Kwá ndo hɛ̃ azi pɛnɔ nga na sɔngɔ bɛ nvɛ̃ni. Na lo ni la Ngbangɔ ndo ili kwá ya, wa kula. (1 Kɔrinto 15:26) E mandandó kaya wangɔ ti 27 ya, Yehova na hãngɔ kwá zingɔ ti bwai. Wa ye mɛ lo na lingɔ ni na lo tɛ azi mɛndó kpili gã nɛ? Na ya wangɔ mɛ, mɔ na mandangɔ alo gba mɛ aba akapa ti nzɔ̃ni mɛ Yehova ko ti diringɔ na amiliarɛ tɛ azi mɛ kpili lɛ la ngɛ̃́. Lo na diringɔ na ala lɛ la ngɛ̃́! Ni lengbi ti lingɔ tɛrɛ lo? Wa ala na luangɔ dungɔ lɛ ngɛ̃́ ni ka ndozu bere ge lɛ sese?

1. Ye mɛ Yehova na gwɛ̃ ti lingɔ ni na lo tɛ azi mɛ e ndo ye la mɛ ala kpili nɛ?

Yehova na gwɛ̃ kpengbani ti diringɔ na azi mɛ kpili lɛ la ngɛ̃́. Kɔli kɔi ti loyengɔ mɛ ili lo la Yobo yendó na bɛ lo kɔi ya Yehova na diringɔ na lo lɛ lo ngɛ̃́ na pɛ kwá tɛ lo. Lo tɛnɛndó hɛ̃ Nzapa ya: “Mɔ na ilingɔ mbi, wa mbi na yengɔ [kaya du ti sɛndɛ].”​—Di Yobo 14:13-15.

2. Ngasia la e hĩnga ya azi mɛ kpili na diringɔ lɛ la ngɛ̃́ nɛ?

Ngoi mɛndó Yezo dɛ ge tise ko, Nzapa hɛ̃ndó lo ngunu ti songɔ na azi mɛ kpili. Yezo dirindó na nyingambi ti wali kɔi mɛ na bulu 12 lɛ lo ngɛ̃́, nga na nyingambi ti kɔli tɛ wali kɔi mɛ kɔ lo kpi. (Marko 5:41, 42; Luka 7:12-15) Na gesi, Lazalo mɛndó kwa Yezo kpi ngandó. Abɛse du ya Lazalo kpindó ali bí siɔ ko, Yezo dirindó na lo lɛ lo ngɛ̃́. Yezo lindó sambela hɛ̃ Nzapa, wa lo dɛndó bo kɔngɔ gɛgɛrɛ so nyɔ du ti sɛndɛ ya: “Lazaro, si!” Na gesi “wa kwáni Lazaro alo kai asi,” lɛ lo ngɛ̃́! (Yoanɛ 11:43, 44) Da bɛ mɔ na dengɔ bɛ mɛndó ayata lo na akwa lo ma!

3. Nzɔ̃ dangɔ bɛ na lo tɛ azi mɛ e ndo ye la mɛ kpili du nɛ?

Ngbangɔ tɛnɛ ya: “Azi mɛ kpili ko, ala so gbanda na pɛ kwá.” (Awa Pangɔ Kwa 24:15) Azi mɛndó Yezo so na ala ko, ala mandó dengɔ bɛ ti diringɔ dungɔ na dungɔ lɛ ngɛ̃́ ge lɛ sese. (Yoanɛ 3:13) Se mɛ nga angbã dã Yezo na songɔ na amiliɔ̃ tɛ azi, ti nɛngɔ ya ala du na dungɔ lɛ ngɛ̃́ ti bwai na bwai ge lɛ sese mɛ na tingɔ Paradizo la. Lo tɛnɛndó ya “awa kwáni mɛ kaya du sɛndɛ,” ala na diringɔ lɛ la ngɛ̃́, abɛse du ala mɛndó bɛ azi li na la wa na lo mɛ ya ala kaya bingangɔ li tɛ Nzapa ko, lo na songɔ na ala.​—Yoanɛ 5:28, 29.

 GI HĨNGANGƆ LO MƐNDƐ̃

4. Yezo fandó yangondo ya lo lengbi ti songɔ na azi mɛ kpili

Gi hĩngangɔ alo mɛndɛ̃ na ndo ye mɛndó Yezo li na lo tɛ kwa lo Lazalo. Di Yoanɛ 11:14, 38-44, wa na pɛni hɛ̃ gbinya ti ahũnda olo mɛ:

• Ye mɛ fa ya Lazalo kpindó biani nɛ?​—Ba vɛrsɛ ti 39.

• Mɔ da bɛ mɔ ya nɛ: se du ya Lazalo gwendó ka ndozu, Yezo lengbindó ti diringɔ na lo ge lɛ sese lɛ lo ngɛ̃́?

Ba VIDEO.

5. Azi gba mɛ kpili na diringɔ lɛ la ngɛ̃́!

Di Nzembo 37:29, wa na pɛni hɛ̃ gbinya ti hũnda olo mɛ:

• Amiliɔ̃ tɛ azi mɛ na diringɔ lɛ la ngɛ̃́ na dungɔ ka wa?

Ta bo azi mɛ ndo vorɔ Yehova la Yezo na diringɔ na ala lɛ la ngɛ̃́ ma. Di Awa Pangɔ Kwa 24:15, wa na pɛni hɛ̃ gbinya ti hũnda olo mɛ:

• Zo mɛ mɔ na gwɛ̃ ya a diri na lo lɛ lo ngɛ̃́ na?

• Ngasia la nzɔ̃ dangɔ bɛ ti songɔ kwá asandó ngunu bɛ awa dũngɔ Phelicity nɛ?

 NA NDUNU NI

Ngbangɔ ko kapa ya amiliɔ̃ tɛ azi mɛ kpili na diringɔ lɛ la ngɛ̃́. Yehova na gwɛ̃ ya ala diri du lɛ la ngɛ̃́ wa lo hɛ̃ Yezo ngunu ti songɔ na ala.

Bozongeli

• Yehova na Yezo ndo ma tɛrɛ la ngasia na omɛ aba diringɔ na azi mɛ kpili lɛ la ngɛ̃́ nɛ?

• Amiliɔ̃ tɛ azi mɛ na songɔ na pɛ kwá ala na dungɔ ka ndozu bere ge tise? Nda mɛ mɔ tɛnɛ ngaso nɛ?

• Ye mɛ to mɔ, mɔ ye ya ayata mɔ nga na akwa mɔ mɛ kpili na diringɔ dungɔ lɛ la ngɛ̃́ fãni mɛndɛ̃ nɛ?