WANGƆ 38
Ndo hũ dungɔ lɛ ngɛ̃́ ya ni du ngbondoni
Elengbi ti sepalangɔ na aye ndɛ̃ ndɛ̃ ndɛ̃ na lo mɛ ya e na dungɔ lɛ ngɛ̃́. Elengbi ti sepalangɔ na akpale mɛndɛ̃ abɛse e ndo tengbi na akpengba kpale na ya dungɔ lɛ ngɛ̃́ tɛ e. Ngasia la elengbi ti fangɔ ya e ndo hũ dungɔ lɛ ngɛ̃́ ya ni du ngbondoni nɛ? Nda mɛ du nzɔ̃ni ya e hũ ni ya ni du ngbondoni nɛ?
1. Nda mɛ ayɔ ya e hũ dungɔ lɛ ngɛ̃́ ya ni du ngbondoni nɛ?
Elengbi ti hũngɔ dungɔ lɛ ngɛ̃́ ya ni du ngbondoni na lo mɛ ya, ni du nzɔ̃ ye mɛ Yehova, To e mɛ wa songo hɛ̃ e gɛgɛrɛ. Lo la “ nvɛ̃ dungɔ lɛ ngɛ̃́,” aye zu mɛ na dungɔ lɛ ngɛ̃́ alo ka tɛ lo. (Nzembo 36:9) “Na lo tɛ lo la e ndo du lɛ e ngɛ̃́, na lo ngunu tɛ lo la e ndo [wɔ mbó].” (Awa Pangɔ Kwa 17:25, 28) Yehova ndo hɛ̃ e ye mɛ e na gwɛ̃ni ti nɛngɔ ya abata dungɔ lɛ ngɛ̃́ tɛ e. Ta lo suka bo so ndo ko ma, lo ndo li nga ya e sepala na dungɔ lɛ ngɛ̃́.—Di Awa Pangɔ Kwa 14:17.
2. Ngasia la elengbi ti fangɔ na Yehova ya e ndo sepala na dungɔ lɛ ngɛ̃́ mɛ lo hɛ̃ e nɛ?
Ngoi mɛ dungɔ lɛ ngɛ̃́ tɛ e banda ka ya ko, ni bo ngbondoni ka lɛ Yehova. Davidi, kɔi tɛ awakwa tɛ lo tɛnɛndó ya: “Lɛ mɔ hũndó mbi na ngoi mɛ mbi dɛ pala gɛgɛrɛ.” (Nzembo 139:16) Dungɔ lɛ ngɛ̃́ tɛ e du ngbondoni ka lɛ Yehova. (Di Matie 10:29-31.) Se du ya zo ho tɛrɛ lo bere fɔ̃ lo ko, ni ndo hɛ̃ Yehova pɛnɔ nvɛ̃ni. a (Kobima 20:13) Yehova ndo ma nga pɛnɔ gba na ngoi mɛ e ndo kpã dungɔ lɛ ngɛ̃́ tɛ e na ya kpengba lo na sãna bere ta e ndo li ye mɛ alengbi ti batangɔ dungɔ lɛ ngɛ̃́ tɛ azi mɛndɛ̃ ma. Se e li zu ti batangɔ dungɔ lɛ ngɛ̃́ tɛ e nga na tɛ azi mɛndɛ̃ ko, e ndo fa ya e ndo hũ dungɔ lɛ ngɛ̃́, nzɔ̃ ye mɛ Nzapa hɛ̃ e ya ni du ngbondoni.
GI HĨNGANGƆ LO MƐNDƐ̃
Gi hĩngangɔ ye mɛ mɔ li ti nɛngɔ ya mɔ fa na Yehova ya mɔ ndohũ dungɔ lɛ ngɛ̃́, nzɔ̃ ye mɛ Yehova hɛ̃ e ya ni du ngbondoni.
3. Bata sãte tɛ mɔ
Ngoi mɛ wakristo kɔi hɛ̃ tɛrɛ lo hɛ̃ Yehova ko, ni fa ya lo hɛ̃ dungɔ lɛ ngɛ̃́ tɛ lo zu hɛ̃ Yehova. Ali mabere lo lu tɛrɛ lo na Nzapa. Di Roma 12:1, 2, wa na pɛni hɛ̃ gbinya ti ahũnda olo mɛ:
-
Ye mɛ lengbi ti tongɔ mɔ ya mɔ bata sãte tɛ mɔ nɛ?
-
Wa mɔ bata sãte tɛ mɔ ngasia?
4. Du na kpengba lɛ ya ta siɔ lo bere kwá si na mɔ ma
Ngbangɔ hɛ̃ e wangɔ ya ta e li ye mɛ lengbi ti lingɔ ya zo hɔ̃ kã bere lo kpi ma, abɛse du nga e nvɛ̃ni. Ba VIDEO ti nɛngɔ ya mɔ hĩnga ye mɛ mɔ li, ti nɛngɔ ya ta siɔ lo si na mɔ ma.
Di Masese 22:3, na pɛni tɛnɛ tɛnɛ na ndo se mɛ mɔ na azi mɛndɛ̃ ĩ lengbi ti dungɔ na kpengba lɛ ya ta siɔ lo si ma na ngoi mɛ ĩ . . .
-
kaya da.
-
ka ndo ti kwa.
-
ndo lɛ wele.
-
ayɔ ĩ bere ĩ yɔ azi na kamiɔ̃, moto, velobere ĩ kaya ngɔ.
