Mɔ ka mɔ mandó sɔngɔ bɛ na ndo lo mɛ ba kwa bere falanga wɛ? Ando du pɛnɔ kokisangɔ gwɛ̃ tɛ e nga na vɔrɔngɔ Yehova na se mɛ bɛ lo ndo ye. Kanda Ngbangɔ hɛ̃ wangɔ mɛ alengbi ti zangɔ e.

1. Tɛnɛ mɛ Ngbangɔ tɛnɛ na omɛ ba kwa nɛ?

Gwɛ̃ tɛ Yehova du ya e ma dengɔ bɛ ti kwa mɛ e ndo li. Ngbangɔ tɛnɛ ya “Ta ye mɛ nzɔ̃ni ka tɛ zo ɔngɔ mangɔ . . . dengɔ bɛ ti kpengba kwa tɛ lo da ma.” (Mosakoli 2:24) Yehova ndo li kwa kpengbani. Na ngoi mɛ e ndo li kwa kpengbani ko, e na hɛ̃ngɔ lo dengɔ bɛ, wa e nvɛ̃ni nga na dungɔ na dengɔ bɛ.

Lingɔ kwa du ngbondoni, kanda ta elengbi ti zingɔ lége ya ni mu ndo ti vɔrɔngɔ Yehova ma. (Yoanɛ 6:27) Nzapa ko hɛ̃ e kapa ya se e kpã ni na ndo ti uzu na ya dungɔ lɛ ngɛ̃́ tɛ e ko, ni na hɛ̃ngɔ e ye mɛ e na gwɛ̃ ni.

2. Se ti nzɔ̃ni ti bangɔ na falanga

Ngbangɔ tɛnɛ ya “falanga ndo bata zo,” kanda ta ni ndo hɛ̃ bɛta dengɔ bɛ ma. (Mosakoli 7:12) Kanda ni hɛ̃ e wangɔ ya ta e ti na gwɛ̃ ti falanga ma, ni tɛnɛ ya “ĩ [sepala] na aye mɛ ĩ na ni.” (Di Aebreo 13:5.) Se du ya e ndo sepala na ye mɛ e na ni ko, ta e na hongɔ tɛrɛ e na lo ti gingɔ ye ti gigi gba ma. Ta e na mungɔ anyɔngo ti wawa ma. (Masese 22:7) Ta siɔ lo mɛ ba lɛngɔ wele ti falanga na singɔ na e ma, wa ta e nga na tingɔ ya sɔ̃ tɛ azi mɛ ndo handa azi ya ala lengbi ti tingɔ na falanga gba na pɛ ndunu ngoi ma.

3. E salela falanga na ndenge ti nzɔ̃ni ngasia?

Yehova du Nzapa mɛ ndo ka ye, wa e ndo landa nga seliye tɛ lo na ngoi mɛ “e ndo du na wo ti wa e ndo ka nga ye” hɛ̃ azi mɛndɛ̃. (1 Timɔte 6:18, NWT) E lengbi ti salelangɔ falanga tɛ e na ndenge ti nzɔ̃ni se du ya e ndo hɛ̃ tisa ti nɛngɔ ya ali na kwa ti ya bombi bere zangɔ azi mɛ na gwɛ̃ ya aza ala gba ni ayata e awakristo. Ta ye mɛ e ndo hɛ̃ azi la du ngbondoni ka lɛ Yehova ma, kanda ye mɛ ndo to e ya e hɛ̃ ni. Se e ndo ka ye na bɛ e kɔi ko, e na dungɔ na dengɔ bɛ wa e nga na hɛ̃ngɔ Yehova dengɔ bɛ.​—Di Awa Pangɔ Kwa 20:35.

 GI HĨNGANGƆ LO MƐNDƐ̃

4. Gonda Yehova na ya kwa tɛ mɔ

 5. Sepalangɔ na ye mɛ e na ni ndo hɛ̃ e nzɔ̃ lo gba

Ambanga azi ndo gi ya ani ti na falanga gba. Kanda Ngbangɔ ndo sa ngunu bɛ e ya ta e ti na kɔdɛ ti ngaso ma. Di 1 Timɔte 6:6-8, wa na pɛni hɛ̃ gbinya ti hũnda olo mɛ:

• Ye mɛ Ngbangɔ sa ngunu bɛ e ya e li nɛ?

6. Yehova na hɛ̃ngɔ e ye mɛ e na gwɛ̃ ni

 NA NDUNU NI

Kwa na falanga na tina, kanda ta ni lengbi ti gbanzingɔ e na vɔrɔngɔ Yehova ma.

Bozongeli

• Ye mɛ lengbi ti zangɔ mɔ ya mɔ kpã kwa na ndo tɛ lo nɛ?

• Anzɔ̃ lo mɛ mɔ lua se du ya mɔ ndo sepala na ye mɛ mɔ na ni nɛ?

• Ngasia la mɔ lengbi ti fangɔ ya mɔ ndo kpã bɛ mɔ na ndo tɛnɛ mɛ Yehova tɛnɛ ya ni na hɛ̃ngɔ ava ni ye mɛ ala na gwɛ̃ni nɛ?