ndoni kɔi ndo hɛ̃ndó ava Yezo dengɔ bɛ. (Luka 10:17) Mɔ lengbi ti kpãngɔ mokanɔ ti fangɔ tɛnɛ ndoni kɔi na ayata ti ya bombi?

GI HĨNGANGƆ LO MƐNDƐ̃

Gi hĩngangɔ se mɛ mɔ lengbi ti nwɔ̃ngɔ mbɛtɔ tɛ mɔ, gi nga hĩngangɔ se mɛ mɔ lua na dengɔ bɛ na ya kwa ti pangɔ nzɔ̃ pa.

3. Yehova na dungɔ ndoni kɔi na mɔ

Ambanga zi na gwɛ̃ ti fangɔ tɛnɛ, kanda ala ndo kpɛ mbɛtɔ ti lɛ azi nga na tɛnɛ mɛ ala na tɛnɛngɔ hɛ̃ la.

Mɔ ndo kpɛ mbɛtɔ ti kambisangɔ tɛnɛ mɛ mɔ ndo manda hɛ̃ azi mɛndɛ̃? Na lo nɛ?

Ba VIDEO, wa na pɛni hɛ̃ gbinya ti hũnda olo mɛ.

VIDEO: Nabondelaki Yehova apesa ngai mpiko (4:05)

Ngasia la apalanga mɛ Atɛmwɛ tɛ Yehova nwɔ̃ndó na mbɛtɔ tɛ la nɛ?

Di Yisaya 41:10, wa na pɛni hɛ̃ gbinya ti hũnda olo mɛ:

Se du ya mɔ ndo kpɛ mbɛtɔ ti fangɔ tɛnɛ, ngasia la lingɔ sambela alengbi ti zangɔ mɔ nɛ?

Mɔ hĩnga ni?

Na ebandeli Atɛmwɛ tɛ Yehova gba ndo hũndó ya ta ala na kokangɔ pangɔ nzɔ̃ pa hɛ̃ azi ma. E mu selɛlo tɛ Sergey lo ndo hũndó ya ta ni na tina ma, wa ta ni nga na kokangɔ tɛnɛngɔ tɛnɛ na azi mɛndɛ̃ ma. Kanda na pɛ mandangɔ Ngbangɔ, lo tɛnɛ ya: “Abɛse du ya mbi ndo kpɛndó mbɛtɔ ko, mbi bandandó kambisangɔ hɛ̃ azi atɛnɛ mɛndó mbi ndo manda. Ye mɛndó kamwisa mbi du ya kambisangɔ hɛ̃ azi alo mɛ kaya Ngbangɔ azandó mbi, mbi hũ ya mbi na tina.”

4. Hɛ̃ azi ndima

Se mɔ ye pangɔ nzɔ̃ pa hɛ̃ azi ko, binga li mɔ na ndo tɛnɛ mɛ mɔ na tɛnɛngɔ nga na se mɛ mɔ tɛnɛ na ni. DI 2 Timɔte 2:24 nga na 1 Pɛtro 3:15, wa na pɛni hɛ̃ gbinya ti ahũnda olo mɛ:

Ngasia la mɔ kpã awangɔ mɛ so ya avɛrsɛ mɛ na kwa na ngɔi mɛ mɔ ndo pa nzɔ̃ pa hɛ̃ azi mɛndɛ̃ nɛ?
Ngɔi mɛndɛ̃ azi ti ndasewa tɛ mɔ nga na akwa mɔ alengbi ti kɛ̃ngɔ mangɔ mɔ. Se du ngaso, ye mɛ mɔ li nɛ? Wa ye mɛ ta mɔ lengbi ti lingɔ ma nɛ?
Nda mɛ du nzɔ̃ni hũndangɔ azi na ndo na kɔdɛ na se lɛ tongɔ ala na ndo ngunu ya ala ye tɛnɛ tɛ e nɛ?

5. Pangɔ nzɔ̃ pa ndo hɛ̃ dengɔ bɛ

Yehova hɛ̃ndó Yezo kwa ti pangɔ nzɔ̃ pa. Yezo ndo hũndó kwa niko ngasia? Di Yoanɛ 4:34, wa na pɛni hɛ̃ gbinya ti ahũnda olo mɛ:

Tɛngɔ tɛ ti nzɔ̃ni ndo bata dungɔ lɛ ngɛ̃́ tɛ e, wa ni ndo hɛ̃ nga e dengɔ bɛ. Nda mɛndó Yezo tɛnɛ ya lingɔ se bɛ Nzapa, na ndakisa pangɔ nzɔ̃ pa adundó nga ma tɛ ka tɛ lo nɛ?
Mɔ ndo hũ ya Kwa ti pangɔ nzɔ̃ pa alengbi ti hɛ̃ngɔ mɔ dengɔ bɛ?

Awangɔ

Na bombi ti ya pɔsɔ gi hĩngangɔ se mɛ mɔ lengbi ti bandangɔ pangɔ nzɔ̃ pa hɛ̃ azi.
Hũnda zo mɛ ndo ha mɔ na ye ti nɛngɔ ya mɔ hĩnga bere mɔ lengbi ti bandangɔ lingɔ devuar. Adevuar mɛ mɔ na bandangɔ lingɔ na zangɔ mɔ ya mɔ lɛkɛ tɛrɛ mɔ nzɔ̃ni ti nɛngɔ ya mɔ kambisa hɛ̃ azi aye mɛ mɔ ndo manda.
Na lége ti eteni “Azi mɛndɛ̃ ndo tɛnɛ ya” nga na “Se zo hũnda mɔ ya” gi hĩngangɔ se mɛ mɔ lengbi ti hɛ̃ngɔ gbinya na ndo hũnda mɛ azi ndo hũnda nga na ndo kitɛ mɛ azi ndo dɛ.

SE ZO HŨNDA MƆ YA: “Mɔ da nzɔ̃ni?”

Ngasia la mɔ lengbi ti salelangɔ libaku niko ti nɛngɔ ya mɔ kambisa hɛ̃ zo mɛ hũnda mɔ na ndo aye mɛ mɔ manda kaya Ngbangɔ nɛ?

NA NDUNU NI

Kwa ti pangɔ nzɔ̃ pa du woni, wa ni ndo hɛ̃ nga dengɔ bɛ.

Bozongeli

Nda mɛ ayɔ ya mɔ pa nzɔ̃ pa hɛ̃ azi mɛndɛ̃ nɛ?
Ngasia la mɔ lengbi ti hɛ̃ngɔ azi ndima na ya kwa ti pangɔ nzɔ̃ pa nɛ?
Se du ya mɔ ndo kpɛ mbɛtɔ ti pangɔ nzɔ̃ pa, ye mɛ mɔ lengbi ti lingɔ nɛ?

Datɛ mɛ mɔ onzi na wangɔ mɛ:

Ye mɛ mɔ na lingɔ ni

Da bɛ mɔ na zo kɔi mɛ mɔ lengbi ti pangɔ hɛ̃ lo nzɔ̃ pa. Gi hĩngangɔ tɛnɛ mɛ mɔ na tɛnɛngɔ, se mɛ mɔ tɛnɛ na ni nga na ngoi mɛ mɔ lengbi ti tɛnɛngɔ na ni.

Aye mɛndɛ̃:

Your other goal