5. Hũ dungɔ lɛ ngɛ̃́ tɛ nyingambi mɛ dɛ kaya ta lo ya ni du ngbondoni
David tɛnɛndó ya Yehova ndo hĩnga nzɔ̃ni se mɛ nyingambi ndo mai na ni kaya ta lo. Di Nzembo 139:13-17, wa na pɛni hɛ̃ gbinya ti hũnda olo mɛ:
-
Ka tɛ Yehova, dungɔ lɛ ngɛ̃́ tɛ zo ndo banda na ngoi mɛ lo dɛ kaya ta lo, bere na ngoi mɛ adũ lo?
Ndia mɛndó Yehova hɛ̃ azi ti Yizraɛlɛ ndo batandó ata ngɔ ná ayangambi mɛ kaya la. Di Kobima 21:22, 23, wa na pɛ ni hɛ̃ gbinya ti ahũnda olo mɛ:
-
Yehova ndo hũndó zo mɛ ta lo ho nyingambi mɛ dɛkaya ta lo na sãna ma ngasia?
-
Yehova ndo hũndó ngasia ngoi mɛ zo li ni na sãna nɛ? b
-
Na bangɔ se mɛ Yehova ndo ba na lo olo mɛ,mɔ da bɛ mɔ ya nɛ?
Lo kɔi lengbi ti lingɔ ya wali mɛ ndo hũ dungɔ lɛ ngɛ̃́ ya ni du ngbondoni ahã ngɔ. Di Yisaya 41:10, wa na pɛni hɛ̃ gbinyati ahũnda olo mɛ:
-
Se akpã katɛ wali kɔi ndozu ya lo hã ngɔ, zo mɛ lo kpãbɛ lo ka tɛ lo na? Na lo nɛ?
AZI MƐNDƐ̃ NDO TƐNƐ YA: “Wali nvɛ̃ni la lengbi ti pɔnangɔ hãngɔ ngɔbere kɛ̃ngɔ hãngɔ ni, na lo mɛ ya tɛrɛ lo ti lo.”
-
Ye mɛ ndo fa ya Yehova ndo hũ dungɔ lɛ ngɛ̃́ tɛ ta ngɔ ná nyingambi mɛkaya lo ya ni du ngbondoni nɛ?
NA NDUNU NI
Ngbangɔ pa ya dungɔ lɛ ngɛ̃́ du nzɔ̃ ye mɛ Yehova hɛ̃ e gɛgɛrɛ. Ni la ayɔ ya e sepala, e tɔndɔ wa e bata dungɔ lɛ ngɛ̃́ tɛ e nga na tɛ azi mɛndɛ̃.
Bozongeli
-
Nda mɛ dungɔ lɛ ngɛ̃́ tɛ azi adu ngbondoni ka lɛ Yehova nɛ?
-
Yehova ndo ma ngasia na ngoi mɛ zo kɔi ho fɔ̃ lo na sãna nɛ?
-
Nda mɛ ayɔ ya mɔ hũ dungɔ lɛ ngɛ̃́, nzɔ̃ ye mɛ Yehova hɛ̃ e gɛgɛrɛ ya ni du ngbondoni nɛ?
AYE MƐNDƐ̃ MƐ MƆ LI
Ngasia la elengbi ti hɛ̃ngɔ Yehova siakɔli na lo ti dungɔlɛ ngɛ̃́ mɛ lo hɛ̃ e nɛ?
Gi gbinya ti hũnda olo mɛ: Nzapa lengbi ti kangɔ lɛ lo ndo siɔ kpale tɛ wali mɛ hã ngɔ?
“Biblia elobi nini mpo na likambo etali kolongola zemi?” (Tɛnɛ mɛ kaya intɛrnɛt)
Ngasia la se mɛ Yehova ndo ba na dungɔ lɛ ngɛ̃́ alengbi ti zangɔ e ya e pɔna wele ti nzɔ̃ni nɛ?
“‘Masano oyo etyaka bomoi na likama’—Osengeli kosala yango?” (Lamuka! ti 08/10/2000)
Ye mɛ zo mɛ na dangɔ bɛ ti hongɔ tɛrɛ lo lengbi ti lingɔ nɛ? Ba se mɛ Ngbangɔ lengbi ti zangɔ lo.
“Nazali na mposa ya kokufa—Biblia ekoki kosalisa ngai ntango nazali na makanisi ya komiboma?” (Tɛnɛ mɛ kaya intɛrnɛt)
a Yehova ndo kpã lɛ lo na ndo azi mɛ bɛ la fa kã. (Nzembo 34:18) Lo ndo hĩnga sɔngɔ bɛ mɛ ndo to zo ya lo ho tɛrɛ lo, wa lo nga na gwɛ̃ ti zangɔ azi mɛ na dangɔ bɛ ti ngaso. Ti nɛngɔ ya mɔ hĩnga se mɛ Yehova lengbi ti zangɔ zo mɛ na dangɔ bɛ ti hongɔ tɛrɛ lo ya lo gbinyangbi dangɔ bɛ mɛ lo na ni ko, di tɛnɛ mɛ “Nazalaki na mposa ya kokufa—Biblia ekoki kosalisa ngai ntango nazali na makanisi ya komiboma?” mɛ akpã kaya eteni Aye mɛndɛ̃ mɛ mɔ li mɛ so ya wangɔ mɛ.
b Ta ayɔ ya azi mɛndó hã ngɔ a hũ ya ani li siɔ kpale mɛ aɔ ndoni ma, na lo mɛ ya Yehova lengbi ti kangɔ lɛ lo na ndo siɔ kpale tɛ la. Ti nɛngɔ ya mɔ hĩnga lo mɛndɛ̃ ko, ba bɛli tɛnɛ mɛ “Biblia elobi nini mpo na likambo etali kolongola zemi?” ti eteni Ye mɛndɛ̃ mɛ mɔ li mɛ so ya wangɔ mɛ
